قاتار باش مىنىستىرى ئال سانى: «تۈنۈگۈن ئوتتۇرىغا قويۇلغان پىلان پىرىنسىپلارنى ئۆز ئىچىگە ئالغان بولۇپ، بۇلارنىڭ قانداق ئەمەلىيلەشتۈرۈلىدىغانلىقىنى مۇزاكىرە قىلىش كېرەك» دېدى.
قاتار باش مىنىستىرى مۇھەممەد بىن ئابدۇراھمان بىن جاسىم بىن جابىر ئال سانى، ئامېرىكا پىرېزىدېنتى دونالد ترامپنىڭ غەززە پىلانىدىكى بەزى مەسىلىلەرنى «ئايدىڭلاشتۇرۇش ۋە مۇزاكىرە قىلىش»نىڭ زۆرۈرلۈكىنى ئېيتتى.
ئۇ دوھادىكى «ئەلجەزىرە» تېلېۋىزىيەسىنىڭ زىيارىتىنى قوبۇل قىلغاندا مۇنداق دېدى: «ترامپ ئوتتۇرىغا قويغان پىلان ئۇرۇشنى ئاخىرلاشتۇرۇش ئارقىلىق مۇھىم بىر نىشانغا يېتىدۇ، ئەمما ئايدىڭلاشتۇرۇش ۋە مۇزاكىرە قىلىشقا توغرا كېلىدىغان بەزى مەسىلىلەر بار. بىز ھەممەيلەننىڭ بۇ پىلانغا ئىجابىي پوزىتسىيەدە بولۇپ، ئۇرۇشنى ئاخىرلاشتۇرۇش پۇرسىتىنى چىڭ تۇتۇشىنى ئۈمىد قىلىمىز».
قاتار باش مىنىستىرى دوھانىڭ ھازىرغىچە پەلەستىن ئىسلامىي قارشىلىق كۆرسىتىش ھەرىكىتى — ھاماسنىڭ پىلانغا قاراتقان ئىنكاسىنى تاپشۇرۇۋالمىغانلىقىنى بىلدۈردى.
ئال سانى پەلەستىن تەرەپنىڭ ئىنكاسى ھەققىدە توختىلىپ: «بىز ھازىرچە ھاماسنىڭ پىلانغا قايتۇرىدىغان ئىنكاسىنى بىلمەيمىز، شۇنداقلا بۇ ئىنكاس پەلەستىنلىك باشقا گۇرۇپپىلار بىلەن كېلىشىم ھاسىل قىلغان ئاساستا بولۇشى كېرەك» دېدى.
شەيخ مۇھەممەد ئال سانى، ۋاسىتىچى دۆلەتلەر قاتار ۋە مىسىرنىڭ دۈشەنبە كۈنى ئۆتكۈزۈلگەن يىغىندا ھاماسقا ئاساسلىق نىشانلىرىنىڭ ئۇرۇشنى توختىتىش ئىكەنلىكىنى ئېنىق كۆرسەتكەنلىكىنى ئېيتتى.
ئۇ: «قاتارنىڭ ھازىرقى ئاساسلىق دىققەت مەركىزى غەززەدىكى پەلەستىنلىكلەرنىڭ ئازاب-ئوقۇبەتلىرىگە خاتىمە بېرىش» دېگەندىن كېيىن، دۆلىتىنىڭ ئالدىنقى ۋەزىپىسىنىڭ «غەززەدىكى ئۇرۇش، ئاچارچىلىق، ئۆلۈم ۋە كۆچۈشكە خاتىمە بېرىش» ئىكەنلىكىنى قەيت قىلدى.
ئۇ يەنە: «تۈنۈگۈن ئوتتۇرىغا قويۇلغانلار پىلاننىڭ پىرىنسىپلىرى بولۇپ، ئۇنىڭ تەپسىلاتلىرىنى ۋە قانداق ئەمەلىيلەشتۈرۈلىدىغانلىقىنى مۇزاكىرە قىلىش كېرەك» دېگەنلەرنى سۆزلىرىگە ئىلاۋە قىلدى.
قاتار باش مىنىستىرى، ئەرەب ۋە ئىسلام دۆلەتلىرىنىڭ «پەلەستىنلىكلەرنىڭ ئۆز زېمىنىدا قېلىشىنى ۋە ئىككى دۆلەت شەكلىدىكى ھەل قىلىش چارىسىنى ئەمەلگە ئاشۇرۇشىنى كاپالەتلەندۈرۈش ئۈچۈن پۈتۈن كۈچى بىلەن تىرىشىۋاتقانلىقى»نى بىلدۈردى.
باش مىنىستىر ئال سانى سۆزىنى مۇنداق ئاخىرلاشتۇردى: «ھازىرقى باسقۇچ مۇھىم بولۇپ، مۇكەممەل نەتىجە بېرىشى ناتايىن بولغان مۇزاكىرىلەرنىڭ بىر قىسمىدۇر. ھازىرقى يولنى ئاساس قىلىپ، ئۇنى تېخىمۇ ئۈنۈملۈك ۋە مۇۋەپپەقىيەتلىك ھالغا كەلتۈرۈش كېرەك».
