مىسىر تاشقى ئىشلار مىنىستىرى بەدىر ئابدۇلئەتى چارشەنبە كۈنى سۇدانلىق مەنسەپدىشى ئۆمەر سىددىق بىلەن تېلېفوندا سۆھبەتلىشىپ، سۇداندا تىنچلىقنى ئىشقا ئاشۇرۇش تىرىشچانلىقلىرىنى مۇزاكىرىلەشتى.

مىسىر تاشقى ئىشلار مىنىستىرلىقى تەرىپىدىن ئېلان قىلىنغان باياناتتا، ئىككى تەرەپنىڭ «مىسىرنىڭ سۇداندا تىنچلىق ۋە مۇقىملىقنى ئىشقا ئاشۇرۇش، سۇدان خەلقىنىڭ بايلىقىنى قوغداش تىرىشچانلىقلىرىنى، جۈملىدىن مىسىرنىمۇ ئۆز ئىچىگە ئالغان سۇدانغا يۆنەلگەن خەلقئارالىق ئەتەش رامكىسىدىكى سۆھبەتلەرنى» مۇزاكىرە قىلغانلىقى قەيت قىلىندى.

ئابدۇلئەتى مىسىرنىڭ «سۇداننىڭ ئىگىلىك ھوقۇقى، دۆلەت ئاپپاراتلىرى، دۆلەتنىڭ بىرلىكى ۋە زېمىن پۈتۈنلۈكى» نى ئىزچىل قوللايدىغانلىقىنى تەكرارلاپ، «سۇداننىڭ بىرلىكىگە تەھدىت ئېلىپ كېلىدىغان ھەرقانداق قەدەم» گە قارشى تۇرىدىغانلىقىنى تەكىتلىدى.

سىددىق بولسا، «مىسىرنىڭ سۇداننىڭ ئىگىلىك ھوقۇقى ۋە بىخەتەرلىكىنى ئىزچىل قوللىغانلىقى» غا رەھمەت ئېيتىپ، «ئىككى دۆلەت مۇناسىۋىتىنى يەنىمۇ راۋاجلاندۇرۇش» ئارزۇسىنى ئىپادىلىدى.

شەنبە كۈنى، ھەربىيلەشتۈرۈلگەن تېز ياردەم قىسىملىرى (RSF) رەھبەرلىكىدىكى «سۇدان قۇرغۇچىلار ئىتتىپاقى تېز ياردەم قىسىملىرى» نىڭ قوماندانى مۇھەممەد ھەمدان داگالو باشچىلىقىدىكى پاراللېل ھۆكۈمەت قۇرۇلغانلىقىنى ئېلان قىلغان ئىدى.

«تېز ياردەم قىسىملىرى» ۋە بىر قانچە ئىتتىپاقداش گۇرۇپپا 22 - فېۋرال كېنىيەدە سۇداندا پاراللېل ھۆكۈمەت قۇرۇش ئۈچۈن بىر نىزامنامە ئىمزالىغان ئىدى.

2023 - يىلى 4 - ئايدىن بۇيان ئارمىيە بىلەن «تېز ياردەم قىسىملىرى» ئوتتۇرىسىدا ئۇرۇش داۋاملاشماقتا.

بۇ ئۇرۇش بىرلەشكەن دۆلەتلەر تەشكىلاتى ۋە يەرلىك دائىرىلەرنىڭ مەلۇماتىغا قارىغاندا، 20 مىڭدىن ئارتۇق كىشىنىڭ ئۆلۈشىگە ۋە 14 مىليون كىشىنىڭ ئۆي-ماكانلىرىدىن ئايرىلىشىغا سەۋەب بولغان. لېكىن، ئامېرىكا ئۇنىۋېرسىتېتلىرى تەرىپىدىن ئېلىپ بېرىلغان تەتقىقاتلاردا، قازا قىلغانلار سانىنىڭ تەخمىنەن 130 مىڭ ئىكەنلىكى مۆلچەرلەنمەكتە.