ئاكسىيوس تورىغا سۆز قىلغان ئىسمى ئاشكارىلانمىغان ئامېرىكالىق ئەمەلدارنىڭ بىلدۈرۈشىچە، ۋىتكوف بۈگۈن رۇسىيەنىڭ سانكت پېتېربۇرگ شەھىرىدە پۇتىن بىلەن كۆرۈشىدۇ. ترامپنىڭ كۈيئوغلى جارېد كۇشنېر كۆرۈشۈشكە تور ئارقىلىق قاتنىشىدۇ.
ئەمەلدار ۋىتكوفنىڭ 2022-يىلى فېۋرالدىن بۇيان داۋاملىشىۋاتقان ئۇرۇشنى ئاخىرلاشتۇرۇشقا دائىر يېڭىلانغان تەكلىپنى پۇتىنغا سۇنىدىغانلىقىنى ئېيتتى. ئۇ يېڭى تەكلىپنىڭ بىۋاسىتە ئۈچ تەرەپلىك ۋە تېخىمۇ كەڭ كۆلەملىك كۆپ تەرەپلىك مۇزاكىرىلەرگە يول ئېچىشىنى ئۈمىد قىلىدىغانلىقىنى بىلدۈردى.
ئۇنىڭ ئېيتىشىچە، تۈنۈگۈن نورۋېگىيەدە ئۆتكۈزۈلگەن كۆرۈشۈشتە ئۇرۇشنى ئاخىرلاشتۇرۇشقا دائىر بىر «رامكا كېلىشىمى» ئۈچۈن ئورتاق تەكلىپ تۈزۈشكە ئەھمىيەت بېرىلگەن. ئۇكرائىنا يېڭى پىكىر ۋە تەكلىپلەرنى سۇنغان، كېيىنكى قەدەملەر ھەققىدىكى خىزمەت دەرىجىلىك مۇزاكىرىلەردە «كۈچلۈك ئورتاق تونۇش» ھاسىل قىلىنغان.
ۋىتكوف تۈنۈگۈن ئوسلودا ئۇكرائىنا پىرېزىدېنتى ۋولۇدىمىر زېلېنىسكىي، نورۋېگىيە باش مىنىستىرى يوناس گار ستۆرې، شۇنداقلا ئەنگلىيە، فىرانسىيە، گېرمانىيە ۋە پولشادىن تەركىب تاپقان E4 گۇرۇپپىسى، ياۋروپا ئىتتىپاقى ۋە شىمالىي ئاتلانتىك ئەھدى تەشكىلاتى — ناتو ۋەكىللىرى بىلەن كۆرۈشكەن ئىدى.
ترامپ ئىلگىرى زېلېنىسكىينىڭ رۇسىيە بىلەن كېلىشىم ھاسىل قىلىدىغان ۋاقتىنىڭ كەلگەنلىكىنى ئېيتىپ: «ئامېرىكا ئۇكرائىنا ئۈچۈن ناھايىتى زور مەبلەغ سەرپ قىلدى، ياۋروپامۇ شۇنداق قىلدى. ياۋروپا ھازىر بۇنىڭدىن بىزار بولدى» دېگەنىدى.
