ئىچكى ئىشلار مىنىستىرى ئەلى يەرلىكايا، تۈركىيەنىڭ سەيشەنبە كۈنى پايتەخت ئەنقەرە ئەتراپىدا چۈشۈپ كەتكەن ۋە لىۋىيە ئارمىيە باش ئىشتاب باشلىقى بىلەن ئايروپىلاندىكى باشقا كىشىلەر ھاياتىدىن ئايرىلغان خۇسۇسىي ئايروپىلاننىڭ خارابىلىكىدىن ئۇچۇش سانلىق مەلۇماتلىرىنى خاتىرىلىگۈچى ۋە ئۇچۇش ئۆيى ئاۋاز خاتىرىلەش ئۈسكۈنىسىنى چىقارغانلىقىنى جاكارلىدى.
چارشەنبە كۈنى مۇخبىرلارغا بايانات بەرگەن يەرلىكايا، خارابىلىكنىڭ تەخمىنەن ئۈچ كىۋادرات كىلومېتىرلىق بىر دائىرىگە تارقالغانلىقىنى بىلدۈردى.
يەرلىكايا: «قاتناش ۋە ئۇل ئەسلىھە مىنىستىرلىقى قاتناش بىخەتەرلىكىنى تەكشۈرۈش مەركىزى ئەترەتلىرى تەرىپىدىن ۋەقە يۈز بەرگەن ئورۇندا ئېلىپ بېرىلغان خىزمەتلەر نەتىجىسىدە، ھاۋا ئاپپاراتىغا ئائىت ئاۋاز خاتىرىلەش ئۈسكۈنىسى سائەت 02:45 تە، قارا قۇتا بولسا سائەت 03:20 دە خارابىلىك مەيدانىدىن تېپىلدى» دېدى.
مىنىستىر بۇ ئۈسكۈنىلەرنى تەكشۈرۈش ۋە باھالاش خىزمەتلىرىنىڭ باشلانغانلىقىنىمۇ سۆزىگە ئىلاۋە قىلدى.
يەرلىكايا؛ 408 خادىم، 103 قۇرۇقلۇق قاتناش ۋاسىتىسى ۋە 7 ھاۋا ئاپپاراتى خادىمىنىڭ ئىزدەش ۋە قۇتقۇزۇش مەشغۇلاتىدا ۋەزىپە ئۆتەۋاتقانلىقىنى بىلدۈردى.
بۇنىڭدىن باشقا، قۇربانلارنىڭ تۇغقانلىرى بىلەن لىۋىيە مۇداپىئە ۋە ئىچكى ئىشلار مىنىستىرلىقلىرىنىڭ ئەمەلدارلىرىنىمۇ ئۆز ئىچىگە ئالغان 22 كىشىلىك بىر لىۋىيە ۋەكىللەر ئۆمىكىنىڭ ئەنقەرەگە يېتىپ كەلگەنلىكىنى مۇئەييەنلەشتۈردى.
يەرلىكايا: «(ۋەقەنىڭ سەۋەبىنى) ئىنچىۆە تەلشۈرىۋاتىمىز. بۇ سانلىق مەلۇماتلار سەۋەبنى ئاشكارىلايدۇ ۋە ئەمەلدارلار ئېرىشكەن نەتىجىلەرنى سىلەر بىلەن ئورتاقلىشىدۇ» دېدى.
ۋەقەنى «پاجىئەلىك بىر ۋەقە» دەپ تەسۋىرلىگەن مىنىستىر؛ قۇربانلارنىڭ ئائىلە-تاۋابىئاتلىرىغا، لىۋىيە ھۆكۈمىتىگە ۋە خەلقىگە تەزىيە بىلدۈردى.
ئەنقەرە ئەسەنبوغا ئايرودرومىدىن تىرىپولىغا بېرىش ئۈچۈن ھاۋاغا كۆتۈرۈلگەن Falcon 50 تىپلىق تىجارەت ئايروپىلانىنىڭ خارابىلىكى، ئەنقەرەنىڭ ھايمانا ناھىيەسىگە قاراشلىق كېسىككاۋاق يېزىسىنىڭ تەخمىنەن ئىككى كىلومېتىر جەنۇبىدىن تېپىلدى.
لىۋىيە مىللىي بىرلىك ھۆكۈمىتى، يۈز بەرگەن ئۆلۈم-يېتىم ۋەقەلىرىدىن كېيىن ئۈچ كۈنلۈك مەملىكەتلىك ماتەم ئېلان قىلدى.
