ئامېرىكا ئارمىيەسى باياناتچىسىنىڭ بىلدۈرۈشىچە، ئامېرىكا قوشما ئىشتاتلىرى ۋە ئىسرائىلىيەنىڭ ئىرانغا قارشى ئېلىپ بېرىۋاتقان ئۇرۇشى باشلانغاندىن بۇيان، ئوتتۇرا شەرقتىكى يەتتە دۆلەتتە تەخمىنەن 200 ئامېرىكا ئەسكىرى يارلانغان.
ئامېرىكا مەركىزىي قوماندانلىق ئىشتابى (CENTCOM) باياناتچىسى كاپىتان تىم خاۋكىنس دۈشەنبە كۈنى ئېلان قىلغان باياناتىدا، بۇ يارىلىنىشلارنىڭ كۆپىنچىسىنىڭ يېنىك ئىكەنلىكىنى، 180 دىن ئارتۇق ئەسكەرنىڭ ۋەزىپە ئۆتەش ئورنىغا قايتقانلىقىنى ۋە 10 ئەسكەرنىڭ ئېغىر يارلانغانلار قاتارىغا كىرگۈزۈلگەنلىكىنى ئېيتتى.
ئامېرىكا ھەربىي خادىملىرىنىڭ توقۇنۇشنىڭ قانداق تەسىرگە ئۇچرىغانلىقى ھەققىدە بۈگۈنگىچە بولغان ئەڭ تەپسىلىي مەلۇمات بەرگەن خاۋكىنس، مەزكۇر يارىلىنىشلارنىڭ بەھرەين، ئىراق، ئىسرائىلىيە، ئىيوردانىيە، كۇۋەيت، سەئۇدى ئەرەبىستان ۋە ئەرەب بىرلەشمە خەلىپىلىكىدە يۈز بەرگەنلىكىنى بىلدۈردى.
پېنتاگون بۇنىڭدىن ئىلگىرى 10-مارتتىكى مەلۇماتىدا تەخمىنەن 140 ئامېرىكا ئەسكىرىنىڭ يارلانغانلىقىنى ئۇقتۇرغان ئىدى.
خاۋكىنس ھەربىي ھەرىكەتنىڭ دەسلەپكى كۈنلىرىدە يارلانغان ئىككى ھەربىي خادىمنىڭ دائىرىلەر تەرىپىدىن ئېغىر يارلانغانلار تىزىملىكىگە كىرگۈزۈلۈشىدىن كېيىن، ئېغىر يارلانغان ئەسكەرلەر سانىنىڭ 10 غا يەتكەنلىكىنى قەيت قىلدى.
ئوتتۇرا شەرقتىكى جىددىيچىلىك
ئامېرىكا ۋە ئىسرائىلىيە قىسىملىرى 28-فېۋرال كۈنى ئىرانغا قارشى ئۇرۇش باشلىغان ئىدى. تېھران بولسا رايوندىكى ئامېرىكا قىسىملىرى ياكى بازىلىرى جايلاشقان دۆلەتلەرنى نىشان قىلغان باشقۇرۇلىدىغان بومبىلار ۋە بىر قېتىملىق ھۇجۇم ئېلىپ بارىدىغان قوراللىق ئۇچقۇچىسىز ھاۋا ئاپپاراتلىرى بىلەن قايتۇرما زەربە بەردى.
بۇ يارىلىنىشلار ئىراننىڭ ھەربىي ھەرىكەتكە جاۋابەن ئوتتۇرا شەرق مىقياسىدىكى ئامېرىكا بازىلىرىغا ۋە باشقا نىشانلارغا باشقۇرۇلىدىغان بومبا ۋە ئۇچقۇچىسىز ھاۋا ئاپپاراتلىرى بىلەن ھۇجۇم باشلىغان جەرياندا يۈز بەردى.
ئامېرىكا دائىرىلىرىنىڭ بىلدۈرۈشىچە، يېقىنقى كۈنلەردىكى قايتۇرما زەربىلەر تېھراننىڭ قايتۇرما ھۇجۇم ئىقتىدارىنى چەكلەش مەقسىتىدە، ئىرانغا تەۋە باشقۇرۇلىدىغان بومبا قويۇپ بېرىش سۇپىلىرى ۋە ئۇچقۇچىسىز ھاۋا ئاپپاراتى ئىسكىلاتلىرىغا مەركەزلەشكەن.
توقۇنۇش يەنە ئامېرىكا تەرەپنىڭ تالاپەتكە ئۇچرىشىنىمۇ كەلتۈرۈپ چىقاردى. ھازىرغىچە 13 ئامېرىكا ئەسكىرى ھاياتىدىن ئايرىلغان بولۇپ، بۇلارنىڭ يەتتىسى ھۇجۇملاردا ئۆلگەن.
ئامېرىكا ھەربىي دائىرىلىرىنىڭ بىلدۈرۈشىچە، قالغان ئالتە ئەسكەر ئىراقتا، باشقا بىر ئايروپىلان ھادىسىسى نەتىجىسىدە چۈشۈپ كەتكەن «KC-135» تىپلىق ماي قاچىلاش ئايروپىلانىدا ھاياتىدىن ئايرىلغان.
ئەڭ ئېغىر تالاپەت كۆرۈلگەن ھۇجۇملارنىڭ بىرى 28-فېۋرال كۇۋەيتتىكى شۇئايبە پورتىدا يۈز بەرگەن؛ بىر قېتىملىق ھۇجۇم ئېلىپ بارىدىغان ئۇچقۇچىسىز ھاۋا ئاپپاراتى تاكتىكىلىق مەشغۇلات مەركىزىگە تەگكەن. بۇ ھۇجۇمدا ئالتە ئامېرىكا ئەسكىرى ھاياتىدىن ئايرىلغان.
يەنە بىر ئەسكەر بولسا سەئۇدى ئەرەبىستاندىكى شاھزادە سۇلتان ھاۋا ئارمىيە بازىسىغا قىلىنغان ھۇجۇمدا يارلىنىپ، داۋالاش ئۈنۈم بەرمەي قازا قىلغان.
