ھىندونېزىيە دۆلەت مۇداپىئە مىنىستىرى سىجافرى سىجەمسۇددىن ھىندونېزىيەنىڭ غەززەگە ئورۇنلاشتۇرۇش ئۈچۈن 20 مىڭ ئەسكەرنى تەييار قىلغانلىقىنى ئېيتتى.

ھىندونېزىيە ئانتارا خەۋەر ئاگېنتلىقىنىڭ خەۋىرىگە قارىغاندا، سىجافرى مۇخبىرلارغا بۇ قىسىمغا داۋالاش ئەترىتى ۋە ئىنژېنېرلارنىڭمۇ كىرگۈزۈلگەنلىكىنى، زۆرۈر خەلقئارالىق تەستىقلارغا ئېرىشكەندىن كېيىن ئورۇنلاشتۇرۇلۇشى مۇمكىنلىكىنى ئېيتقان.

مىنىستىر سىجافرى جاكارتانىڭ ئەسكەر ئەۋەتىش تەستىقى ئۈچۈن ئىككى خىل يولنىڭ بارلىقىنى بىلدۈرۈپ،  بىرىنچىسىنىڭ «ب د ت ھىمايىسى ئاستىدا ئەۋەتىش»، ئىككىنچىسىنىڭ «ئامېرىكا پىرېزىدېنتى باشلىغان خەلقئارالىق تەشكىلاتنىڭ تەستىقى ئاستىدا ئەۋەتىش» ئىكەنلىكىنى ئېيتتى.

ئۇ يەنە، ئىككىنچى خىل تاللاشنىڭ يۇقىرى دەرىجىلىك دىپلوماتىك ئالاقە ۋە دۆلەت باشلىقلىرى ئوتتۇرىسىدىكى كېلىشىملەرنى تەلەپ قىلىدىغانلىقىنى سۆزلىرىگە ئېلاۋە قىلدى.

ئۇ: «ب د ت ھىمايىسى ئاستىدا ئەۋەتىش» ئەرەب دۆلەتلىرى، يەنى سەئۇدى ئەرەبىستان، ئىيوردانىيە، مىسىر، قاتار ۋە ئەرەب بىرلەشمە خەلىپىلىكى قوشۇلسا، ھىندونېزىيە بۇنىڭغا قاتناشقانلىقىدىن خۇشال بولىدۇ» دېدى ۋە ئىسرائىلىيەنىڭ تەستىقىنىڭمۇ مۇھىم ئىكەنلىكىنى ئەسكەرتتى.

بۇ پىلان، ئامېرىكا پىرېزىدېنتى دونالد ترامپنىڭ غەززەدىكى ئۇرۇشنى ئاخىرلاشتۇرۇش توغرىسىدىكى 20 ماددىلىق تەكلىپىنىڭ بىرىنچى باسقۇچىغا ماس كېلىدۇ. تەكلىپ بويىچە 10-ئۆكتەبىر (2025) باسقۇچلۇق ھالدا ئۇرۇش توختىتىش يولغا قويۇلغان ئىدى.

مۇناسىۋەتلىك ئۇچۇرلارTRT World - US, Türkiye, Pakistan and several Arab states urge 'swift adoption' of UN Gaza resolution

ئىيوردانىيە بىلەن ئۆزئارا ئاخبارات ئالماشتۇرۇش

سىجافرى سىجەمسۇددىننىڭ باياناتلىرى ئىيوردانىيە پادىشاھى ئابدۇللاھ II نىڭ جاكارتا زىيارىتى جەريانىدا ئېلان قىلىندى. ئىيوردانىيە پادىشاھى ئابدۇللاھ II ھىندونېزىيە پىرېزىدېنتى پرابوۋو سۇبىئانتو بىلەن كۆرۈشۈپ، غەززە مەسىلىسىنى مۇزاكىرە قىلدى.

مىنىستىر سىجافرى سىجەمسۇددىننىڭ بىلدۈرۈشىچە، ھىندونېزىيە بىلەن ئىيوردانىيە غەززەنىڭ ئەڭ يېڭى ئەھۋالى توغرىسىدا ئۆزئارا پىكىر ئالماشتۇرغان.

مىنىستىر سىجافرى سىجەمسۇددىن ئىيوردانىيە ئارمىيە قوماندانلىق ئىشتابىنىڭ باشلىقى يۇسۇف ئەھمەد ئەل-ھۇنەيتى بىلەن كۆرۈشكەندىن كېيىن، مۇنداق دېدى:

«بىز ئاخبارات ۋە يېڭى ئۇچۇرلارنى ئالماشتۇرۇش ئۈچۈن ئورتاق كومىتېت قۇرىمىز. ئىيوردانىيەنىڭ غەززەگە جۇغراپىيەلىك جەھەتتىن يېقىنلىقىنى نەزەردە تۇتقاندا، ئەھۋالنى تېخىمۇ ياخشى چۈشىنىش ئۈچۈن ئۇلار بىلەن ھەمكارلىشىشنى ئىستراتېگىيەلىك نۇقتىدىن ئەھمىيەتلىك دەپ قارايمىز.»

ئۇ جاكارتانىڭ تىنچلىق ساقلاش قىسىملىرىنى ئورۇنلاشتۇرۇشقا تەييارلىق قىلىۋاتقان بىر ۋاقىتتا، بۇ خىل ئاخباراتقا ئېھتىياجلىق ئىكەنلىكىنى تەكىتلىدى.

ئۇ يەنە، ھىندونېزىيە بىلەن ئىيوردانىيەنىڭ كەڭ كۆلەملىك مۇداپىئە ھەمكارلىقىنىڭ بىر قىسمى سۈپىتىدە، دۆلەت ئىگىلىكىدىكى قورال ئىشلەپچىقارغۇچى  «پ ت پىنداد» (PT Pindad) بىلەن ئىيوردانىيەنىڭ «چوڭقۇر ئېلېمېنت» (Deep Element)   شىركىتى ئوتتۇرىسىدا ئورنىتىلىدىغان ھەمكارلىقلار رامكىسىدا، ئۇچقۇ تېخنولوگىيەسى ئۈستىدىمۇ ھەمكارلىشىدىغانلىقىنى قەيت قىلدى.

ئۇ ئاخىرىدا، بۇنىڭ كەڭ دائىرىلىك مۇداپىئە ھەمكارلىقىنىڭ بىر پارچىسى بولىدىغانلىقىنى ئەسكەرتتى.