تاشقى ئىشلار مىنىستىرى ئۇكرائىنا بىلەن رۇسىيە ئوتتۇرىسىدا پەيشەنبە كۈنى ئىستانبۇلدا ئۆتكۈزۈلمەكچى بولغان تىنچلىق سۆھبىتىنىڭ، ئۇرۇش ھالىتىدىكى ئىككى تەرەپ ئارىسىدا يېڭى بىر سەھىپە ئېچىشىنى ئۈمىد قىلىدىغانلىقىنى بىلدۈردى.
خاقان فىدان ناتو غەيرىي رەسمىي تاشقى ئىشلار مىنىستىرلىرى يىغىنىنىڭ ئېچىلىش مۇراسىمىدا سۆز قىلىپ: «ئىككى يىلدىن ئارتۇق داۋاملاشقان ئازاب-ئوقۇبەتتىن كېيىن، بىر پۇرسەت دېرىزىسىنىڭ ئېچىلغانلىقىنى كۆرۈۋاتىمىز» دېدى.
رۇسىيە بىلەن ئۇكرائىنانىڭ تەخمىنەن ئىككى يىللىق ئۈزۈلۈشتىن كېيىن، تۇنجى قېتىم ئىستانبۇلدا بىۋاسىتە تىنچلىق سۆھبىتى ئۆتكۈزۈشى مۆلچەرلەنمەكتە. تۈركىيە بۇ قېتىممۇ ساھىبخانلىق ۋە ۋاسىتىچىلىك رولىنى ئوينىماقتا.
ئۇ يەنە ناتو ئىتتىپاقىنىڭ ئامېرىكانىڭ تېكساس ئىشىتاتىدىن تارتىپ تۈركىيە پايتەختى ئەنقەرەگىچە بولغان كەڭ جۇغراپىيەلىك رايوننى قاپلايدىغان بىر پۇختا بىخەتەرلىك سىستېمىسى بەرپا قىلىشنىڭ مۇھىملىقىنى تەكىتلىدى.
ناتونىڭ غەيرىي رەسمىي يىغىنىنىڭ ئىككىنچى كۈنى مۇخبىرلارغا سۆز قىلغان فىدان ياۋروپا-ئاتلانتىك ئوكيان رايونىدا قولغا كەلتۈرۈلگەن بىر قاتار مۇھىم ئىلگىرىلەشلەرنى تىلغا ئېلىپ ئۆتتى.
«بىز بۈگۈن ئىتتىپاقداشلار بولۇش سۈپىتىمىز بىلەن، مۇداپىئە يۈكىنى تەڭ ئۈستىگە ئېلىش مەسىلىسىنى قانداق ھەل قىلىشتىن تارتىپ، مۇداپىئە سانائىتى ئاساسىمىزنى قانداق كۈچەيتىشكىچە ۋە ئۇكرائىناغا قانداق قىلىپ تىنچلىق ئېلىپ كېلەلەيدىغانلىقىمىزغىچە بولغان مۇھىم مەسىلىلەرنى مۇزاكىرە قىلىۋاتىمىز» دېدى.
ئۇ ناتو ئىتتىپاقداشلىرى بولۇش سۈپىتى بىلەن مۇداپىئە ھەمكارلىقىنى كۈچەيتىش ۋە ئۇكرائىنادا تىنچلىقنى ئەمەلگە ئاشۇرۇش چارىلىرىنى مۇھاكىمە قىلىدىغانلىقلىرىنى بىلدۈردى.
فىدان يەنە بۇ يىغىننىڭ ئىيۇن ئېيىدا لاھەيدە ئۆتكۈزۈلىدىغان ناتو باشلىقلار يىغىنى ئۈچۈن ئاساس سالىدىغانلىقىنىمۇ سۆزلىرىگە ئىلاۋە قىلدى.
ئانتاليا ۋە ئىستانبۇلدا تەڭلا ئېلىپ بېرىلىۋاتقان بۇ دىپلوماتىك پائالىيەتلەر ئارقىلىق، تۈركىيە ناتونىڭ مۇھىم بىر ئىتتىپاقدىشى بولۇپلا قالماي، بەلكى خەلقئارالىق توقۇنۇشلارنى ھەل قىلىشتا كۈنسېرى ئېشىۋاتقان تەسىر كۈچىگە ئىگە مۇھىم دىپلوماتىيە مەركىزى سۈپىتىدە ئۆز ئورنىنى مۇستەھكەملىمەكتە.
