بلىنكېن ئامېرىكانىڭ «‹MSNBC› تېلېۋىزىيە قانىلى» نىڭ نەق مەيدان پىروگراممىسىدا قىلغان سۆزىدە، غەززە كۈنتەرتىپىگە دائىر ئۆزگىرىشلەر ھەققىدە توختالدى.
غەززەدە ئۇرۇش توختىتىشنى ئەمەلگە ئاشۇرۇش ئۈچۈن تۈركىيە قاتارلىق رايوندىكى بارلىق ئاكتىيورلار بىلەن سۆھبەت ئۆتكۈزۈۋاتقانلىقلىرىنى، ئەمدى نۆۋەتنىڭ ھاماسقا كەلگەنلىكىنى ئېيتقان بىلىنكېن، ھاماسنىڭ قارار چىقىرىشىنى كۈتۈۋاتقانلىقلىرىنى قەيت قىلدى.
بلىنكېن ئىران ۋە ھىزبۇللاھنىڭ ئاساسىي جەھەتتىن ساھەدىن چېكىنىشىدىن كېيىن خەلقئارا جەمئىيەتنىڭ دىققىتىنىڭ ھاماسقا مەركەزلەشكەنلىكىنى تەكىتلەپ مۇنداق دېدى:
«ھاماسنىڭ ئۈستىدە ئۇرۇش توختىتىش كېلىشىمىنى قوبۇل قىلىشى توغرىسىدا بېسىم بار دەپ ئويلايمەن. ھاماس بىر قارارغا كېلىپ، بۇنىڭغا ئىجابىي جاۋاب بېرەلەمدۇ؟ ھاماسقا ئىجابىي جاۋاب بېرىشىنى قولغا كەلتۈرۈش مەقسىتىدە تېگىشلىك بېسىم ئىشلىتىشى ئۈچۈن بارلىق ئىتتىپاقداشلىرىمىز بىلەن سۆھبەت ئۆتكۈزۈۋاتىمىز.»
تۈركىيەدە بۇ مەسىلە ھەققىدە جۇمھۇر رەئىس رەجەپ تاييىپ ئەردوغان بىلەنمۇ كۆرۈشكەنلىكىنى ئەسكەرتكەن بىلىنكېن مۇنداق دەپ كۆرسەتتى:
«تۇتقۇنلارنى ئۆيلىرىگە قايتۇرۇشنى خالايمىز. غەززەدىكى خەلقنىڭ ئاخىرى خاتىرجەملىككە ئېرىشەلىشى ئۈچۈن ئۇرۇش توختىتىشنى ئەمەلگە ئاشۇرۇشنى خالايمىز.»
بىلىنكېن ئىسرائىلىيەنىڭ غەززەدىكى ھەرقانداق شەكىلدىكى ئۇزۇن مۇددەت ئىشغالىيىتىگە قارشى ئىكەنلىكلىرىنى، دەرۋەقە بۇنىڭ ئىسرائىلىيەنىڭ مەنپەئەتىگىمۇ ئۇيغۇن ئەمەسلىكىنى تەكىتلەپ مۇنداق دېدى:
«ئىسرائىلىيە ئۈچۈن يەنە بىر تاللاش ئىسرائىلىيەنىڭ غەززەدە ئۇزۇن مۇددەتلىك ئىشغالىيەت ئېلىپ بېرىشى بولۇپ، بىز بۇنى قوبۇل قىلمايمىز، چۈنكى بۇ ئىسرائىلىيەنىڭ مەنپەئەتىگە ھېچ ئۇيغۇن ئەمەس.»
