جۇمھۇر رەئىس ئەردوغان ئاممىۋى ئورتاقلىشىش تور بېتىدىكى سەھىپىسىدە، «خەلقئارا پەلەستىن بىلەن ھەمنەپەس بولۇش كۈنى» مۇناسىۋىتى بىلەن بايانات ئېلان قىلدى.
ئەردوغان باياناتىدا، بېسىم، ئىشغالىيەت، زۇلۇم ۋە ئىرقىي قىرغىنچىلىققا ئۇچراۋاتقان پەلەستىنلىكلەرنىڭ ھەقلىق كۈرىشىنى داۋاملىق قوللايدىغانلىقلىرىنى ئۆز نامىدىن ۋە تۈركىيە خەلقى نامىدىن ئەڭ كۈچلۈك تۇيغۇلار بىلەن ئىپادىلەيدىغانلىقىنى قەيت قىلدى.
ئۇ، كۆپىنچىسى ئاياللار ۋە بالىلاردىن تەشكىل تاپقان 50 مىڭ مەسۇم پەلەستىنلىك شېھىت بولغان غەززەگە ئىنسانىي ياردەملەرنىڭ يېتەرلىك، بىخەتەر، داۋاملىق يەتكۈزۈلۈشىنىڭ زۆرۈرلۈكىنى تەكىتلەپ مۇنداق دېدى:
«تۈركىيە بولۇش سۈپىتىدە پەلەستىنلىك قېرىنداشلىرىمىزغا بۈگۈنگىچە 86 مىڭ توننا ئىنسانىي ياردەم ئەۋەتتۇق. قىش پەسلى كېلىشتىن بۇرۇن رايوندىكى مەزلۇملارغا قارىتىلغان ياردەملىرىمىزنى ئاشۇرۇپ داۋاملاشتۇرماقتىمىز. غەززە ئىرقىي قىرغىنچىلىقىنى يۈرگۈزگەنلەر خەلقئارالىق قانۇن - بەلگىلىمىلەر دائىرىسىدە جازالىنىشى كېرەك.
پەلەستىن-ئىسرائىلىيە مەسىلىسى ئادىل ھەل قىلىنمىغۇچە، ئوتتۇرا شەرقتە ئۇزۇن مۇددەتلىك تىنچلىق ۋە مۇقىملىقنىڭ ئورنىتىلىشى مۇمكىن ئەمەس.
خەلقئارا قانۇنغا ئاساسەن، 1967-يىلدىكى چېگرا لىنىيەلىرى ئىچىدە پايتەختى شەرقىي قۇددۇس بولغان، مۇستەقىل، ئىگىلىك ھوقۇقلۇق ۋە زېمىن پۈتۈنلۈكىگە ئىگە پەلەستىن دۆلىتىنىڭ قۇرۇلۇشى رايوندا ئادىل ۋە ئۇزۇن مۇددەتلىك تىنچلىق ئورنىتىلىشىنىڭ ئالدىنقى شەرتىدۇر.»
ئەردوغان يەنە تۈركىيەنىڭ ئادىل ۋە ئۇزۇن مۇددەتلىك تىنچلىق ئورنىتىش ھەمدە كىرىزىسنى ھەل قىلىش ئۈچۈن كەڭ دائىرىلىك ھەل قىلىش چارىسى تېپىش ئۈچۈن ھەر تۈرلۈك مەسئۇلىيەتنى ئۈستىگە ئېلىشقا تەييار ئىكەنلىكىنى، مەزلۇم پەلەستىن خەلقى ۋە ھەقلىق كۈرىشىنى تۇنجى كۈندىن باشلاپ قوللاپ كېلىۋاتقانلىقىنى، بۇنىڭدىن كېيىنمۇ شۇنداق قىلىدىغانلىقىنى، ھەتتا قوللاش پائالىيەتلىرىنى تېخىمۇ كەڭ قانات يايدۇرىدىغانلىقىنى قەيت قىلدى.
