ئامېرىكا پىرېزىدېنتى دونالد ترامپ پۈتۈن دۇنيادىكى كاتولىك چېركاۋىنىڭ رەھبىرى پاپا 14-لېيوغا ھۇجۇم قىلىپ، تۇنجى ئامېرىكالىق پاپانىڭ «ئاشقۇن سولچىلارغا يېقىنچىلىق قىلىشنى توختىتىشى» كېرەكلىكىنى بىلدۈردى.

ترامپنىڭ دۇنيادىكى تەسىرى ئەڭ كۈچلۈك ۋە كاتولىك چېركاۋىنىڭ دۇنياۋى رەھبىرى پاپا 14-لېيو ھەققىدە ئېلان قىلغان ھۇجۇم خاراكتېرلىك باياناتى، ئىران ئۇرۇشى سەۋەبىدىن باشلانغان ئۆچمەنلىكنى تېخىمۇ ئەۋج ئالدۇرۇۋەتتى.

ئامېرىكا پىرېزىدېنتى ترامپ ئاممىۋى ئورتاقلىشىش تور بېتى X سەھىپىسىدە: «پاپا لېيو جىنايەت مەسىلىسىدە ئاجىز، تاشقى سىياسەت مەسىلىسىدە بولسا بەك ناچار» دەپ ئۇچۇر ئېلان قىلدى. كوپ ئۆتمەي، يەكشەنبە كۈنى پىرېزىدېنت ئايروپىلانى «ئامېرىكا ھاۋا ئارمىيەسى 1-نومۇرلۇق ئايروپىلانى» بىلەن قونغان ئاندرېۋس قوشما بازىسىدا (Joint Base Andrews) مۇخبىرلارغا: «ئۇنىڭ ناھايىتى ياخشى خىزمەت قىلىۋاتقانلىقىغا ئىشەنمەيمەن. مەن پاپا لېيونىڭ مەستانىسى ئەمەس، مەن ئىراننىڭ يادرو قوراللىرىغا ئىگە بولۇشىنى مەسىلە ئەمەس دەپ قارايدىغان پاپانى خالىمايمەن» دېدى.

«ھەممىگە قادىرلىق تۇيغۇسى»

ترامپنىڭ بۇ باياناتى پاپا لېيونىڭ ھەپتە ئاخىرىدا ئامېرىكا-ئىسرائىلىيەنىڭ ئىران بىلەن بولغان ئۇرۇشىنى ئەۋج ئالدۇرۇۋاتقان «ھەممىگە قادىرلىق تۇيغۇسى» نى قاتتىق ئەيىبلىشىدىن ۋە سىياسىي رەھبەرلەرنىڭ تىنچلىق سۆھبىتى ئۆتكۈزۈشىنى تەلەپ قىلىشىدىن كېيىن ئېلان قىلىندى.

پاپا ئامېرىكا بىلەن ئىران سەزگۈر ئۇرۇش توختىتىش مۇھىتى ئاستىدا پاكىستاندا يۈزتۇران سۆھبەتنى باشلىغان كۈنى، ئەۋلىيا ساينت پېترۇس باسىلىكا چېركاۋىدا (St. Peter's Basilica) كەچلىك دۇئا مۇراسىمىغا رىياسەتچىلىك قىلغان ئىدى.

ئامېرىكادا تۇغۇلغان پاپا دۇئاسىدا ئامېرىكا قوشما ئىشتاتلىرىنىڭ ياكى ترامپنىڭ ئىسمىنى تىلغا ئالمىغان بولسىمۇ، ئەمما ئۇنىڭ ئۇسلۇبى ۋە ئۇچۇرى ترامپ بىلەن ئامېرىكا ئەمەلدارلىرىغا قارىتىلغاندەك قىلاتتى.