ھىندىستان خىتاي يېڭىدىن قۇرغانلىقىنى جاكارلىغان خوتەن ۋىلايىتى قارمىقىدىكى ئىككى ناھىيەنىڭ دۆلەتنىڭ چېگراسىنى دەپسەندە قىلغانلىقىنى ئوتتۇرىغا قويدى ۋە خىتاينىڭ بۇ قەدىمىگە «قانۇنسىز ئىشغال قىلىش» دەپ باھا بەردى.
«ھىندۇستان تايمىس» گېزىتىنىڭ خەۋىرىگە قارىغاندا، ھىندىستان تاشقى ئىشلار مىنىستىرلىقىنىڭ باياناتچىسى راندھىر جايسۋال بايانات ئېلان قىلىپ، ئۇيغۇر ئاپتونوم رايونىنىڭ خوتەن ۋىلايىتىگە قاراشلىق ئىككى يېڭى ناھىيە قۇرغانلىقىنى جاكارلىغان خىتايغا نارازىلىق بىلدۈرگەن.
يېڭى دېھلىنىڭ خىتايغا دىپلوماتىك قاناللار ئارقىلىق «نارازىلىق»ىنى بىلدۈرگەنلىكىگە ئىشارەت قىلغان جايسۋال، «ئاتالمىش» ناھىيەلەرنىڭ بىر قىسمىنىڭ ھىندىستاننىڭ كونتروللۇقىدىكى لاداخ رايونىنىمۇ ئۆز ئىچىگە ئالىدىغانلىقىنى ۋە بۇنىڭ دۆلەت چېگراسىنى دەپسەندە قىلغانلىق بولىدىغانلىقىنى ئەسكەرتىپ: «ھىندىستان خىتاينىڭ رايوندىكى ھىندىستان زېمىنىنى قانۇنسىز ئىشغال قىلىشىنى ھەرگىز قوبۇل قىلمايدۇ» دېدى.
خىتاي 27-دېكابىردا ئۇيغۇر ئىلىنىڭ خوتەن ۋىلايىتى قارمىقىدا خېئەن ۋە خېكاڭ ئىسىملىك ئىككى يېڭى ناھىيە قۇرغانلىقىنى جاكارلىغانىدى.
خىتاي بىلەن ھىندىستان ئارىسىدىكى ھىمالايا تاغلىرى بىلەن قورشالغان ئېنىقسىز چېگرا لىنىيەسى، دۆلەتلەر ئارىسىدا ئىگىلىك ھوقۇقى تالاش-تارتىشلىرىغا سەۋەب بولماقتا. ئۆستەڭ-دەريالار، كۆللەر، مۇز تاغلىرى ۋە قارلىق چوققىلار بار 3 مىڭ 500 كىلومېتىرلىق چېگرا، ھازىرغىچە تەرەپلەرنى كۆپ قېتىم ئۆزئارا دۇقۇرۇشۇشقا ئېلىپ كەلگەنىدى.
