جۇمھۇر رەئىس ئەردوغان ئىسرائىلىيەنىڭ ئىرانغا قىلغان ھۇجۇملىرىنى «ئوچۇق-ئاشكارا ئىغۋاگەرچىلىك» دەپ ئاتىدى.
جۇمھۇر رەئىس ئەردوغان جۈمە كۈنى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا مۇنداق دېدى:
«ئىسرائىلىيە رايونىمىزنى – بولۇپمۇ غەززەنى – قان، كۆز يېشى ۋە مۇقىمسىزلىق پاتقىقىغا پاتۇرۇپ قويۇش ئىستراتېگىيەسىنى بۈگۈن ئەتىگەن ناھايىتى خەتەرلىك پەللىگە يەتكۈزدى.»
ئەردوغان قوشنا دۆلەت ئىرانغا قارىتىلغان ھۇجۇملارنى «خەلقئارا قانۇننى دەپسەندە قىلىدىغان ئوچۇق-ئاشكارا ئىغۋاگەرچىلىك» دەپ ئاتاپ، بۇ ھۇجۇملارنىڭ يادرو سۆھبەتلىرى مۇھىم بىر باسقۇچقا يەتكەن ۋە ئىسرائىلىيەنىڭ غەززەدىكى ھەربىي ھەرىكەتلىرىگە قارشى خەلقئارالىق بېسىم كۈچەيگەن بىر ۋاقىتتا يۈز بەرگەنلىكىنىڭ دىققەت قوزغايدىغانلىقىنى تەكىتلەپ مۇنداق دېدى:
«بۇ ھۇجۇملار نېتانياھۇ ھاكىمىيىتىنىڭ قانۇنغا ھۆرمەت ھەم رىئايە قىلمايدىغانلىقىنىڭ ئەڭ روشەن نامايەندىسىدۇر.
ئىسرائىلىيەنىڭ پەرۋاسىز ۋە تاجاۋۇزچىلىق ئېڭى رايون ھەم پۈتكۈل دۇنيانى بالايىئاپەتكە ئىتتىرمەكتە.»
«قوشنىمىز ئىرانغا قىلىنغان خائىنلارچە ھۇجۇملارنى قاتتىق ئەيىپلەيمىز»
جۇمھۇر رەئىس ئەردوغان خەلقئارا جەمئىيەتكە چاقىرىق قىلىپ مۇنداق دېدى:
«خەلقئارا جەمئىيەت رايونلۇق ۋە يەر شارى خاراكتېرلىك مۇقىملىققا تەھدىت سېلىۋاتقان ئىسرائىلىيەنىڭ قانۇنغا ھۆرمەت ھەم رىئايە قىلماسلىقتەك ھەرىكەتلىرىگە دەرھال خاتىمە بېرىشى كېرەك. نېتانياھۇ ۋە ئۇنىڭ ئىرقىي قىرغىنچى شايكىسىنىڭ رايوننى ئۇرۇش ئوتىغا ئىتتىرىۋاتقان ھۇجۇملىرى دەرھال توختىتىلىشى كېرەك.»
ئوتتۇرا شەرقتىكى بارغانسېرى يامانلىشىۋاتقان جىددىيلىك ئالدىدا تۈركىيەنىڭ مەيدانىنىڭ ناھايىتى ئېنىق ئىكەنلىكىنى يەنە بىر قېتىم تەكىتلىگەن ئەردوغان مۇنداق دەپ كۆرسەتتى:
«يەنە بىر قېتىم جاكارلايمىزكى؛ ئوتتۇرا شەرقتە تېخىمۇ كۆپ قان تۆكۈلۈشىنى، تېخىمۇ كۆپ ۋەيرانچىلىقنى ۋە توقۇنۇشلارنى خالىمايمىز.
تۈركىيە بولۇش سۈپىتىمىز بىلەن، قوشنىمىز ئىرانغا قارىتىلغان خائىنلارچە ھۇجۇملارنى قاتتىق ئەيىپلەيمىز؛ ھۇجۇملاردا ھاياتىدىن ئايرىلغانلارغا ئاللاھتىن رەھمەت، يارىلانغانلارغا شىپالىق تىلەيمىز، دوست ۋە قېرىنداش دۆلەت ئىران خەلقىگە تەزىيە بىلدۈرىمىز.»
