تۈركىيە جۇمھۇرىيىتى تاشقى ئىشلار مىنىستىرلىقى ئىسرائىلىيەنىڭ غەززەگە قىلغان ھۇجۇملىرىنىڭ مۇشۇ ئاينىڭ بېشىدا ھاسىل قىلىنغان ئۇرۇش توختىتىش كېلىشىمىگە ئاشكارا خىلاپلىق قىلىش ئىكەنلىكىنى بىلدۈردى.

مىنىستىرلىق سەيشەنبە كۈنى ئېلان قىلغان باياناتىدا، ھۇجۇملاردا پۇقرالارنىڭ قازا قىلغانلىقىغا دائىر خەۋەرلەردىن چوڭقۇر ئەندىشە قىلىۋاتقانلىقىنى ئىپادىلەپ، مەڭگۈلۈك تىنچلىق ئۈمىدىنى قوغداش ۋە رايون خەۋپسىزلىكىنى ئورنىتىش ئۈچۈن ئۇرۇش توختىتىشقا تولۇق ئەمەل قىلىشقا چاقىردى.

باياناتتا تەل ئاۋىۋ ھۆكۈمىتى «ئۇرۇش توختىتىش شەرتلىرىگە ئەمەل قىلىشقا ۋە تىنچلىق ھەمدە مۇقىملىققا زىيان يەتكۈزىدىغان قەدەملەردىن ساقلىنىشقا» دەۋەت قىلىندى.

مىنىستىرلىق يەنە تۈركىيەنىڭ پەلەستىن خەلقى بىلەن بولغان ئىتتىپاقلىقىنى داۋاملاشتۇرىدىغانلىقىنى ۋە رايوندا ئادىل، مەڭگۈلۈك ۋە ھەر تەرەپلىمە تىنچلىقنى ئىشقا ئاشۇرۇشقا يۈنەلگەن تىرىشچانلىقلارنى قوللاشنى داۋاملاشتۇرىدىغانلىقىنى تەكىتلىدى.

ئۇرۇش توختىتىشقا خىلاپلىق قىلىش بۇيرۇقى

ئىسرائىلىيە ئارمىيەسى سەيشەنبە كۈنى باش مىنىستىر بېنيامىن نېتانياھۇنىڭ «دەرھال كۈچلۈك ھۇجۇملارنى قىلىش» يۆنىلىشىدىكى كۆرسەتمىسىدىن كېيىن، غەززە مىقياسىدا بىر قاتار ھاۋا ھۇجۇملىرىنى قوزغىدى. نېتانياھۇ ھاماسنى ئۇرۇش توختىتىشقا خىلاپلىق قىلدى دەپ ئەيىبلىگەن بولسىمۇ، بۇ ئەيىبلەشكە مۇناسىۋەتلىك ھېچقانداق دەلىل-ئىسپات كۆرسەتمىدى.

ھۇجۇملاردا 24 نەپىرى كىچىك بالا بولۇپ، كەم دېگەندە 63 پەلەستىنلىك پۇقرا ھاياتىدىن ئايرىلدى، نۇرغۇن كىشى يارىلاندى.

ئامېرىكا پىرېزىدېنتى دونالد ترامپنىڭ ۋاسىتىچىلىكىدە تەييارلانغان 20 ماددىلىق پىلان رامكىسىدا ھاسىل قىلىنغان ئۇرۇش توختىتىش 10-ئۆكتەبىردىن بېرى ئىجرا قىلىنماقتا. بۇ پىلان ئىسرائىلىيەلىك ئەسىرلەرنى قويۇپ بېرىش بەدىلىگە پەلەستىنلىك مەھبۇسلارنى قويۇپ بېرىش ۋە غەززەنى قايتا قۇرۇشنى كۆزدە تۇتىدۇ.

بىراق، 2023-يىلى ئۆكتەبىردىن بۇيان، ئىسرائىلىيەنىڭ ھۇجۇملىرىدا تەخمىنەن 69 مىڭ كىشى - كۆپىنچىسى ئاياللار ۋە بالىلار - ھاياتىدىن ئايرىلدى، 170 مىڭ 500 دىن ئارتۇق كىشى يارىلاندى.

ئىسرائىلىيەنىڭ بومباردىمان قىلىشى غەززە رايونىنىڭ كۆپ قىسىمىنى خارابىلىككە ئايلاندۇردى ۋە نوپۇسنىڭ ھەممىسىنى دېگۈدەك ئۆي-ماكانلىرىدىن ئايرىدى.