بىر يەرلىك ئەمەلدارنىڭ جۈمە كۈنى بىلدۈرۈشىچە، پاكىستاننىڭ غەربىي جەنۇبىدىكى بېلۇجىستان ئۆلكىسىدە كىملىكى نامەلۇم قوراللىق ئۇنسۇرلار بىر ئاپتوبۇستىن 9 يولۇچىنى تۇتقۇن قىلىپ ئېلىپ كەتكەن، كېيىن ئۆلتۈرگەن.
بۇ ۋەقە پەيشەنبە كۈنى كەچتە بېلۇجىستاننىڭ جوب ۋە لورالاي ناھىيەلىرى ئوتتۇرىسىدىكى چېگراغا جايلاشقان سۇر-داكاي رايونىدا يۈز بەرگەن. جوب ناھىيەلىك ساقچى ئىدارىنىڭ مۇئاۋىن كومىسسارى ناۋىد ئالام، مۇخبىرلارغا بەرگەن باياناتىدا، قوراللىق ئۇنسۇرلار تەرىپىدىن ئېتىپ ئۆلتۈرۈلگەن يولۇچىلارنىڭ جەسەتلىرىنىڭ كېچىچە تاغلىق رايوندا قالغانلىقىنى ئېيتتى.
«داۋن گېزىتى» نىڭ ئالاقىدار تارماقلارنى مەنبە كۆرسىتىپ خەۋەر قىلىشىچە، پەنجاپقا قاراپ كېتىۋاتقان ئىككى يولۇچىلار ئاپتوبۇسى لورالاي-جوب چېگراسىغا يېقىن داب رايونىدىكى N-70 تاشيولىغا يېقىن سۇر-داكاي رايونىدا بىر گۇرۇپپا قوراللىق ئۇنسۇرلار تەرىپىدىن توختىتىلغان. قوراللىق ئۇنسۇرلار يولنى توسۇپ، ماشىنىلارنى توختاتقان.
خەۋەردە ئەسكەرتىلىشىچە، زوراۋانلار ئاپتوبۇسلارغا چىقىپ يولۇچىلارنىڭ كىملىكلىرىنى تەكشۈرگەن ۋە 10 كىشىنى ماشىنىدىن زورلاپ چۈشۈرگەن. ھايات قالغان بىر يولۇچى لېۋېس خەۋپسىزلىك قىسىملىرىغا بەرگەن ئىپادىسىدە مۇنداق دېگەن:
«زوراۋانلار 10 يولۇچىنى سىرتقا سۆرەپ چىقاردى - بىر ئاپتوبۇستىن يەتتە، يەنە بىرىدىن 3 كىشىنى - ۋە ئۇلارنى نامەلۇم بىر جايغا ئېلىپ كەتتى. ئۇلارنىڭ ئېلىپ كەتكەن يولۇچىلارغا نېمە قىلغانلىقىنى بىلمەيمەن، ئەمما بىز ئۇ يەردىن ئايرىلىۋاتقاندا ئوق ئاۋازىنى ئاڭلىدىم.»
زوراۋانلار 9 يولۇچىنى تۇتقۇن قىلغاندىن كېيىن، ھەر ئىككى ئاپتوبۇسنىڭ رايوندىن ئايرىلىشىغا رۇخسەت قىلغان.
خەۋەرلەرگە قارىغاندا، زوراۋانلار يولۇچىلارنىڭ كىملىك كارتىلىرىنى تەكشۈرگەن ۋە بولۇپمۇ ئادرېسى پەنجاپ بولغان كىشىلەرنىڭ كىملىك كارتىلىرىنى تەكشۈرگەن بەكرەك تەكشۈرگەن. ئۇلار يەنە، تۇتقۇن قىلىش جەريانىدا باشقىلارنىڭ قېچىشىنىڭ ئالدىنى ئېلىش ئۈچۈن ئاپتوبۇسلارغا ئوق چىقارغان.
پاكىستان باش مىنىستىرى شاھباز شېرىف ۋە ئىچكى ئىشلار مىنىستىرى موھسىن ناكۋى بۇ ۋەقەنى دەلىللەپ، بۇ قەتلىئامنى قاتتىق ئەيىبلىدى.
شېرىف مۇنداق دېدى:
«گۇناھسىز كىشىلەرنىڭ قېنى ھەرگىزمۇ يەردە قالمايدۇ. گۇناھسىز پۇقرالارنى ئۆلتۈرۈش ھىندىستان قوللىغان تېررورچىلارنىڭ ئوچۇق-ئاشكارا تېررورلۇق ھەرىكىتىدۇر.»
بۇ باياناتقا ھىندىستان تەرەپ تېخىچە ھېچقانداق جاۋاب قايتۇرمىدى.
بۇ ھۇجۇمنىڭ جاۋابكارلىقىنى چەكلەنگەن گۇرۇپپا بولغان بېلۇجىستان ئازادلىق فىرونتى ئۆز ئۈستىگە ئالدى.
بۇ يىل فېۋرال ئېيىدا، تېررورچىلار بېلۇجىستاننىڭ بارخان رايونىدا كۇئېتتادىن فەيسەلئابادقا كېتىۋاتقان بىر يولۇچىلار ئاپتوبۇسىنى توختىتىپ، كەم دېگەندە 7 يولۇچىنى ئۆلتۈرگەن ئىدى. ئۆتكەن يىلى ئاۋغۇست ئېيىدا بولسا، قوراللىق ئۇنسۇرلار بېلۇجىستاننىڭ مۇساخېل ناھىيەسىدە بىرنەچچە ماشىنىدىن يولۇچىلارنى چۈشۈرۈپ، 23 كىشىنى ئۆلتۈرگەن ئىدى.
پاكىستاندا بولۇپمۇ خەيبەر پاختونخۋا ۋە بېلۇجىستان ئۆلكىلىرىدە يېقىنقى يىللاردىن بۇيان تېررورلۇق ھۇجۇملىرى كۆپىيىپ كەتتى.
مىنېرال بايلىقلىرى مول بولغان بېلۇجىستان پاكىستاننىڭ ئەڭ چوڭ ۋە ئەڭ نامرات ئۆلكىسى ھېسابلىنىدۇ. دۆلەت خەۋپسىزلىك كۈچلىرى ئۇزۇندىن بۇيان بۇ ئۆلكىنىڭ چوڭ تەرەققىياتلاردىن چەتتە قېلىۋاتقانلىقىنى ئىلگىرى سۈرۈۋاتقان بەلۇج بۆلگۈنچىلىرىنىڭ كىچىك دائىرىلىك ئىسيانلىرىغا قارشى كۈرەش قىلىپ كەلمەكتە. بۇ ئۆلكە يەنە، خىتاينىڭ ئىستراتېگىيەلىك مۇھىم ئەھمىيەتكە ئىگە ئۇيغۇر ئاپتونوم رايونىنى بېلۇجىستاننىڭ گۋادار پورتىغا تۇتاشتۇرۇشنى نىشان قىلىۋاتقان، يۈك، نېفىت ۋە تەبىئىي گاز توشۇش ئۈچۈن يوللار، تۆمۈر يوللىرى ھەم تۇرۇبا لىنىيەلىرىدىن تەركىب تاپقان 62 مىليارد دوللارلىق خىتاي-پاكىستان ئىقتىسادىي كارىدورى (CPEC) تۈرى ئۈچۈنمۇ مۇھىم بىر لىنىيە ھېسابلىنىدۇ.
