غەززە خەلقىنىڭ ئاساسىي ئېھتىياجىنى قامداش تىرىشچانلىقلىرى دائىرىسىدە تەخمىنەن 900 توننا ئىنسانپەرۋەرلىك ياردەم بۇيۇملىرىنى ئېلىپ ماڭغان 17-«ساخاۋەت كېمىسى» سەيشەنبە كۈنى تۈركىيەنىڭ جەنۇبىدىكى مەرسىن خەلقئارا پورتىدىن مىسىرنىڭ ئەلئەرىش پورتىغا قاراپ يولغا چىقتى.

ئاپەت ۋە جىددىي ئىشلارغا تاقابىل تۇرۇش ئىدارىسى _ ئافادنىڭ ماسلاشتۇرۇشى، مىسىر قىزىل ئاي جەمئىيىتىنىڭ ھەمكارلىقىشىشى سايىسىدا ئورۇنلاشتۇرۇلغان بۇ قېتىملىق ياردەم ئەۋەتىش پائالىيىتى، 17 ئاممىۋى تەشكىلاتنىڭ ئىئانىسى بىلەن ئەمەلگە ئاشۇرۇلدى.

ياردەم بۇيۇملىرى غەززەگە ئەڭ يېقىن پورت بولغان مىسىرنىڭ ئەلئەرىش پورتى ئارقىلىق كەرەم ئەبۇ سالىم چېگرا ئېغىزىغا يەتكۈزۈلىدۇ.

غەززە خەلقىنىڭ ئاساسىي ئېھتىياجىنى قاندۇرۇش مەقسىتىدە تەييارلانغان ياردەم پوسۇلكىلىرىنىڭ ئىچىدە، تەييار يېمەكلىكلەر، كونسېرۋالار ۋە بوۋاقلار سۈت پاراشوكى قاتارلىقلار بار.

مەرسىن پورتىدا ئۆتكۈزۈلگەن ئۇزىتىش مۇراسىمىدا سۆز قىلغان ئىچكى ئىشلار مىنىستىرى ئەلى يەرلىكايا مۇنداق دېدى: «بۈگۈن بىز ‹ساخاۋەت كېمىسى غەززە يولىدا› دەۋاتىمىز. 900 توننا يېمەك-ئىچمەك، كونسېرۋا ۋە بوۋاقلار سۈت پاراشوكى قاچىلانغان ‹ئاقدېڭىز› ناملىق كېمىمىز ئىنشائاللاھ غەززە ئۈچۈن يولغا چىقىدۇ.»

تۈركىيە ئىسرائىلىيەنىڭ 2023-يىلى 7-ئۆكتەبىردە غەززەگە قاراتقان ئىرقىي قىرغىنچىلىق خاراكتېرلىك ھۇجۇملىرى باشلانغاندىن بۇيان، ئافادنىڭ ماسلاشتۇرۇشى ئاستىدا، رايونغا 16 كېمە ۋە 14 ئايروپىلان ئارقىلىق ئىنسانپەرۋەرلىك ياردەم بۇيۇملىرىنى يەتكۈزدى.

ئامېرىكا پىرېزىدېنتى دونالد ترامپنىڭ 67 مىڭدىن ئارتۇق پەلەستىنلىكنىڭ ھاياتىدىن ئايرىلىشىغا ۋە رايوننىڭ خارابىلىشىشىگە سەۋەب بولغان ئۇرۇشنى مەڭگۈلۈك ئاخىرلاشتۇرۇش پىلانى دائىرىسىدە، ئۆتكەن ھەپتە غەززەدە ئۇرۇش توختىتىش ھاسىل قىلىندى.