كونگو دېموكراتىك جۇمھۇرىيىتىدە سەھىيە مەسئۇللىرى ئېلان قىلغان دوكلاتقا ئاساسلانغاندا، نۆۋەتتىكى يۇقۇمدا ئېبولا ۋىرۇسى كېسىلى بىلەن يۇقۇملانغانلىقى جەزملەشتۈرۈلگەنلەرنىڭ سانى 100 دىن ئاشقان بولۇپ، يۇقۇملىنىش تېز سۈرئەتتە كۆپەيمەكتە.
ئۇچۇر - ئالاقە مىنىستىرلىقى تەرىپىدىن ئېلان قىلىنغان دوكلاتتا، 23-مايغىچە بولغان سانلىق مەلۇمات مەنبە قىلىنىپ، 15-مايدا ئىتۇرى ۋىلايىتىدە باشلانغان يۇقۇمدىن بۇيان كونگودىكى 11 سەھىيە رايونىغا تەسىر كۆرسەتكەنلى ۋە 900 دىن ئارتۇق گۇمانلىق ئەھۋال خاتىرىگە ئېلىنغانلىقى ئۇقتۇرۇلدى.
ئېبولا يۇقۇمى ئىتۇرى، شىمالىي كىۋۇ ۋە جەنۇبىي كىۋۇدىن ئىبارەت ئۈچ ۋىلايەتتە ئاكتىپلىقىنى داۋاملاشتۇرماقتا.
مىنىستىرلىق: «سەھىيە مەسئۇللىرى تەسىرگە ئۇچرىغان رايونلاردا كۆزىتىش، تەكشۈرۈش ۋە ئاڭلىقلىقنى ئاشۇرۇش خىزمەتلىرىنى داۋاملاشتۇرماقتا. ئېھتىياتچان بولۇش ۋە ئالدىن ئېلىش تەدبىرلىرىگە رىئايە قىلىش ھاياتىي ئەھمىيەتكە ئىگە» دەپ بايانات ئېلان قىلدى.
دۇنيا سەھىيە تەشكىلاتى كونگودا ئاز دېگەندە يەتتە كىشىنىڭ ئۆلگەنلىكىنى جەزملەشتۈردى.
پائالىيەتلەر توختىتىلدى
ئۇگاندا سەھىيە مىنىستىرلىقى شەنبە كۈنى يېڭىدىن ئۈچ يۇقۇملىنىش ئەھۋالىنىڭ ئېلان قىلىنغانلىقىنى ۋە نۆۋەتتىكى يۇقۇمدىن بۇيان دۆلەتتە جەزملەشتۈرۈلگەنلەر سانىنىڭ بەشكە چىققانلىقىنى بىلدۈردى.
كونگولۇق مەسئۇللار، يۇقۇمنىڭ مەركىزى بولغان ئىتۇرىدا ئېبولانىڭ تارقىلىپ كېتىشىنىڭ ئالدىنى ئېلىش مەقسىتىدە تەنھەرىكەتنى ئۆز ئىچىگە ئالغان ئىجتىمائىي پائالىيەتلەرنى توختاتتى.
ئافرىقا كېسەللىكلەرنى كونترول قىلىش ۋە ئالدىنى ئېلىش مەركەزلىرىنىڭ بىلدۈرىشىچە، رۇئاندا، كېنىيە، تانزانىيە، ئانگولا، بۇرۇندى، ئوتتۇرا ئافرىقا جۇمھۇرىيىتى، كونگو جۇمھۇرىيىتى، ئېفىئوپىيە، جەنۇبىي سۇدان ۋە زامبىيەنى ئۆز ئىچىگە ئالغان 10 دۆلەت ئېبولا يۇقۇمى خەۋپىگە دۇچ كەلمەكتە.
دۇنيا سەھىيە تەشكىلاتى ئاگاھلاندۇرۇش دەرىجىسىنى «ئىنتايىن يۇقىرى» سەۋىيەگە چىقاردى، كونگوغا قوشنا بەزى دۆلەتلەر ۋىرۇسنىڭ تارقىلىشىنى توسۇش ئۈچۈن كونگودىن كېلىدىغان ساياھەتلەرنى چەكلەشنى ئۆز ئىچىگە ئالغان ئالدىنى ئېلىش تەدبىرلىرىنى كۈچەيتتى.
