گوللاندىيەنىڭ «de Volkskrant» گېزىتى ئېلان قىلغان تەكشۈرۈشكە ئاساسلانغاندا، غەززەدە ۋەزىپە ئۆتەۋاتقان خەلقئارالىق دوختۇرلار، بالىلاردا ئەندىشىلىك دەرىجىسىدە ئوق يارىسى دېلولىرىنىڭ بارلىقىنى، بۇ ئەھۋالنىڭ بالىلارنىڭ قەستەن نىشانغا ئېلىنغانلىقىغا دائىر گۇماننى كۈچەيتكەنلىكىنى ئوتتۇرىغا قويدى.
گېزىت، 2023-يىلى ئۆكتەبىردىن بۇيان غەززەدىكى ئالتە دوختۇرخانا ۋە تۆت كىلىنىكىدا ئىشلىگەن، كۆپىنچىسى سۇدان، ئافغانىستان ۋە ئۇكرائىنا قاتارلىق كرىزىس رايونلىرىدا ئۇزۇن يىل ئىشلىگەن ئامېرىكا، ئەنگىلىيە، ئاۋسترالىيە، كانادا ۋە گوللاندىيەدىن كەلگەن 17 دوختۇر ۋە بىر سېستىرا بىلەن سۆھبەتلەشتى.
دوختۇرلاردىن 15 ى «de Volkskrant» گېزىتىگە، باش ياكى كۆكرەك قىسمىدىن بىر پاي ئوق بىلەن يارىلانغان 15 ياش ۋە ئۇنىڭدىن كىچىك كەم دېگەندە 114 بالىنى داۋالىغانلىقىنى بىلدۈردى. بالىلارنىڭ كۆپىنچىسى يارىسى سەۋەبلىك ھاياتىدىن ئايرىلدى. بۇ دېلولار، 2023-يىلىنىڭ ئاخىرىدىن 2025-يىلىنىڭ ئوتتۇرىلىرىغىچە بولغان ئارىلىقتا 10 ئوخشىمىغان ساقلىقنى ساقلاش ئورنىدا خاتىرىلەنگەن.
خەۋەرگە قارىغاندا، ئامېرىكىلىق جاراھەت دوختۇرى فېروزە سىدۋا، 2024-يىلى مارتتا غەززەدىكى ياۋروپا دوختۇرخانىسىدىكى تۇنجى كۈنىدە، 48 سائەت ئىچىدە بېشىدىن ئوخشاش شەكىلدە يارىلانغان 10 ياشتىن تۆۋەن تۆت ئوغۇل بالا بىلەن ئۇچراشقانلىقىنى بايان قىلغان.
ئۇ گېزىتكە: «بۇ دوختۇرخانىغا، 48 سائەت ئىچىدە قانداقمۇ بېشىدىن ئوق تەگكەن تۆت كىچىك بالا بىراقلا كېلىدۇ؟» دەپ سورىغانلىقىنى سۆزلەپ بەرگەن. كېيىنكى 13 كۈن ئىچىدە ئوخشاش يارىلىنىشقا ئىگە يەنە توققۇز بالىنى كۆرگەنلىكىنى بىلدۈرگەن.
سىدۋا، كېيىن باشقا بىر دوختۇرخانىدا ئوخشاش يارىلىنىشلارنى «دېگۈدەك ھەر كۈنى» كۆرگەنلىكىنى دەلىللىگەن بىر خىزمەتدىشى بىلەن ئۇچراشقانلىقىنى ئىپادىلەپ: «شۇ تاپتا قارار قىلدىم. بۇ يەردە نېمىلەر بولۇۋاتقانلىقىنى چۈشىنىشىم كېرەك» دېگەن.
سۆزلەشنىڭ بەدىلى
زىيارەت قىلىنغان دوختۇرلار، بۇ خىل يارىلىنىشلارنىڭ تاسادىپىي بولۇشىنىڭ مۇمكىن ئەمەسلىكىنى تەكىتلىدى. گېزىت مەسلىھەت سورىغان ئەدلىيە مۇتەخەسسىسلىرى، بۇ يارىلىنىشلارنىڭ بىر قانۇنىي جىنايەتنى ئىپادىلەيدىغانلىقىنى، مەرگەنلەر ياكى ئۇچقۇچىسىز ئايروپىلانلار تەرىپىدىن نىشانغا ئېلىنغان بولۇشى مۇمكىنلىكىنى ئىلگىرى سۈردى.
دوختۇرلار، دۇچ كەلگەن ئەخلاقىي قىيىنچىلىقنى بايان قىلىپ، سۆزلىشىنىڭ غەززەگە قايتىپ كېلىشىنىڭ چەكلىنىشى دېگەنلىك بولىدىغانلىقىنى تەكىتلىدى.
ب د ت نىڭ بىلدۈرۈشىچە، ئىسرائىلىيە 2025-يىلى مارتتىن بۇيان 100 دىن ئارتۇق خەلقئارالىق ساغلاملىق خىزمەتچىسىنىڭ غەززەگە كىرىشىنى تەپسىلىي چۈشەنچە بەرمەيلا رەت قىلغان.
شۇنداقتىمۇ، نۇرغۇن دوختۇرلار جىمجىت تۇرۇشنىڭ ئەمدى بىر تاللاش ئەمەسلىكىنى بىلدۈردى. «de Volkskrant» گېزىتىگە سۆز قىلغان بىر دوختۇرمۇ: «ئەمدى سۆزلىمەسلىك بىر تاللاش ئەمەس» دېدى.
«بالىلارنى قۇتقۇزۇش» (Save the Children) تەشكىلاتىنىڭ بىلدۈرۈشىچە، ئىسرائىلىيە 2023-يىلى ئۆكتەبىردە باشلانغان ھۇجۇملىرىدىن بۇيان غەززەدە 20 مىڭدىن ئارتۇق كىچىك بالىنى ئۆلتۈرگەن.
