ئىستانبۇل- دەمەشىق نۆۋەتچى ئايروپىلانىنى يولغا قويغان AJetيېقىندا ئەنقەرە-دەمەشىق لىنىيەسىنىمۇ ئىشقا سالدى.
ئەسەدتىن كېيىنكى دەۋردە ئىستانبۇل سابىھا گۆكچەن خەلقئارا ئايرودۇرۇمىدىن سۈرىيەنىڭ پايتەختى دەمەشىققە قىلىنغان تۇنجى نۆۋەتچى ئايروپىلان سەپىرى تاماملاندى.
AJet تەرىپىدىن بېرىلگەن باياناتقا ئاساسلانغاندا، ئوتتۇرا شەرقنىڭ مۇھىم مەركەزلىرىدىن بىرى بولغان دەمەشىققە سابىھا گۆكچەن ئايرودۇرۇمىدىن ھەر كۈنى بېرىپ-كېلىدىغان نۆۋەتچى ئايروپىلان سەپەرلىرى باشلاندى.
بۇنىڭ بىلەن 13 يىلدىن كېيىن AJet ئىستانبۇل سابىھا گۆكچەندىن دەمەشىققە نۆۋەتچى ئايروپىلان ئۇچۇرغان تۇنجى ئاۋىياتسىيە شىركىتى بولۇپ قالدى.
ئىككى سائەت داۋاملاشقان ئۇچۇشتىن كېيىن، يولۇچىلار دەمەشىق خەلقئارا ئايرودۇرۇمىدا مۇراسىم بىلەن كۈتۈۋېلىندى.
AJet نىڭ باش دىرېكتورى كەرەم سارپ دەمەشىقتىكى كۈتۈۋېلىش مۇراسىمىدا سۆز قىلىپ، تۈركىيە ئاۋىياتسىيە شىركىتىدىن قالسىلا 13 يىل ئۆتۈپ تۈركىيەدىن دەمەشىققە نۆۋەتچى ئايروپىلان ئۇچۇرغان تۇنجى ئاۋىياتسىيە شىركىتى بولغانلىقىدىن پەخىرلىنىدىغانلىقىنى ئېيتتى.
سارپ سۆزىنى مۇنداق داۋاملاشتۇردى: «بۈگۈن ئىستانبۇلدىن دەمەشىققە تۇنجى سەپىرىمىزنى قىلدۇق. 4-ئىيۇل جۈمە كۈنى ئەنقەرەدىن دەمەشىققە تۇنجى بىۋاسىتە ئۇچۇشىمىزنى ئەمەلگە ئاشۇرىمىز» دېدى.
ئۇ يەنە بۇنىڭ بىلەن AJet نىڭ ئۇزۇن يىللاردىن كېيىن ئەنقەرەدىن دەمەشىققە بىۋاسىتە نۆۋەتچى ئايروپىلان ئۇچۇرغان تۇنجى ئاۋىياتسىيە شىركىتى بولىدىغانلىقىنىمۇ قوشۇمچە قىلدى.
«بۇنىڭدىن كېيىن AJet بولۇش سۈپىتىمىز بىلەن ھەپتىنىڭ ھەر كۈنى ئىستانبۇلدىن، 3 كۈنى بولسا ئەنقەرەدىن دەمەشىق خەلقئارا ئايرودۇرۇمىغا قوش يۆنىلىشلىك سەپەرلىرىمىز بولىدۇ» دېدى.
ئۇ سۈرىيەدىكى يېڭى دەۋر بىلەن بىرگە رايوندا تىنچلىق ۋە مۇقىملىققا يۈزلەنگەن ئۆزگىرىشلەرنىڭ يېڭى لىنىيەنىڭ ئەھمىيىتىنى يەنە بىر قېتىم نامايان قىلغانلىقىنى تەكىتلەپ، ئوتتۇرا شەرقنىڭ قەدىمكى شەھەرلىرىدىن بىرى بولغان دەمەشىققە بىۋاسىتە ئۇچۇشلارنىڭ سۈرىيەنىڭ ئەسلىگە كېلىش جەريانىدا ئىنسانىي ۋە سودا مۇناسىۋەتلىرىنىڭ جانلىنىشىغا ۋە قېرىنداشلىقنىڭ مۇستەھكەملىنىشىگە ياردەم بېرىدىغانلىقىنى سۆزىگە قوشۇمچە قىلدى.
AJet نىڭ 34 دۆلەتتىكى جەمئىي 59 نۇقتىغا نۆۋەتچى ئايروپىلان ئۇچۇرىدىغانلىقىنى بىلدۈرگەن سارپ، دەمەشىق سەپەرلىرىنىڭمۇ قوشۇلۇشى بىلەن ياۋروپا، ئوتتۇرا شەرق، ئوتتۇرا ئاسىيا ۋە شىمالىي ئافرىقىدا كېڭىيىش نىشانلىرىنى داۋاملاشتۇرۇشتا قەتئىي ئىرادىگە ئىگە ئىكەنلىكلىرىنى سۆزىگە قوشۇمچە قىلدى.
