سايلام كومىتېتى ئومۇمىي خەلق رېفېراندۇمغا قاتنىشىش نىسبىتىنىڭ %73.12 بولغانلىقىنى بىلدۈردى.
مەركىزىي سايلام كومىتېتى دۈشەنبە كۈنى ئېلان قىلغان باياناتىدا، قازاقىستاندىكى يېڭى ئاساسىي قانۇننىڭ %87.15 ئاۋاز بىلەن قوبۇل قىلىنغانلىقىنى قەيت قىلدى.
كومىتېت رېفېراندۇمغا قاتنىشىش نىسبىتىنىڭ بولسا %73.12 بولغانلىقىنى ئاشكارىلىدى.
دۆلەتنىڭ پارلامېنت تۈزۈلمىسىنى ئاددىيلاشتۇرىدىغان يېڭى ئاساسىي قانۇن، 1996-يىلى ئەمەلدىن قالدۇرۇلغان مۇئاۋىن پىرېزىدېنتلىق مەنسىپىنى قايتىدىن تەسىس قىلدى. بۇ قانۇن پىرېزىدېنتقا مۇئاۋىن پىرېزىدېنتنى ۋە باشقا نۇرغۇن مۇھىم ئەمەلدارلارنى تەيىنلەش ھوقۇقىنى بېرىدۇ.
ئاساسىي قانۇننىڭ تېز سۈرئەتتە تەييارلىنىشى، قازاقىستاندىكى بەزى مۇتەخەسسىسلەرنىڭ «پىرېزىدېنت قاسىم جۆمەرت توقايېۋ بىر مۇئاۋىن پىرېزىدېنتنى ئۆزىنىڭ ۋارىسى قىلىپ تەيىنلەپ، ۋەزىپىسىدىن بالدۇر ئايرىلىشنى ياكى يېڭى ئاساسىي قانۇن ئارقىلىق ۋەزىپە ئۆتەش مۇددىتى چەكلىمىسىنى نۆلگە چۈشۈرۈپ ۋەزىپىسىدە قېلىشنى پىلانلاۋاتىدۇ» دەپ پەرەز قىلىشىغا يول ئاچتى.
توقايېۋ پايتەخت ئاستانىدا ئاۋاز بەرگەندىن كېيىن، ئاساسىي قانۇننىڭ ھوقۇق ئۆتكۈزۈپ بېرىشنى ئاسانلاشتۇرىدىغان-ئاسانلاشتۇرمايدىغانلىقى ھەققىدە توختىلىپ، كېيىنكى پىرېزىدېنتلىق سايلىمىنىڭ ئۆزىنىڭ ۋەزىپە مۇددىتى ئاخىرلىشىدىغان 2029-يىلى ئۆتكۈزۈلىدىغانلىقىنى ئېيتتى.
