تۈركىيە جۇمھۇرىيىتى دۆلەت مۇداپىئە مىنىستىرلىقىنىڭ ھەپتىلىك ئاخبارات ئېلان قىلىش يىغىنىدا سۆز قىلغان باياناتچى زەكى ئاقتۈرك، غەززە تىنچلىق پىلانىنىڭ ئىككىنچى باسقۇچى باشلانغان بولسىمۇ، ئىسرائىلىيەنىڭ ھۇجۇملىرىنى توختاتماسلىقىنى تەنقىد قىلدى.

ئىسرائىلىيە بىخەتەرلىك كابىنېتىنىڭ ئۆتكەن يەكشەنبە كۈنى ئىشغال ئاستىدىكى غەربىي قىرغاقنىڭ مەمۇرىي ۋە قانۇنىي قۇرۇلمىسىنى ئۆزگەرتىپ، ئۆز كونتروللۇقىنى كۈچەيتىشنى مەقسەت قىلغان تەدبىرلەرنى تەستىقلىشى خەلقئارادا زور نارازىلىق قوزغىغانىدى. كۆپلىگەن دۆلەتلەر بۇنىڭغا پەلەستىن زېمىنلىرىنى ئەمەلىيەتتە بېسىۋېلىش (قوشۇۋېلىش، ئىگىلىۋېلىش)قا قارىتىلغان قەدەم دەپ باھالىدى.

ئاقتۈرك ئەنقەرەنىڭ بۇ قارارلارنى قەتئىي ئەيىبلەيدىغانلىقىنى بىلدۈرۈپ، بۇ خىل قەدەملەرنىڭ خەلقئارا قانۇنغا ئاشكارا خىلاپلىق قىلىش ئىكەنلىكىنى، شۇنداقلا تىنچلىق مۇساپىسىگە زىيان يەتكۈزىدىغانلىقىنى تەكىتلىدى.

باياناتچى ئاقتۈرك يەنە: «تۈركىيە 1967-يىلىدىكى چېگرالار ئاساس قىلىنغان، پايتەختى شەرقىي قۇددۇس بولغان مۇستەقىل ۋە ئىگىلىك ھوقۇقلۇق پەلەستىن دۆلىتىنىڭ قۇرۇلۇشىنى ھەر بىر پۇرسەتتە قوللاشنى داۋاملاشتۇرىدۇ» دېگەنلەرنى قەيت قىلدى.

يىغىن ئاخىرىدا، تۈركىيەنىڭ سۈرىيە ھۆكۈمىتى بىلەن تېررورلۇق تەشكىلاتى پ ك ك / ي پ گ ئارىسىدىكى ئۆزگىرىشلەرنى ۋە 30-يانۋاردىكى كېلىشىمنىڭ ئىجرا قىلىنىش ئەھۋالىنى يېقىندىن كۆزىتىۋاتقانلىقى تەكىتلەندى.