رۇسىيە 2022-يىلى فېۋرالدا باشلىغان ۋە ئىككىنچى دۇنيا ئۇرۇشىدىن بۇيان ياۋروپادىكى ئەڭ قانلىق توقۇنۇشقا ئايلانغان كەڭ كۆلەملىك ئۇرۇشتا، ئۇكرائىنانى سىستېمىلىق ھالدا ھەر كۈنى دېگۈدەك ھۇجۇم نىشانى قىلماقتا.
ئۇكرائىنا ئارمىيەسى يەكشەنبە كۈنى ئەتىگەندە كىيېۋغا قارىتىلغان باللىستىك راكېتا ھۇجۇمىنىڭ داۋاملىشىۋاتقانلىقىنى ئېلان قىلدى.
كىيېۋ شەھەر باشلىقى ۋىتالى كلىچكو تېلېگرام قانىلىدا ئېلان قىلغان باياناتىدا: «پايتەختتە ھاۋا مۇداپىئە قىسىملىرى ۋەزىپە ئۆتەۋاتىدۇ. پاناھلىنىش ئورۇنلىرىدىن ئايرىلماڭلار!» دېگەن سۆزلەرنى ئىشلەتتى.
AFP ئاگېنتلىقىنىڭ مۇخبىرلىرى پارتلاش ئاۋازلىرىنى ئاڭلىغانلىقىنى ۋە ئاسماندا بىر قانچە يورۇقلۇق نۇرلىرىنى كۆرگەنلىكىنى مەلۇم قىلدى.
رۇسىيەنىڭ بىر كۈن ئىلگىرى ئۇكرائىنانىڭ ئوتتۇرا-شەرق قىسمىدىكى دنىپروپېتروۋىسكى بىلەن شىمالدىكى سۇمى رايونلىرىغا قىلغان ھۇجۇملىرىدا ئىككى كىشى ھاياتىدىن ئايرىلدى.
بۇ ھۇجۇم ئۇكرائىنانىڭ رۇسىيەنىڭ جەنۇبىي-غەربىدىكى ۋولگوگراد ۋە بېلگورود رايونلىرىغا، شۇنداقلا موسكۋانىڭ كونتروللۇقىدىكى دونېتسىك رايونىغا جايلاشقان خورلىۋكاغا قىلغان ھۇجۇملىرىدىن كېيىن يۈز بەردى. رايون خاراكتېرلىك مەسئۇللار بۇ ھۇجۇملاردا ئۈچ كىشىنىڭ ھاياتىدىن ئايرىلغانلىقىنى ئاشكارىلىدى.
رۇسىيە 2022-يىلى فېۋرالدا باشلىغان ۋە ئىككىنچى دۇنيا ئۇرۇشىدىن بۇيان ياۋروپادىكى ئەڭ قانلىق توقۇنۇشقا ئايلانغان كەڭ كۆلەملىك ئۇرۇشتا، ئۇكرائىنانى سىستېمىلىق ھالدا ھەر كۈنى دېگۈدەك ھۇجۇم نىشانى قىلماقتا.
ئۇكرائىنا ھۇجۇمىدىن كېلىپ چىققان زىيانلار
رۇسىيەنىڭ كراسنودار رايونىنىڭ ۋالىيسى ۋېنيامىن كوندىراتيېۋ ئۇكرائىنانىڭ يەكشەنبە كۈنى رۇسىيەنىڭ جەنۇبىغا قىلغان «كەڭ كۆلەملىك» ئۇچقۇچىسىز ئايورۇپىلان ھۇجۇمىدا بىر كىشىنىڭ ھاياتىدىن ئايرىلغانلىقىنى، بىر كىشىنىڭ يارىلانغانلىقىنى ۋە بىر نېفىت پىششىقلاپ ئىشلەش زاۋۇتىغا ئوت كەتكەنلىكىنى ئېلان قىلدى.
كوندىراتيېۋ تېلېگرام قانىلىدا ئېلان قىلغان باياناتىدا، كراسنودار رايونىنىڭ كەڭ كۆلەملىك ئۇچقۇچىسىز ئايروپىلان ھۇجۇمىغا دۇچ كەلگەنلىكىنى تىلغا ئېلىپ، ئاسماندىن چۈشكەن پارچە قالدۇقلارنىڭ بىر قانچە ئۆيگە زىيان يەتكۈزگەنلىكىنى مەلۇم قىلدى.
ھۇجۇمدا يارىلانغان كىشىگە ۋەقە يۈز بەرگەن ئورۇندا زۆرۈر بولغان تېببىي ياردەملەرنىڭ قىلىنغانلىقىنى قەيت قىلغان كوندىراتيېۋ، شەھەردىكى بىر نېفىت پىششىقلاپ ئىشلەش زاۋۇتىغا ئوت كەتكەنلىكىنى، بۇنىڭدىن باشقا بىر توك لىنىيەسى ۋە تەبىئىي گاز تۇرۇبا لىنىيەسىنىڭمۇ زىيانغا ئۇچرىغانلىقىنى ئاشكارىلىدى.
