لاۋروۋ پايتەخت موسكۋادا، موسكۋا دۆلەتلىك خەلقئارا مۇناسىۋەتلەر ئىنستىتۇتىنىڭ ئوقۇتقۇچى ۋە ئوقۇغۇچىلىرى بىلەن ئۇچراشتى.
يىغىندا سۆز قىلغان لاۋروۋ، گېرمانىيەنىڭ رۇسىيەنىڭ بوندىكى باش كونسۇلخانىسىنى تاقاش قارارى توغرىسىدا توختىلىپ: «بۇ، نېمىسلار ئالغان يىرگىنچلىك بىر قارار. بوندىكى باش كونسۇلخانىمىزنى ئاساسسىز باھانە بىلەن تاقىۋەتتى» دېدى.
لاۋروۋ يەنە ئۇكرائىنا كىرىزىسى ھەققىدىمۇ توختىلىپ: «ئۇكرائىنادىكى توقۇنۇشلار، ياۋروپادا ناتسىزىمغا ئورۇن قالدۇرمايدىغان شەكىلدە ئاخىرلىشىشى كېرەك. ئەگەر ئۇكرائىنادا ھازىرقى تۈزۈمنىڭ ھاكىمىيەتتە قېلىشىغا يول قويىدىغان بولساق، 1945-يىلى ناتسىزىمنى يەڭگەنلەرگە ئاسىيلىق قىلغان بولىمىز» دېدى.
لاۋروۋ غەرب دۆلەتلىرى بىلەن بولغان مۇناسىۋەتلەرگە ئوچۇق ئىكەنلىكىنى، ئەمما بۇ مۇناسىۋەتلەرنىڭ بۇرۇنقىدەك بولمايدىغانلىقىنى تەكىتلەپ: «ئۆتمۈشتە ۋە ھازىر بىزنى ئالدىغان غەربكە ھېچقاچان ئىشەنچ قىلغىلى بولمايدۇ» دېگەن سۆزلەرنى ئىشلەتتى.
ئىراننىڭ ۋەزىيىتى
ئامېرىكا ۋە ئىسرائىلىيەنىڭ ئوتتۇرا شەرقنىڭ بىخەتەرلىك مەسىلىسىدىكى كېڭىشىشلەرگە كىرگۈزۈلۈشى كېرەكلىكىنى بىلدۈرگەن لاۋروۋ: «ئىراننىڭمۇ پارس قولتۇقى رايونىدىكى بىخەتەرلىك سىستېمىسىغا كىرگۈزۈلۈشى، رايوندا مۇقىملىقنى ئورنىتىش نۇقتىسىدىن مۇھىم بىر قەدەم بولىدۇ» دېدى.
مىنىستىر لاۋروۋ ئىراننىڭ نۆۋەتتىكى ۋەزىيىتى سەۋەبىدىن شىمال-جەنۇب قاتناش كارىدورى تۈرىنى ئەمەلىيلەشتۈرۈشنىڭ ئاستىلىغانلىقىنى ئەسكەرتىپ: «ئەمما بۇ تۈر يەنىلا پىلانلىرىمىز ئىچىدە تۇرۇۋاتىدۇ، ئۇ چوقۇم ئەمەلىيلىشىدۇ» دېدى.
