شۋېتسىيە رادىيوسىنىڭ دۈشەنبە كۈنىدىكى خەۋىرىگە قارىغاندا، شۋېتسىيە دائىملىق تاماكا چەككۈچى نوپۇس نىسبىتىنى يۈزدە 5 نىڭ ئاستىغا چۈشۈرۈش نىشانىغا يېتىپ، ئەمەلىيەتتە «تاماكىسىز» دۆلەتكە ئايلانغان.
شۋېتسىيە ھاراق ۋە باشقا زەھەرلىك چېكىملىكلەر ئۇچۇر كومىتېتى، دۆلەتنىڭ 2025-يىللىق ئۇزۇن مۇددەتلىك ئاممىۋى سەھىيە نىشانىغا يەتكەنلىكىنى جەزملەشتۈردى.
كومىتېت، 1980-يىللارنىڭ باشلىرىدا شۋېتسىيەلىكلەرنىڭ يۈزدە 30 دىن ئارتۇق قىسمىنىڭ ھەر كۈنى تاماكا چەككەنلىكىنى قەيت قىلدى.
تاماكا ئىشلىتىشتىكى تۆۋەنلەش، ئاممىۋى سەھىيە سىياسەتلىرى ۋە ئۆزگىرىۋاتقان ئىجتىمائىي ئادەتلەرنىڭ تۆھپىسى بىلەن بىر قانچە ئون يىلغا يېيىلغان مۇقىم ئارقىغا چېكىنىشنى كۆرسىتىدۇ.
خەۋەردە دەموگرافىيەلىك پەرقلەرگىمۇ دىققەت تارتىلغان بولۇپ، 50-84 ياش ئارىلىقىدىكى ئاياللارنىڭ تەخمىنەن %6 لىك نىسبەت بىلەن كۈندىلىك تاماكا چەككۈچى ئەڭ چوڭ گۇرۇپپا بولۇپ كېلىۋاتقانلىقى بىلدۈرۈلدى.
يېڭى نىكوتىن مەھسۇلاتلىرىنى ئىشلىتىشنىڭ بولسا ئاخىرقى يىللاردا شىددەتلىك شەكىلدە ئاشقانلىقى، بىر نىكوتىن مەھسۇلاتى بولغان ئاق سنۇسنىڭ سېتىلىش مىقدارىنىڭ 2021-2024-يىللار ئارىسىدا يۈزدە 180، ئېلېكترونلۇق تاماكا ئىشلىتىش نىسبىتىنىڭ بولسا ئوخشاش مەزگىلدە يۈزدە 640 يۇقىرى ئۆرلىگەنلىكى ئۇقتۇرۇلدى.
تەتقىقاتچىلار، تاماكىنىڭ سالامەتلىككە بولغان تەسىرىنىڭ ياخشى بىلىنىدىغانلىقىنى، ئەمما يېڭى نىكوتىن مەھسۇلاتلىرىنىڭ تەسىرىگە ئائىت ئۇچۇرلارنىڭ ئازلىقىنى بىلدۈردى. بەزى تەتقىقاتلارنىڭ بولسا ئېلېكترونلۇق تاماكا ئىشلىتىشنىڭ بەزى ئۆپكە كېسەللىكلىرى خەۋپىنى ئاشۇرۇۋېتىشى مۇمكىنلىكىگە ئىشارەت قىلغانلىقى قەيت قىلىندى.
