تۈركىيە بىلەن ئەنگلىيە ئىككى ئىتتىپاقداش ئوتتۇرىسىدىكى مۇداپىئە مۇناسىۋەتلىرىنى كۈچەيتىشنىڭ يېڭى بىر قەدىمى سۈپىتىدە، «Eurofighter Typhoon» ئۇرۇش ئايروپىلانلىرىنى ئاسراش ۋە مەشغۇلات قىلىشنى قوللاشنى نىشان قىلغان يېڭى بىر كېلىشىم ئىمزالىدى.
كېلىشىم چارشەنبە كۈنى لوندوندا تۈركىيە جۇمھۇرىيىتى دۆلەت مۇداپىئە مىنىستىرى ياشار گۈلەر بىلەن ئەنگلىيە دۆلەت مۇداپىئە ۋەزىرى جون ھېلى ئوتتۇرىسىدا ئۆتكۈزۈلگەن سۆھبەت جەريانىدا ھاسىل قىلىندى.
تۈركىيە جۇمھۇرىيىتى دۆلەت مۇداپىئە مىنىستىرلىقىنىڭ بىلدۈرۈشىچە، كېلىشىم «Eurofighter Typhoon» پىروگراممىسى دائىرىسىدىكى ئايروپىلانلارنى تېخنىكىلىق ۋە ئەشيا ئوبوروتى جەھەتتىن قوللاشقا ئەھمىيەت بېرىدىغان بولۇپ، ئايروپىلانلارنىڭ ئۇزۇن مۇددەتلىك مەشغۇلات ئىقتىدارىنىڭ تولۇق بولۇشىغا كاپالەتلىك قىلىشنى نىشان قىلىدىكەن.
قوللاش كېلىشىمى چوڭ تىپتىكى ئايروپىلان سېتىۋېلىش كېلىشىمىنىڭ داۋامى ھېسابلىنىدۇ
مەزكۇر يېڭى كېلىشىم تۈركىيەنىڭ 20 دانە «Typhoon» ئۇرۇش ئايروپىلانى ھەمدە مۇناسىۋەتلىك جابدۇق ۋە ئوق-دورىلارنى سېتىۋېلىشنى ئۆز ئىچىگە ئالغان، ئالدىنقى يىلى ئىمزالانغان 8 مىليارد ستېرلىڭ (10 مىليارد 700 مىليون دوللار) قىممىتىدىكى تېخىمۇ كەڭ كۆلەملىك كېلىشىمدىن كېيىن ئىمزالاندى.
دائىرىلەر مەزكۇر پىروگراممىغا مۇناسىۋەتلىك ئايرىم بىر سېتىۋېلىش توختامىنىڭ ئاللىبۇرۇن ئۆكتەبىر ئېيىدا تاماملانغانلىقىنى ۋە بۇنىڭ نۆۋەتتىكى ئاسراشنى ئاساس قىلغان كېلىشىمگە يول ئاچقانلىقىنى بىلدۈردى.
ئىستراتېگىيەلىك شېرىكلىك مۇناسىۋەتلىرى كۈچەيمەكتە
مىنىستىر گۈلەر بىلەن ۋەزىر ھېلى سۆھبەت جەريانىدا يەنە مۇداپىئە ھەمكارلىقىنى كېڭەيتىش مەسىلىسىنى مۇزاكىرە قىلدى ھەمدە ئىككى تەرەپ ئالدىمىزدىكى يىللاردا ھەربىي ھەمكارلىقنى چوڭقۇرلاشتۇرۇش مەسىلىسىدە تەۋرەنمەس پوزىتسىيەسىنى نامايان قىلدى.
«Eurofighter» ئۇرۇش ئايروپىلانلىرى بىرلەشمىسىنىڭ ئەڭ مۇھىم شېرىكلىرىدىن بىرى بولغان ئەنگلىيە، گېرمانىيە 2024-يىلى سېتىشقا قارىتا قويغان ۋېتو ھوقۇقىنى بىكار قىلغاندىن كېيىن، ئايلارچە داۋاملاشقان مۇزاكىرىلەر نەتىجىسىدە ھاسىل بولغان بۇ كېلىشىمنىڭ ئىشقا ئېشىشىدا تۈركىيەنىڭ ئەڭ كۈچلۈك قوللىغۇچىلىرىدىن بىرى بولدى.
