ئىسرائىلىيەنى «رەزىل» ۋە «ئىنسانىيەتنىڭ لەنىتى» دەپ سۈپەتلىگەن پاكىستان مۇداپىئە مىنىستىرى خاۋاجا مۇھەممەد ئاسىف، ئامېرىكا بىلەن ئىران ئوتتۇرىسىدىكى تىنچلىق سۆھبىتى ئىسلامئابادتا داۋاملىشىۋاتقان بىر پەيتتە، تېل ئاۋىۋنىڭ لىۋاندا «ئىرقىي قىرغىنچىلىق» ئېلىپ بېرىۋاتقانلىقىنى بىلدۈردى.
خاۋاجا مۇھەممەد ئاسىف ئامېرىكا بىلەن ئىراننىڭ ۋاقىتلىق ئۇرۇش توختىتىش توغرىسىدا كېلىشىشىنىڭ ئارقىسىدىنلا، ئىسرائىلىيەنىڭ لىۋانغا بومبا ياغدۇرۇپ، 10 مىنۇت ئىچىدە 300 دىن ئارتۇق لىۋانلىقنى ئۆلتۈرگەنلىكى ۋە 1200 گە يېقىن ئادەمنى يارىلاندۇرغانلىقىنى قاتتىق ئەيىبلىدى.
ئاسىف پەيشەنبە كۈنى X تە ھەمبەھرىلىگەن ئۇچۇرىدا: «ئىسرائىلىيە رەزىللىكتۇر ۋە ئىنسانىيەت ئۈچۈن بىر لەنەتتۇر؛ ئىسلامئابادتا تىنچلىق سۆھبىتى داۋاملىشىۋاتقان بىر پەيتتە، لىۋاندا ئىرقىي قىرغىنچىلىق ئېلىپ بېرىلماقتا. بىگۇناھ پۇقرالار ئىسرائىلىيە تەرىپىدىن ئۆلتۈرۈلمەكتە؛ ئاۋۋال غەززە، ئاندىن ئىران، ئەمدى بولسا لىۋان؛ قان توختىماي تۆكۈلۈۋاتىدۇ» دېگەنلەرنى قەيت قىلدى.
پاكىستان مۇداپىئە مىنىستىرى سۆزىنى داۋاملاشتۇرۇپ: «ياۋروپالىق يەھۇدىيلاردىن قۇتۇلۇش ئۈچۈن پەلەستىن تۇپراقلىرىدا بۇ راكسىمان دۆلەتنى قۇرغانلارنىڭ جەھەننەمدە كۆيۈپ كېتىشىنى ئۈمىد قىلىمەن ۋە شۇنىڭ ئۈچۈن دۇئا قىلىمەن» دېدى.
ئىران بۇ ھەپتە، ئامېرىكا پىرېزىدېنتى دونالد ترامپنىڭ دۆلەتنى يوقىتىش تەھدىتلىرىدىن كېيىن، پاكىستاننىڭ ۋاسىتە قىلىشى بىلەن ئامېرىكا بىلەن ئىككى ھەپتىلىك نازۇك ئۇرۇش توختىتىش كېلىشىمىنى قوبۇل قىلغان ئىدى. ئامېرىكا ۋە ئىران ئەمەلدارلىرىنىڭ شەنبە كۈنى، بۇ ھالقىلىق ئۇرۇش توختىتىشنى ئەمەلگە ئاشۇرغان ۋە مەخپىي سۆھبەتلەرگە ساھىبخانلىق قىلغان ئىسلامئابادتا مۇزاكىرە ئۈچۈن جەم بولۇشى پىلانلانماقتا.
بىراق ئىسرائىلىيە ئۇرۇش توختىتىش ئېلان قىلىنغانلىقىنىڭ ئارقىسىدىنلا، لىۋاندىكى 100 دىن ئارتۇق رايوننى بومباردىمان قىلىپ، 1990-يىلىدىكى ئىچكى ئۇرۇش ئاخىرلاشقاندىن بۇيانقى ئەڭ ئېغىر قىرغىنچىلىقلارنىڭ بىرىنى ئېلىپ باردى. يەرلىك تاراتقۇلارنىڭ خەۋەر قىلىشىچە، كۆپىنچىسى پۇقرالارنى زەربە ئوبيېكتى قىلغان بۇ ھۇجۇملاردىن غەزەپلەنگەن پاكىستان، قىرغىنچىلىقنى دەرھال توختىتىشنى تەلەپ قىلدى ۋە ئىسرائىلىيەنىڭ ئامېرىكا-ئىران سۆھبىتىگە بۇزغۇنچىلىق قىلىش ئېھتىماللىقى ھەققىدە ئاگاھلاندۇردى.
ئىسلامئاباد بىلەن تېھران لىۋاننىڭ ئامېرىكا-ئىران ئۇرۇش توختىتىش كېلىشىمىنىڭ بىر قىسمى ئىكەنلىكىنى ئىلگىرى سۈرۈۋاتقان بولسىمۇ، ئىسرائىلىيە بىلەن ئامېرىكا بۇنى رەت قىلماقتا. بېيرۇت بولسا پاكىستاندىن لىۋاننىڭ مەزكۇر كېلىشىم دائىرىسىدە قېلىشىغا كاپالەتلىك قىلىشنى تەلەپ قىلدى.
بۇنىڭغا جاۋابەن نېتانياھۇ ئىشخانىسى: «ئىسرائىلىيەنى يوقىتىش چاقىرىقى ئىنتايىن قەبىھلىكتۇر. بۇ، تەرەپسىز ئىكەنلىكىنى دەۋا قىلىۋاتقان بىر ھۆكۈمەتتىن سادىر بولسا قوبۇل قىلغىلى بولمايدىغان بىر باياناتتۇر»، دېدى. ئىسرائىلىيە تاشقى ئىشلار مىنىستىرى گىدېئون سائار: «يەھۇدىي دۆلىتىنى <راك> دەپ سۈپەتلەش، ئەمەلىيەتتە ئۇنىڭ يوقىلىشىنى تەلەپ قىلغانلىقتۇر. ئىسرائىلىيە ئۆزىنى يوقىتىشقا قەسەم ئىچكەن تېررورچىلارغا قارشى ئۆزىنى قوغدايدۇ» دېدى.
