تۈركىيە ئەرلەر دۆلەت ۋاسكېتبول كوماندىسى 2025-يىللىق ياۋروپا ۋاسكېتبول لەۋھە تالىشىش مۇسابىقىسىدە گېرمانىيە كوماندىسى بىلەن ئۆتكۈزۈلگەن ھاياجانلىق ھەل قىلغۇچ مۇسابىقىدىن كېيىن كۈمۈش مېدالغا ئېرىشتى.
گېرمانىيە يەكشەنبە كۈنى تۈركىيەنى 83 كە قارشى 88 نەتىجە بىلەن يېڭىپ، خەلقئارا ۋاسكېتبول بىرلەشمىسى (FIBA) ياۋروپا ۋاسكېتبول لەۋھە تالىشىش مۇسابىقىسىنىڭ چېمپىيونلۇقىنى قولغا كەلتۈردى.
رىگا تەنتەربىيە سارىيىدا ئۆتكۈزۈلگەن بۇ ھاياجانلىق مۇسابىقىدە، ھەر ئىككى دۆلەت كوماندىسى يېڭىلمەستىن ھەل قىلغۇچ مۇسابىقىگە كىرگەن بولۇپ، تۈركىيە دۆلەت كوماندىسىدىن ئالپەرەن شەنگۈن 28 نومۇر بىلەن مۇسابىقىدىكى ئەڭ يۇقىرى نومۇر ئالغان توپچى بولدى.
بىرىنچى چارەك 22 گە قارشى 24 نەتىجە بىلەن گېرمانىيەنىڭ ئۈستۈنلىكىدە ئاخىرلاشقان بولسا، تۈركىيە ئىككىنچى چارەكتە 16 گە قارشى24 لىك ئۈستۈنلۈكنى قولغا كەلتۈرۈپ، كۈچلۈك جاۋاب قايتۇردى.
بىرىنچى يېرىم مەيداننى 40 كە قارشى 46 نەتىجە بىلەن ئالدىدا تاماملىغان تۈركىيە دۆلەت كوماندىسى بۇ ئۈستۈنلۈكىنى ساقلاپ، مۇسابىقىنى كونترول قىلدى.
لېكىن، گېرمانىيە ئۈچىنچى چارەكتە 21 گە قارشى 26 لىك نەتىجە بىلەن قايتىدىن ئۈستۈنلۈككە ئۆتتى.
گېرمانىيە كوماندىسىدىن دەننىس شرودېر 16 نومۇر ئېلىپ، 12 قېتىم ياردەمچى پاس بېرىش ئارقىلىق قوش خانىلىق نەتىجىنى قولغا كەلتۈردى. ئىسھاق بونگا 20 نومۇر، فرانز ۋاگنېر 18 نومۇر ۋە سەككىز رېبائۇنت توپ بىلەن غەلىبىگە زور تۆھپە قوشتى.
تۈركىيە كوماندىسىدىن جەدى ئوسمان 23 نومۇر، شەين لاركىن 13 نومۇر، ئالتە رېبائۇنت توپ ۋە توققۇز ياردەمچى پاس بەردى.
ئادەم بونا بولسا دۆلەت كوماندىسى ئۈچۈن 12 نومۇر ئالدى.
خەلقئارا ۋاسكېتبول بىرلەشمىسى (FIBA) ياۋروپا ۋاسكېتبول لەۋھە تالىشىش مۇسابىقىسى تارىخىدا گېرمانىيە پەقەت ئىككىنچى قېتىم چېمپىيون بولدى.
گېرمانىيە ئەڭ چوڭ مۇۋەپپەقىيىتىنى 1993-يىلى چېمپىيون بولۇش ئارقىلىق قولغا كەلتۈرگەن بولسا، تۈركىيە ئەڭ ياخشى نەتىجىسىنى 2001-يىلى ھەل قىلغۇچ مۇسابىقىگە كىرىش ئارقىلىق ياراتتى.
گىرېتسىيە يەكشەنبە كۈنى ئوينالغان يەنە بىر مۇسابىقىدە فىنلاندىيەنى 89 گە قارشى 92 نەتىجە بىلەن يېڭىپ، مىس مېدالغا ئېرىشتى.
