ترامپ: يادرو پىروگراممىسىنى قايتا باشلىسا ئامېرىكا ئىرانغا يەنە ھۇجۇم قىلىدۇ

 ئامېرىكا قوشما ئىشتاتلىرى پىرېزىدېنتى دونالد ترامپ ئىيۇن ئېيىدا زەربە بەرگەن ئىران يادرو پىروگراممىسى قايتىدىن ئىشقا كىرىشتۈرۈلگەن تەقدىردە، ئامېرىكانىڭ ئىرانغا قارشى تېزلىكتە يېڭى ھۇجۇملارنى باشلايدىغانلىقى بىلەن تەھدىت سالدى.

دۈشەنبە كۈنى فلورىدادىكى مار-ئا-لاگو قورۇسىدا بېنيامىن نېتانياھۇنى كۈتۈۋېلىش جەريانىدا مۇخبىرلارغا بايانات بەرگەن ترامپ: «ئىراننىڭ قايتىدىن كۈچىيىشكە ئۇرۇنۇۋاتقانلىقىنى ئاڭلاۋاتىمەن، ئەگەر شۇنداق بولسا، ئۇلارنى توختىتىشىمىز كېرەك. ئۇلارغا ئەجەللىك زەربە بېرىمىز» دېدى.

 ترامپ يەنە بۇ ھەقتە ئىران بىلەن سۆھبەتلىشىش ئىشىكىنىڭ ئوچۇق ئىكەنلىكىنى، بۇ ھەقتە بىر «كېلىشىم» تۈزۈشنىڭ «تېخىمۇ ئاقىلانە» بولىدىغانلىقىنى بىلدۈرۈپ: «بىلىسىلەر، ئالدىنقى قېتىم بىز ئۇلارغا كەڭ كۆلەملىك ھۇجۇم قىلىشتىن بۇرۇن، ئۇلار كېلىشىم ھاسىل قىلالايتتى» دېدى.

ئالدىنقى يىلى يازدا يادرو سۆھبەتلىرى داۋاملىشىۋاتقان مەزگىلدە، ترامپ ئىسرائىلىيەنى ئىرانغا ھۇجۇم قىلماسلىققا چاقىرغان ئىدى. ئىسرائىلىيە بۇنىڭغا قارىماي، ھېچقانداق ئىغۋاگەرچىلىك بولمىغان ئەھۋالدا ئىرانغا ھۇجۇم قىلغان، بۇ ئەھۋال ئامېرىكانىڭ فوردو، ناتانز ۋە ئىسفاھاندىكى ئىران يادرو ئەسلىھەلىرىگە زەربە بېرىشى بىلەن ئاخىرلاشقان 12 كۈنلۈك بىر توقۇنۇشنى كەلتۈرۈپ چىقارغان ئىدى.