سەيشەنبە كۈنى گىرېتسىيەنىڭ غەربىي تىراكيا رايونىدىكى ئىسكەچە شەھىرىدە ياشايدىغان تۈرك ئاز سانلىقلارغا تەۋە مەكتەپنىڭ ھاۋالە ھەيئىتى، ئەزالىرىنىڭ مەكتەپكە كىرىشىنىڭ توسۇپ قېلىنغانلىقىغا قارشى نارازىلىق نامايىشى ئۆتكۈزدى.
غەربىي تىراكيادىكى ئىسكەچە ئاز سانلىقلار ئوتتۇرا مەكتىپى-تولۇق ئوتتۇرا مەكتىپى ھاۋالە ھەيئىتى بايانات ئېلان قىلىپ، يازلىق تەتىلدە رېمونت قىلىش جەريانىدا ئىشخانىلىرىنىڭ بىكارلانغانلىقىنى بىلدۈردى.
باياناتتا: «ھازىر بىز ھاۋالە ھەيئىتىنىڭ ئەزالىرى بولۇش سۈپىتىمىز بىلەن ئۆزىمىز باشقۇرۇۋاتقان مەكتەپكە كىرەلمەيۋاتىمىز. مەكتەپ مەسئۇللىرىنىڭ مەكتەپكە كىرىشىگە يول قويۇلمايۋاتىدۇ» دېيىلگەن.
باياناتتا، بۇ ھەرىكەتنىڭ مائارىپ مىنىستىرلىقىنىڭ يوليورۇقى بىلەن ئېلىپ بېرىلغانلىقى، بۇنىڭ «ئاشكارا باستۇرۇش، دېموكراتىيەگە ۋە قانۇنغا خىلاپ مۇداخىلە» ئىكەنلىكى قەيت قىلىندى.
غەربىي تىراكيادىكى ئاز سانلىقلار مەكتەپلىرىنىڭ قانۇنلۇق باشقۇرغۇچىلىرىنىڭ ھاۋالە ھەيئىتى ئىكەنلىكى تەكىتلەندى.
باياناتتا يەنە مۇنداق دېيىلدى: «قانۇنلاردا بەلگىلەنگەن ۋەزىپە ۋە مەسئۇلىيەتلىرىنى ئادا قىلىشقا تېگىشلىك بولغان ھاۋالە ھەيئىتى سۈنئىي پەيدا قىلىنغان توسالغۇلار ئارقىلىق شاللىنىۋېتىلمەكچى بولۇۋاتىدۇ. ھاۋالە ھەيئىتىنىڭ ئورگان سالاھىيىتى يوقىتىلماقچى بولۇۋاتىدۇ. بىز بۇنى ھەرگىز قوبۇل قىلالمايمىز.»
ئوقۇغۇچىلارنى مەكتەپتىن زېرىكتۈرۈش ئۇرۇنۇشى
ھاۋالە ھەيئىتى لوزان كېلىشىمى دائىرىسىدە ئوخشاش قانۇنىي ئورۇنغا ئىگە بولغان ئىستانبۇلدىكى رۇم ئاز سانلىقلار مەكتەپلىرىدىمۇ مۇشۇنىڭغا ئوخشاش بىر قىلمىشنىڭ بار-يوقلۇقىنى سورىدى.
ھاۋالە ھەيئىتى باياناتىدا: «بىز ئوقۇغۇچىلارنىڭ مەكتەپتىن يىراقلىشىشىنى مەقسەت قىلغان پىكىرلەردىن خەۋەردار. قانداق ئەھۋال ئاستىدا بولۇشىدىن قەتئىينەزەر، مەكتىپىمىزگە ۋە پەرزەنتلىرىمىزگە داۋاملىق ئىگە چىقىمىز» دېگەن ئىبارىلەرگە ئورۇن بەردى.
بارلىق مۇناسىۋەتلىك ئورگانلارغا خىتاب قىلىنغان باياناتتا: «لوزان كېلىشىمى بىلەن ئورنى بېكىتىلگەن ئاز سانلىقلار مەكتەپلىرىنىڭ ئالاھىدىلىكى ۋە روھىغا ئۇيغۇن قارارلارنىڭ چىقىرىلىشى، قانۇنغا ۋە دېموكراتىك قىممەت قاراشلارغا ئۇيغۇن ھەرىكەت قىلىنىشى كېرەك. بىز ئىسكەچە ئاز سانلىقلار ئوتتۇرا مەكتىپى ۋە تولۇق ئوتتۇرا مەكتىپى ھاۋالە ھەيئىتىنىڭ ئاۋازىغا قۇلاق سېلىنىشىنى كۈتىمىز» دېيىلدى.
