تۈركىيە جۇمھۇرىيىتى مۇئاۋىن جۇمھۇر رەئىسى جەۋدەت يىلماز تۈركىيە بىلەن شىمالىي قىبرىس تۈرك جۇمھۇرىيىتىنىڭ ھەمكارلىقنى ئىلگىرى سۈرۈشنى داۋاملاشتۇرىدىغانلىقىنى ۋە مارت ئېيىنىڭ ئاخىرىغىچە يېڭى بىر ئىقتىسادىي كېلىشىمنى نەتىجىلەندۈرىدىغانلىقىنى ئېيتتى. پورت، تاشيول ۋە ئۇل ئەسلىھە خىزمەتلىرىنى ئۆز ئىچىگە ئالغان يېڭى بىر ئىقتىسادىي ۋە مالىيە ھەمكارلىق رامكىسى ئۈستىدە خىزمەتلەر داۋاملاشماقتا.
يىلماز: «بىزنىڭ مەقسىتىمىز ئوچۇق ۋە ئېنىقتۇر. بىز شىمالىي قىبرىس تۈرك جۇمھۇرىيىتىنى تېخىمۇ باي-باياشات، كۈچلۈك ئەتىلەرگە ئېلىپ بېرىشنى خالايمىز» دېدى. تۈركىيە بىلەن شىمالىي قىبرىس تۈرك جۇمھۇرىيىتى ئارىسىدىكى مۇناسىۋەتلەرنىڭ «ئادەتتىكى مۇناسىۋەتلەر ئەمەسلىكى»نى تەكىتلىگەن يىلماز، كاپالەتچى دۆلەت سۈپىتىدە تۈركىيەنىڭ شىمالىي قىبرىس تۈرك جۇمھۇرىيىتىنىڭ يېنىدا تۇرۇشنى داۋاملاشتۇرىدىغانلىقىنى سۆزلىرىگە ئىلاۋە قىلدى. مۇئاۋىن جۇمھۇر رەئىس قىبرىس مەسىلىسىگە قارىتا، ھەر قانداق بىر ھەل قىلىش چارىسىنىڭ ئارالنىڭ رېئاللىقلىرىغا، «ئىككى دۆلەت ۋە ئىككى خەلق» ۋە ئىگىلىك ھوقۇقتا باراۋەرلىك پرىنسىپلىرىغا ئاساسلىنىشى كېرەكلىكىنى بىلدۈردى.
شىمالىي قىبرىس تۈرك جۇمھۇرىيىتى باش مىنىستىرى ئۈنال ئۈستئەل بولسا، گىرېتسىيە، ئىسرائىلىيە ۋە جەنۇبىي قىبرىس رۇم ھاكىمىيىتى ئارىسىدا ئىمزالانغان مۇداپىئە كېلىشىمىگە ئىشارەت قىلىپ، قىبرىس تۈركلىرىنىڭ يالغۇز ئەمەسلىكىنى تەكىتلىدى. ئۈستئەل: «نېمە قىلسا قىلسۇن. بىزمۇ كۈنى كەلگەندە ئۇلارغا ئوخشاش شىددەت بىلەن ۋە ئوخشاش شەكىلدە جاۋاب قايتۇرىدىغانلىقىمىزدىن ھېچقانداق گۇمانىمىز يوق» دېدى ھەمدە ئارالدا ئىككى خەلق ۋە ئىككى دۆلەت بارلىقىنى يەنە بىر قېتىم ئەسكەرتتى.
