قىرغىزىستان ھۆكۈمىتى خىتاينىڭ قىرغىزىستان پۇقرالىرى ئۈچۈن ۋىزا رەسمىيىتىنى قولايلاشتۇرۇش قارارىنى قىزغىن قارشى ئالىدىغانلىقىنى بىلدۈردى. پىرېزىدېنت مەھكىمىسى تاشقى سىياسەت ئىشلىرى ئىشخانىسىنىڭ باشلىقى ساغىنبەك ئابدۇمۇتالىپ، خىتاينىڭ قىرغىزىستاننى 10 كۈنلۈك ۋىزىسىز ئۆتۈش پىروگراممىسىغا كىرگۈزگەنلىكىنى ئەسكەرتتى.
ئابدۇمۇتالىپنىڭ بىلدۈرۈشىچە، 20-ئاۋغۇستتىن باشلاپ قىرغىزىستان پۇقرالىرى 10 كۈنگىچە ۋىزىسىز ھالدا خىتايغا كىرەلەيدۇ. بىراق بۇ پۇرسەتتىن پايدىلىنىش ئۈچۈن ئۈچىنچى بىر دۆلەت ياكى رايونغا ئۆتۈش شەرتى قويۇلغان. ئۇ بۇ ھەقتە ھەققىدە توختىلىپ: «ئەگەر بىر قىرغىزىستان پۇقراسى ۋىزىسىز ھالدا بېيجىڭ، شاڭخەي ياكى خىتاينىڭ باشقا بىر شەھىرىگە بارماقچى بولسا، شۇ شەھەرگە بېرىش بېلىتى بىلەن بىرگە، ئۈچىنچى بىر دۆلەت ئارقىلىق قىرغىزىستانغا قايتىش بېلىتىنى ساتىۋېلىشى كۇپايە. مەسىلەن، شاڭخەي – ئالمۇتا – بىشكەك ياكى بېيجىڭ – تاشكەنت – ئوش لىنىيەلىرىدىن پايدىلانسا بولىدۇ» دېدى.
ئابدۇمۇتالىپ يەنە، خىتاي تەرەپنىڭ قىرغىزىستان پۇقرالىرىغا دۆلەتنىڭ جەنۇبىدىكى خەينەن ئارىلىغا 30 كۈنگىچە ۋىزىسىز كىرىش رۇخسىتى بەرگەنلىكىنى ئۇقتۇردى. خىتاي پۇقرالىرىنىڭ قىرغىزىستانغا كىرىشىدە بولسا ۋىزى تۈزۈمى داۋاملاشماقتا.
بۇ قارارنىڭ ئىككى تەرەپلىك مۇناسىۋەتكە تۆھپە قوشىدىغانلىقىنى تەكىتلىگەن ئابدۇمۇتالىپ: «خىتاي تەرەپنىڭ بۇ قارارى، ئىككى تەرەپلىك ھەمكارلىقنىڭ يۇقىرى سەۋىيەدە ئىكەنلىكىنىڭ ئىسپاتىدۇر. بۇ قارارنىڭ سودا ۋە ساياھەت ساھەسىدىكى ھەمكارلىقنىڭ تەرەققىياتى ئۈچۈن قولايلىق يارىتىپ بېرىدىغانلىقىغا ئىشىنىمەن» دېدى.
