ھىندونېزىيە 426 مىليون دوللار قىممىتىدىكى  مېتافېتامىن ۋە كوكايىن توشۇۋاتقان پاراخوتنى قولغا چۈشۈردى.

ھىندونېزىيە دېڭىز ئارمىيەسىنىڭ جۈمە كۈنى ئېلان قىلغان باياناتىدا بىلدۈرۈلۈشىچە، بۇ ھەپتە سۇماترا دېڭىز ساھىللىرى ئەتراپىدا 426 مىليون دوللار قىممىتىدىكى تەخمىنەن ئىككى توننا مېتامفېتامىن ۋە كوكايىن توشۇۋاتقان بىر پاراخوت قولغا چۈشۈرۈلگەن، پاراخوتتىكى بىر تايلاند پۇقراسى ۋە تۆت بىرما پۇقراسى قولغا ئېلىنغان. 

باياناتتا تەكىتلىنىشىچە، دائىرىلەر پاراخوتنى چىراغلىرىنى ئۆچۈرۈپ ۋە سۈرئىتىنى تېزلىتىپ، رىئاۋ ئاراللىرى ئۆلكىسىدىكى تانجۇڭ بالاي كارىمۇن رايونىدا ھىندونېزىيە دېڭىز تەۋەلىكىدىن قېچىشقا ئۇرۇنغان ۋاقىتتا قولغا چۈشكەنلىكىنى بىلدۈرگەن. 

ھىندونېزىيە دېڭىز ئارمىيەسى باياناتچىسى ئى مادې ۋىرا خادىي ئارسانتا ۋاردخانانىڭ بىلدۈرۈشىچە، تەخمىنەن 1.2 توننا كوكايىن ۋە 705 كىلوگىرام مېتامفېتامىننى ئۆز ئىچىگە ئالغان 100 گە يېقىن سېرىق ۋە ئاق خالتا قولغا چۈشۈرۈلگەن بولۇپ، بۇ زەھەرلىك چېكىملەرنىڭ قىممىتى 7 تىرىليون رۇپىيە (425 مىليون 920 مىڭ دوللار) ئىكەن.

تايلاند بايرىقى ئېسىلغان پاراخوت تانجۇڭ بالاي كارىمۇن رايونىدىكى دېڭىز ئارمىيەسى بازىسىغا ئېلىپ كېتىلگەن بولۇپ، پاراخوت خادىملىرىنىڭ مىللىتىدىن باشقا قايسى دۆلەتنىڭ پۇقراسى ئىكەنلىكى توغرىسىدا ھېچقانداق مەلۇمات بېرىلمىگەن. 

ھىندىستان دېڭىز ئارمىيەسى ئەمەلدارى فاۋزى مۇخبىرلارنى كۈتۈۋېلىش يىغىنىدا قىلغان سۆزىدە، زەھەرلىك چېكىملىكلەرنىڭ قەيەردىن كەلگەنلىكى ۋە پاراخوتنىڭ قەيەرگە كېتىۋاتقانلىقى توغرىسىدىكى تەكشۈرۈشنىڭ داۋاملىشىۋاتقانلىقىنى ئېيتتى. بۇنىڭ ھىندونېزىيەنىڭ ئەڭ چوڭ زەھەرلىك ھېكىملىككە قارشى ھەرىكەتلىرىدىن بىرى ئىكەنلىكىنى تەكىتلىدى. 

بىرلەشكەن دۆلەتلەر تەشكىلاتى زەھەرلىك چېكىملىك ​​ۋە جىنايى ئىشلار ئىشخانىسىنىڭ 2024-يىلدىكى دوكلاتىغا قارىغاندا، 2023-يىلى شەرقىي ۋە شەرقىي جەنۇبىدىكى ئاسىيادا تەشكىللىك جىنايەت گۇرۇھلىرىنىڭ قانۇن ئىجرا قىلىشنىڭ سۇسلىقىدىن پايدىلىنىپ ئەتكەسچىلىك قىلىشى نەتىجىسىدە 190 توننا مېتامفېتامىن قولغا چۈشۈرۈلگەن.

ئىگىلىنىشىچە، بۇ جىنايەتلەرنىڭ كۆپىنچىسى تايلاند قولتۇقى ئارقىلىق سادىر قىلىنىدىكەن. 

«ئالتۇن ئۈچ بۈرجەك» دەپ ئاتىلىدىغان، بىرمانىڭ شەرقىي شىمالى بىلەن تايلاند ۋە لائوسنى بىر - بىرىگە تۇتاشتۇرىدىغان بۇ رايوننىڭ زەھەرلىك چېكىملىك ​​ئىشلەپچىقىرىش تارىخى ناھايىتى ئۇزۇن. بۇ رايوندىكى زەھەرلىك چېكىملىكلەر ئادەتتە ئاسىيا جىنايەت گۇرۇھلىرى تەرىپىدىن ياپونىيە ۋە يېڭى زېلاندىيەگىچە تارقىتىلىدۇ.

بىرلەشكەن دۆلەتلەر تەشكىلاتى زەھەرلىك چېكىملىك ​​ئورگىنىنىڭ 2023-يىلى ئېلان قىلغان يەر شارى خاراكتېرلىك كوكايىن دوكلاتىغا قارىغاندا، 2022-يىلى جاۋا ئارىلىدىكى مېراك پورتى ئەتراپىدىكى دېڭىز تەۋەلىكىدە 179 كىلوگىرام كوكايىن قولغا چۈشۈرۈلگەن بولۇپ، بۇ ئەينى ۋاقىتتىكى ھىندونېزىيەنىڭ ئەڭ چوڭ كوكايىن قولغا چۈشۈرۈش ھەرىكىتى ئىكەن.

(1 ئامېرىكا دوللىرى = 16,435.0000 رۇپىيە)