ئامېرىكا پىرېزىدېنتى دونالد ترامپ، ھاماسنىڭ غەززە تىنچلىق پىلانىدىكى «ئىنتايىن مۇھىم» ماددىلارنى قوبۇل قىلغانلىقىنى بىلدۈرۈپ، ئۇرۇشنى ئاخىرلاشتۇرۇش ئۈچۈن كېلىشىم ھاسىل قىلغىلى بولىدىغانلىقىغا ئۈمىدۋار ئىكەنلىكىنى ئىپادىلىدى.
ترامپ ئىشخانىسىدا مۇخبىرلارغا بەرگەن باياناتىدا، ھاماس ۋە ئىسرائىلىيە ۋەكىللەر ئۆمىكىنىڭ مىسىردا 20 ماددىلىق ئۇرۇش توختىتىش تەكلىپى دائىرىسىدە ۋاسىتىلىق سۆھبەت باشلىغانلىقىنى ۋە غەززە كېلىشىمىنىڭ مۇمكىنلىكىگە «خېلى ئىشىنىدىغانلىقى»نى ئېيتتى.
ترامپ، ھاماسنىڭ قورالسىزلىنىشىنىڭ شەرتلەردىن بىرى ياكى ئەمەسلىكى سورالغاندا، «مېنىڭ قىزىل سىزىقلىرىم بار. ئەگەر مەلۇم ئىشلار ئورۇندالمىسا، بىز بۇنى قىلمايمىز» دېگەن ۋە «بىراق، مېنىڭچە ئىشلار ناھايىتى ياخشى كېتىۋاتىدۇ ۋە ھاماسنىڭ ئىنتايىن مۇھىم ئىشلارنى قوبۇل قىلغانلىقىغا ئىشىنىمەن» دېدى.
ترامپ، سۆھبەتنىڭ «بىر كېلىشىم بىلەن ئاخىرلىشىدىغانلىقى» نى ئويلىغانلىقىنى بىلدۈرۈپ، «ئۇلارنىڭ ئۇزۇن يىللاردىن بېرى كېلىشىم ھاسىل قىلىشقا تىرىشىۋاتقانلىقى ئۈچۈن، بۇنى دېيىش مەن ئۈچۈن قىيىن ئىش» دېدى.
ئىلگىرىلەشنى «غايەت زور» دەپ تەسۋىرلىگەن ترامپ: «بىزنىڭ بىر غەززە كېلىشىمىمىز بولىدۇ، مەن بۇنىڭغا خېلى ئىشىنىمەن، شۇنداق» دېدى.
ئىرقىي قىرغىنچى بېنيامىن نېتانياھۇنى سۆھبەتكە سەلبىي پوزىتسىيەدە بولۇش بىلەن ئەيىبلىگەنلىكى توغرىسىدىكى خەۋەرلەرنى رەت قىلغان ترامپ، نېتانياھۇنىڭ «كېلىشىم توغرىسىدا ئىنتايىن ئاكتىپ» ئىكەنلىكىنى ئېيتتى.
مىسىردىكى ۋاسىتىلىق سۆھبەتلەر
مىسىر تاراتقۇلىرى، پەلەستىن ۋە ئىسرائىلىيە ۋەكىللەر ئۆمىكى ئوتتۇرىسىدىكى ۋاسىتىلىق سۆھبەتنىڭ دۈشەنبە كۈنى شارم ئەلشەيختە باشلانغانلىقىنى ۋە ترامپنىڭ پىلانىغا ئاساسەن ئۇرۇش توختىتىش شەرتلىرى ۋە ئەسىر ئالماشتۇرۇش مېخانىزمىنى بېكىتىشكە تىرىشىۋاتقانلىقىنى خەۋەر قىلدى.
قاھىرە خەۋەر قانىلى، قاتار ۋە مىسىرلىق مۇرەسسەچىلەرنىڭ مەھبۇسلارنى قويۇپ بېرىش ئۈچۈن بىر رامكا بەرپا قىلىشتا «زور تىرىشچانلىق» كۆرسىتىۋاتقانلىقىنى بىلدۈردى.
ئىسرائىلىيەنىڭ 13-قانىلى ئىسرائىلىيە ۋەكىللەر ئۆمىكىنىڭ يۇقىرى دەرىجىلىك رەھبەرلەر قاتناشماي مىسىرغا كەلگەنلىكىنى خەۋەر قىلدى. دائىرىلەر، بىر نەچچە كۈن ئىچىدە ئىلگىرىلەش بولمىسا، سۆھبەتنىڭ داۋاملىشىشىنىڭ «مۇمكىن ئەمەسلىكى» نى ئېيتتى.
ئاقساراي، ئوتتۇرا شەرق ئەلچىسى ستېۋېن ۋىتكوف ۋە يۇقىرى دەرىجىلىك مەسلىھەتچى جارېد كۇشنېرنىڭ مىسىرغا بارغانلىقىنى جەزملەشتۈردى. باياناتچى كارولىن لېۋىت، ھۆكۈمەتنىڭ «تېز ھەرىكەت قىلىشنى» نىشان قىلىۋاتقانلىقىنى ۋە تېخنىكىلىق گۇرۇپپىلارنىڭ گۆرۈگە ئېلىنغانلار ۋە مەھبۇسلارنىڭ تىزىملىكىنى كۆزدىن كەچۈرۈۋاتقانلىقىنى ئېيتتى.
