ئامېرىكا قوشما ئىشتاتلىرى بىلەن ئىسرائىلىيە-ئىران ئۇرۇشىغا ئەگىشىپ بېنزىن باھاسىدىكى تېز ئۆرلەش ئامېرىكالىقلارنىڭ كۈندىلىك تۇرمۇشىغا بىۋاسىتە تەسىر كۆرسىتىشكە باشلىدى.

ۋاشىنگتون پوچتىسى، ABC News ۋە Ipsos تەرىپىدىن ئېلىپ بېرىلغان راي سىناشقا ئاساسلانغاندا، ئامېرىكالىقلارنىڭ %44 ى يۇقىرى باھا سەۋەبىدىن ئاپتوموبىلنى ئاز ھەيدەيدىغانلىقىنى، %42 ى بولسا ئائىلە چىقىملىرىنى قىسقارتقانلىقىنى بىلدۈرگەن. قاتناشقۇچىلارنىڭ %34 ى يەنە ساياھەت ۋە تەتىل پىلانلىرىنى ئۆزگەرتكەنلىكىنى ئىپادىلىگەن.

ئامېرىكا ئاپتوموبىل جەمئىيىتىنىڭ سانلىق مەلۇماتلىرىغا قارىغاندا، مەملىكەت مىقياسىدا ئوتتۇرىچە بېنزىن باھاسى ھەر گاللونى 4.43 دوللارغا ئۆرلىگەن. بۇ سان ئۆتكەن يىلىنىڭ ئوخشاش مەزگىلىدىكى 3.15 دوللارلىق سەۋىيەدىن خېلىلا يۇقىرى.

ئېنېرگىيە بازىرى سانلىق مەلۇماتلىرىنى كۆزىتىدىغان GasBuddy نىڭ نېفىت ئانالىزچىسى پاترىك دې خائان، نۆۋەتتىكى سەۋىيەنىڭ «ئەندىشە قىلارلىق بىر رېكورت» ئىكەنلىكىنى بىلدۈرۈپ، باھانىڭ ئالدىمىزدىكى ھەپتىلەردە تېخىمۇ ئۆرلىشى مۇمكىنلىكى ھەققىدە ئاگاھلاندۇرۇش بەردى.

ئاق ساراينىڭ پوزىتسىيەسى بولسا، بۇ ئۆرلەشنىڭ ۋاقىتلىق ئىكەنلىكىنى ئىلگىرى سۈرمەكتە. باياناتچى تايلور روجېرس باھانىڭ ئۆرلەپ كېتىشىنى «قىسقا مۇددەتلىك ئوڭۇشسىزلىقلار» دەپ تەسۋىرلەپ، ھۆرمۈز بوغۇزىدىكى دېڭىز قاتنىشىنىڭ ئەسلىگە كېلىشى بىلەن ئېنېرگىيە تەننەرخىنىڭ تۆۋەنلەيدىغانلىقىنى ئېيتتى.

بىراق جامائەت پىكىرى باشقىچە ئويلىماقتا. كۇيننىپىئاك ئۇنىۋېرسىتېتى تەرىپىدىن ئېلىپ بېرىلغان راي سىناشقا ئاساسلانغاندا، سايلىغۇچىلارنىڭ تەخمىنەن %65 ى يۇقىرى بېنزىن باھاسى ئۈچۈن ترامپنى قىسمەن ياكى تولۇق مەسئۇل دەپ قارايدۇ.

يەنە بىر تەرەپتىن ترامپ پارلامېنتقا بەرگەن باياناتىدا، ئامېرىكانىڭ 7-ئاپرېلدىن بۇيان ئىران بىلەن بىۋاسىتە توقۇنۇشقا كىرمىگەنلىكىنى بىلدۈرۈپ، دۈشمەنلىكنىڭ ئاخىرلاشقانلىقىنى ئىلگىرى سۈردى. ئەمما ھەپتە ئاخىرى قىلغان سۆزلىرىدە ئىران تەرەپتىن كەلگەن يېڭى تىنچلىق پىلانىنى مۇزاكىرىلىشىۋاتقانلىقىنى، شۇنداق بولسىمۇ تېھراننىڭ «يېتەرلىك بەدەل تۆلىمىگەنلىكىنى» ئويلايدىغانلىقىنى ئىپادىلىدى.

ترامپ يەنە، «ئىران قايتىدىن خاتا بىر قەدەم باسقان» ئەھۋالىدا ھەربىي مۇداخىلە ئېھتىماللىقىنىڭ ئۈستەل ئۈستىدە ئىكەنلىكىنىمۇ تىلغا ئالدى.