ياپونىيە باش ۋەزىرى سانائې تاكائىچىنىڭ باياناتلىرى خىتاي ئەلچىخانىسىنىڭ ياپونىيەنىڭ بەزى رايونلىرىدا دۆلەت خەۋپسىزلىك كۈچلىرىنىڭ ئەھۋالى ۋە جەمئىيەت ئامانلىقىنىڭ ناچارلاشقانلىقى ھەققىدە ئاگاھلاندۇرۇش چىقىرىپ، خىتاي پۇقرالىرىغا ساياھەت قىلىشتىن ساقلىنىشنى تەۋسىيە قىلغان ئۇقتۇرۇشىدىن كېيىن ئېلان قىلىندى.
ياپونىيە باش ۋەزىرى سانائې تاكائىچى تەيۋەن مەسىلىسىگە ئائىت بەرگەن باياناتلىرى سەۋەبىدىن ئىككى دۆلەت ئوتتۇرىسىدىكى جىددىيچىلىك داۋاملىشىۋاتقان بولسىمۇ، خىتاي بىلەن دىيالوگ ئورنىتىش چاقىرىقىنى يەنە بىر قېتىم تەكرارلىدى.
دۈشەنبە كۈنى يېڭى يىلنىڭ تۇنجى مۇخبىرلارنى كۈتۈۋېلىش يىغىنىدا ھۆكۈمەتنىڭ ئالدىنقى قاتاردىكى خىزمەتلىرى ھەققىدە توختالغان تاكائىچى، ئىككى دۆلەت ئوتتۇرىسىدىكى ئەندىشە ۋە قىيىنچىلىقلارنى بىر تەرەپ قىلىش ئۈچۈن ئالاقىنىڭ مۇھىملىقىنى تىلغا ئالدى.
كيودو ئاگېنتلىقىنىڭ خەۋىرىگە قارىغاندا، تاكائىچى: «دۆلىتىمىز خىتاي بىلەن تۈرلۈك دىيالوگ پۇرسەتلىرىگە ئوچۇق، بىز ئىشىكىمىزنى ھېچقاچان تاقىغىنىمىز يوق» دېگەن.
تاكائىچىنىڭ بۇ سۆزلىرى خىتاينىڭ ياپونىيەدە تۇرۇشلۇق ئەلچىخانىسىنىڭ شەنبە كۈنى ئېلان قىلغان ئۇقتۇرۇشىدا، ياپونىيەنىڭ بەزى رايونلىرىدىكى ئامانلىق ئەھۋالىنىڭ يېقىنقى مەزگىللەردە ناچارلاشقانلىقى بىلدۈرۈلۈپ، خىتاي پۇقرالىرىغا يېقىنقى مەزگىللەردە ياپونىيەگە ساياھەتكە بېرىشتىن ساقلىنىش تەۋسىيە قىلىنغاندىن كېيىن ئېلان قىلىندى.
خىتاي ئەلچىخانىسىنىڭ يېقىنقى باياناتىغا قارىتا ياپونىيە دائىرىلىرىدىن تېخىچە بىر ئىنكاس قايتۇرۇلمىدى.
تاكائىچى ئۆتكەن يىلى 7-نويابىردا تەيۋەنگە قارىتا ئېلىپ بېرىلىدىغان بىر خىتاي ھۇجۇمىنىڭ قانۇنىي جەھەتتىن «مەۋجۇتلۇققا تەھدىت سالىدىغان ئەھۋال» يارىتىشى مۇمكىنلىكىنى ۋە بۇنىڭ ياپونىيەنىڭ كوللېكتىپ ئۆزىنى قوغداش ھوقۇقىنى ئىشلىتىشىگە پۇرسەت يارىتىپ بېرىدىغانلىقىنى ئېيتقاندىن بۇيان، خىتاي بىلەن ياپونىيە ئوتتۇرىسىدىكى جىددىيچىلىك كەسكىنلىشىپ كەتتى.
بېيجىڭ تاكائىچىنىڭ باياناتلىرىغا قاتتىق نارازىلىق بىلدۈردى. خىتاي ياپونىيەگە ساياھەتكە بارماسلىق ھەققىدە ئۇقتۇرۇش ئېلان قىلدى ھەمدە دېڭىز مەھسۇلاتلىرى ئىمپورتىنى قايتىدىن چەكلەشنى ئۆز ئىچىگە ئالغان بىرنەچچە چەكلىمە خاراكتېرلىك تەدبىرلەرنى يولغا قويدى.
