ئامېرىكا پىرېزىدېنتى دونالد ترامپ سەيشەنبە كۈنى ئامېرىكا ئارمىيەسىنىڭ 250 - يىللىقىنى تەبرىكلەش ئۈچۈن شىمالىي كارولىنادىكى فورت براگقا بارىدۇ. دونالد ترامپ شۇنىڭ بىلەن بىر ۋاقىتتا لوس ئانژېلېستىكى كۆچمەنلەر نامايىشىنى باستۇرۇش ئۈچۈن ھەربىي كۈچ ئورۇنلاشتۇرماقتا.
پېنتاگوننىڭ بىلدۈرۈشىچە، سەيشەنبە كۈنى ئۆتكۈزۈلىدىغان پائالىيەتكە دۆلەت مۇداپىئە مىنىستىرى پېت ھېگسېت ۋە قۇرۇقلۇق ئارمىيە مىنىستىرى دان درىسكولمۇ قاتنىشىدىكەن، شۇنداقلا ھەربىي خادىملار، پېشقەدەم ئەسكەرلەر ۋە ئۇلارنىڭ ئائىلە-تاۋابىئاتلىرىمۇ ئىشتىراك قىلىدىكەن.
بۇ زىيارەت ئارمىيەنىڭ رەسمىي تۇغۇلغان كۈنىنى باشلاش پائالىيىتى دائىرىسىدە، ئەسكەرلەر ۋە ھەربىي ئائىلىلەر بىلەن كۆرۈشۈش، شۇنداقلا مەشىق پائالىيەتلىرى ۋە باشقا پىلانلانغان پائالىيەتلەرنى كۆزىتىشنى ئۆز ئىچىگە ئالىدىكەن.
شىمالىي كارولىنانىڭ فايېتتېۋىل شەھىرىگە يېقىن جايلاشقان فورت براگ، ئامېرىكا ئارمىيەسى ئالاھىدە ھەرىكەت قوماندانلىق ئىشتابىنىڭ مەركىزى سۈپىتىدە خىزمەت قىلماقتا. «يېشىل بەرەلىكلەر» ۋە «رازۋېدچىكلار» قىسمى قاتارلىق يۇقىرى سەۋىيەدە تەربىيەلەنگەن قىسىملار شۇ يەرگە جايلاشقان.
نامايىشلار كۈچىيىشىگە ئەگىشىپ مىڭلىغان ئەسكەر ئورۇنلاشتۇرۇلدى
ترامپ شەنبە كۈنى ئۆزىنىڭ 79 ياشقا كىرگەن تۇغۇلغان كۈنىدە، ۋاشىنگتوندا ھەربىي پارات ئۆتكۈزۈشنىڭ سەۋەبى سۈپىتىدە ئارمىيەنىڭ خاتىرە يىللىقىنى تەشۋىق قىلدى. جۇمھۇرىيەتچىلەر پارتىيەسىدىن بولغان پىرېزىدېنتنىڭ بۇ يىل ئاقسارايغا قايتىپ كەلگەندىن كېيىن قوراللىق قىسىملارنى قانداق قايتا شەكىللەندۈرۈۋاتقانلىقىنىڭ نامايەندىسى سۈپىتىدە، تانكىلار ۋە باشقا ھەربىي ماشىنىلار شەھەر كوچىلىرىدىن ئۆتىدۇ.
ترامپ كالىفورنىيە ئىشتاتىنىڭ دېموكراتلار پارتىيەسىدىن بولغان ۋالىيسى گاۋىن نيۇسومنىڭ قارشىلىقىغا قارىماي، 4000 دۆلەت مۇھاپىزەت ئەترىتى ئەسكىرىنى شەھەرگە ئورۇنلاشتۇرۇشقا ئىجازەت بەردى. كۆچمەنلەرنى تۇتۇش ھەرىكىتىگە قارشى باشلانغان مالىمانچىلىقنى تىنجىتىش ئۈچۈن تەخمىنەن 700 دېڭىز ئارمىيەسى پىيادە ئەسكەرلىرىمۇ رەسمىي ھالدا لوس ئانژېلېسقا ئورۇنلاشتۇرۇلىدىغان بولدى.
كالىفورنىيە ھەربىي كۈچ ئورۇنلاشتۇرغانلىقى ئۈچۈن ترامپنى سوتقا ئەرز قىلدى
كالىفورنىيە ھەربىي كۈچ ئورۇنلاشتۇرۇلغانلىقى سەۋەبلىك ترامپنى سوتقا ئەرز قىلدى، ئىشتات باش تەپتىشى پىرېزىدېنتنىڭ ئىشتاتنىڭ ئىگىلىك ھوقۇقىنى «دەپسەندە قىلغانلىقىنى» ئىلگىرى سۈردى. كالىفورنىيە رەھبەرلىرى ترامپنى نامايىشچىلارنىڭ غەزىپىنى قوزغاپ، ئاممىنىڭ ئاساسلىق تاشيولنى توسۇۋېلىشىغا ۋە شوپۇرسىز ماشىنىلارغا ئوت قويۇشىغا سەۋەبچى بولدى دەپ ئەيىبلىدى.
ترامپ ھەپتە ئاخىرىدا: «بىز ھەممە يەرگە ئەسكەر ئورۇنلاشتۇرىمىز. بىز بۇنداق ئىشلارنىڭ دۆلىتىمىزدە يۈز بېرىشىگە يول قويمايمىز» دېدى.
فورت براگ مەدەنىيەت جەھەتتىكى ھەربىي تالاش-تارتىشنىڭ مەركىزىدە بولۇپ كەلمەكتە. ئۇنىڭغا ئەسلىدە بىر ئىتتىپاقداش گېنېرالنىڭ ئىسمى بېرىلگەن، ئاندىن ئىككى يىل ئىلگىرى «ئەركىنلىك قورغىنى» دەپ ئۆزگەرتىلگەن. ھېگسېت «براگ» نامىنى ئەسلىگە كەلتۈرگەن، ئەمما ئۇنىڭ ئىككىنچى دۇنيا ئۇرۇشىغا قاتناشقان بىر ئارمىيە پاراشۇتچىسىنى ھۆرمەتلەش ئۈچۈن ئىشلىتىلىۋاتقانلىقىنى ئېيتقان.
