پاكىستان ۋە ھىندىستان دۆلەت مۇداپىئە مىنىستىرلىرىنىڭ ئۆتكەن ئاي كەشمىردە يۈز بەرگەن ھەربىي جىددىيچىلىكتىن بۇيان تۇنجى قېتىم يۈزتۇرانە كۆرۈشۈشى مۆلچەرلەنمەكتە. جەنۇبىي ئاسىيانىڭ يادرو قورالىغا ئىگە رەقىبلىرى شاڭخەي ھەمكارلىق تەشكىلاتى (ش ھ ت) نىڭ خىتاينىڭ شەرقىدە ئۆتكۈزۈلىدىغان ئىككى كۈنلۈك باشلىقلار يىغىنى دائىرىسىدە بىر يەرگە جەم بولىدۇ.
چارشەنبە كۈنى چىڭداۋدا باشلىنىدىغان يىغىنغا خىتاي دۆلەت مۇداپىئە مىنىستىرى ئادمىرال دوڭ جۈن ساھىبخانلىق قىلىدۇ. خىتاي دۆلەت مۇداپىئە مىنىستىرلىقىنىڭ باياناتىغا ئاساسلانغاندا، بۇ پائالىيەت بولۇپمۇ ئوتتۇرا شەرقتىكى كۈچىيىۋاتقان رايونلۇق جىددىيچىلىكلەر شارائىتىدا ئېلىپ بېرىلماقتا.
پاكىستان ۋەكىللەر ئۆمىكىگە دۆلەت مۇداپىئە مىنىستىرى خاۋاجا مۇھەممەد ئاسىف رەھبەرلىك قىلىدۇ. ھىندىستان دۆلەت مۇداپىئە مىنىستىرى راجنات سىنگى بولسا يۇقىرى دەرىجىلىك بىر ھەيئەت بىلەن باشلىقلار يىغىنىغا قاتنىشىدۇ ھەمدە خىتاي، رۇسىيە ۋە باشقا قاتناشقۇچى دۆلەتلەرنىڭ ئالاقىدار ئەمەلدارلىرى بىلەن ئىككى تەرەپلىك سۆھبەتلەرنى ئۆتكۈزىدۇ.
2025-يىلى مايدا كەشمىر رايونىدا يۈز بەرگەن ھەربىي توقۇنۇشتىن بۇيان، ئىككى يادرو قوراللىق قوشنا دۆلەت ئوتتۇرىسىدىكى مۇناسىۋەتلەر جىددىي ھالەتتە تۇرماقتا. شاڭخەي ھەمكارلىق تەشكىلاتى باشلىقلار يىغىنى دىققىتىنى رايونلۇق ۋە يەرشارى خاراكتېرلىك بىخەتەرلىك، تېررورلۇققا قارشى تۇرۇش ھەمكارلىقى ۋە ئەزا دۆلەتلەر ئوتتۇرىسىدىكى ھەربىي ماسلىشىش قاتارلىق مەسىلىلەرگە مەركەزلەشتۈرىدۇ.
نۆۋەتچى رەئىسلىك ۋەزىپىسىنى ئۆتەۋاتقان خىتاي يىغىننىڭ «ھەربىي جەھەتتىكى ئۆزئارا ئىشەنچنى مۇستەھكەملەش ۋە چوڭقۇرلاشتۇرۇش» ھەمدە «رايوننىڭ تىنچلىقى ۋە مۇقىملىقىنى قوغداش» مەقسىتىدە ئۆتكۈزۈلگەنلىكىنى بىلدۈردى.
2001-يىلى قۇرۇلغان شاڭخەي ھەمكارلىق تەشكىلاتى خىتاي، رۇسىيە، ھىندىستان، پاكىستان، ئىران، قازاقىستان، قىرغىزىستان، ئۆزبېكىستان، تاجىكىستان ۋە بېلارۇسىيەنى ئۆز ئىچىگە ئالىدۇ. تەشكىلاتنىڭ رايونلۇق تېررورلۇققا قارشى تۇرۇش ئاپپاراتى (RATS) تەشكىلاتنىڭ ئاساسلىق بىخەتەرلىك ئورگانلىرىنىڭ بىرى دەپ قارىلىدۇ.
ئىگىلىنىشىچە، خىتاينىڭ بۇ يىلقى نۆۋەتچى رەئىسلىك تېمىسى «شاڭخەي روھىنى نامايان قىلىش: شاڭخەي ھەمكارلىق تەشكىلاتى ھەرىكەتتە» دەپ بېكىتىلگەن.
