پەلەستىنلىك پوپ مۇنزىر ئىسھاق غەزەپنىڭ پەقەت بىر ئىسرائىلىيە ئەسكىرى تەرىپىدىن ئەيسا ئەلەيھىسسالامنىڭ ھەيكىلىنىڭ ۋەيران قىلىنىشىغىلا مەركەزلىشىپ قالماستىن، بەلكى غەززە ۋە لىۋاندىكى پۇقرالارغا قارىتىلغان ھۇجۇملارغا ۋە كەڭ كۆلەملىك ۋەيرانچىلىققا مەركەزلىشىشى كېرەكلىكى ھەققىدە چاقىرىق ئېلان قىلدى.
راماللاھتىكى ئىنجىل لۇتېران مىلاد چېركاۋىنىڭ پوپى ئىسھاق دۈشەنبە كۈنى X سۇپىسىدا ھەمبەھىرلىگەن يازمىسىدا: «غەزەپ، ئەيسانىڭ ۋەيران قىلىنغان بىر ھەيكىلى ھەققىدە بولماسلىقى كېرەك. گەرچە بۇ قىلمىش شۇنچە يىرگىنىشلىك بولسىمۇ» دېدى.
ئۇ يەنە يازمىسىدا: «ئەسلى غەزەپ پۇقرالارنىڭ نىشان قىلىنىشىغا، ئىنسانىي قەدىر-قىممەتكە قارىتىلغان ھۇجۇملارغا ھەمدە غەززە ۋە لىۋاندىكى ۋەيرانچىلىققا قارىتىلىشى كېرەك. ئۇرۇش بىر رەزىللىك. جاۋابكارلىققا تارتىش لازىم» دېگەن سۆزلەرنى ئىشلەتتى.
يەكشەنبە كۈنى تارقالغان سىن كۆرۈنۈشلىرىدە، بىر ئىسرائىلىيە ئەسكىرىنىڭ لىۋاننىڭ جەنۇبىدىكى دېيبەل (Dibel) بازارىدا ئەيسا ئەلەيھىسسالامنىڭ ھەيكىلىنى پارچىلىغانلىقى كۆرۈلگەن بولۇپ، بۇ كۆرۈنۈشلەر يەرلىك ۋە دۇنيا مىقياسىدا كۈچلۈك ئىنكاس قوزغىغان شۇنداقلا دىنىي ۋە سىياسىي ئەربابلارنىڭ ئەيىبلىشىگە سەۋەب بولغان ئىدى.
قۇددۇستىكى كاتولىك چېركاۋى رەھبەرلىرى دۈشەنبە كۈنى ئېلان قىلغان باياناتىدا بۇ قىلمىشنى ئەيىبلەپ، بۇنىڭ خىرىستىيان دىنىي قىممەت قاراشلىرىغا ئېغىر خىلاپلىق قىلىش ئىكەنلىكىنى بىلدۈردى ۋە جاۋابكارلىققا تارتىشنى تەلەپ قىلدى.
ئىسرائىلىيە دۆلەتلىك رادىئو-تېلېۋىزىيە ئورگىنى، ئەسكەرنىڭ جىنايى ئىشلار بويىچە تەكشۈرۈشكە دۇچ كەلمەيدىغانلىقىنى، بەلكى ئىنتىزام جازاسى بېرىلىدىغانلىقىنى خەۋەر قىلدى.
ئىسرائىلىيە ئارمىيەسى بولسا ئېلان قىلغان باياناتىدا ۋەقەنىڭ ئىنتايىن ئېغىر دەپ قارالغانلىقىنى ۋە ئەسكەرنىڭ قىلمىشىنىڭ ئارمىيە كۈتكەن قىممەت قاراشلارغا زىت ئىكەنلىكىنى بىلدۈردى.
ئىسرائىلىيە، ئىران ئۇرۇشى باشلىنىپ ئۇزۇن ئۆتمەيلا، 2-مارتتىن ۇيان لىۋاندا ھەربىي ھەرىكەت ئېلىپ بارماقتا. رەسمىي سانلىق مەلۇماتلارغا قارىغاندا، بۇ ھۇجۇملاردا 2294 كىشى ئۆلتۈرۈلگەن، 7544 كىشى يارىلانغان ۋە 1 مىليوندىن ئارتۇق كىشى ئۆي-ماكانلىرىدىن ئايرىلغان. ئامېرىكا پىرېزىدېنتى دونالد ترامپ تەرىپىدىن ئېلان قىلىنغان 10 كۈنلۈك ئۇرۇش توختىتىش كېلىشىمى پەيشەنبە كەچتە كۈچكە ئىگە بولغان بولسىمۇ، خىلاپلىق قىلىش قىلمىشلىرى داۋاملاشماقتا.
