«Axios» نىڭ خەۋىرىدە، ئىسرائىلىيە ئارمىيەسىنىڭ پەلەستىنلىكلەرنى مەجبۇرىي يۆتكەش ئۈچۈن ئېگىز بىنالارنى نىشان قىلغان ۋە ھەپتىلەپ داۋاملاشقان ۋەھشىيانە بومباردىماندىن كېيىن، غەززە شەھىرىنى ئىشغال قىلىش ئۈچۈن قۇرۇقلۇق ھەرىكىتى باشلىغانلىقى بىلدۈرۈلدى.
«Axios» دۈشەنبە كۈنى ئىسمىنى ئاشكارىلاشنى خالىمىغان ئىسرائىلىيە ئەمەلدارلىرىنىڭ سۆزىنى نەقىل كەلتۈرۈپ، تاجاۋۇزچىلىقنىڭ باشلانغانلىقىنى دەلىللىدى.
بۇ ۋەزىيەتنىڭ كەسكىنلىشىشى، ئامېرىكا تاشقى ئىشلار مىنىستىرى ماركو رۇبىئونىڭ ئىشغال قىلىنغان شەرقىي قۇددۇستىكى مەسجىدى ئەقساغا يېقىن جايدا باش مىنىستىر بېنيامىن نېتانياھۇ بىلەن كۆرۈشكەندىن كېيىن ئۇزۇن ئۆتمەي يۈز بەردى.
خەۋەرگە قارىغاندا، ئىككى ئىسرائىلىيە ئەمەلدارى رۇبىئونىڭ نېتانياھۇغا ترامپنىڭ قۇرۇقلۇق ھەرىكىتىنى قوللايدىغانلىقىنى، ئەمما ئۇنىڭ تېز ئىجرا قىلىنىشىنى ۋە ئاخىرلىشىشىنى كۆرۈشنى خالايدىغانلىقىنى ئېيتقان.
خەۋەردە يەنە، بىر يۇقىرى دەرىجىلىك ئىسرائىلىيە ئەمەلدارىنىڭ: «رۇبىئو قۇرۇقلۇق ھەرىكىتىگە تورمۇز باسمىدى» دېگەنلىكى نەقىل قىلىندى. بىر ئامېرىكىلىق ئەمەلدارنىڭ ترامپنىڭ نېتانياھۇنى توختاتمايدىغانلىقىنى ۋە ئىسرائىلىيەنىڭ غەززەدىكى ئىرقىي قىرغىنچىلىق توغرىسىدا ئۆز ئالدىغا قارار چىقىرىشىغا يول قويىدىغانلىقىنى ئېيتقانلىقى قوشۇمچە قىلدى.
ئامېرىكىلىق ئەمەلدار: «بۇ ترامپنىڭ ئەمەس، بىبىنىڭ (تېنانياھۇنىڭ) ئۇرۇشى، بۇنىڭدىن كېيىن نېمە ئىش يۈز بېرىشىدىن قەتئىينەزەر، مەسئۇلىيەتنى ئۇ ئۈستىگە ئالىدۇ» دېدى.
ئىرقىي تازىلاش ۋە پۈتۈنلەي يوقىتىش
ئىسرائىلىيە باش ئىشتاب باشلىقى ئەيال زامىرنى ئۆز ئىچىگە ئالغان يۇقىرى دەرىجىلىك بىخەتەرلىك مەسئۇللىرى نېتانياھۇنى بۇ ھەرىكەتكە قارشى ئاگاھلاندۇرۇپ، بۇنىڭ تېخىمۇ كۆپ ئىسرائىلىيە ئەسكىرىنىڭ يوقىلىشىغا سەۋەب بولىدىغانلىقىنى ۋە ھاماسقا قارشى مەغلۇبىيەتكە ئۇچرىتىدىغانلىقىنى ئېيتتى.
بۇنىڭدىن ئىلگىرى، ب د ت نىڭ ئىشغالىيەت ئاستىدىكى پەلەستىن زېمىنى ئالاھىدە دوكلاتچىسى فىرانسىسكا ئالبانىس ئىسرائىلىيەنىڭ غەززەگە قىلغان ھۇجۇملىرىنى ئەيىبلەپ، بۇ ھۇجۇمنىڭ غەززەنى ياشاشقا بولمايدىغان جايغا ئايلاندۇرۇشنى مەقسەت قىلىدىغانلىقىنى ۋە ئىرقىي تازىلاش پىلانىنىڭ بىر قىسمى ئىكەنلىكىنى ئېيتقان ئىدى.
جەنۋەدە ئۆتكۈزۈلگەن ئاخبارات ئېلان قىلىش يىغىنىدا سۆز قىلغان ئالبانىس ئىسرائىلىيەنىڭ غەززەنىڭ ئەڭ چوڭ شەھەر مەركىزىگە قىلغان تاجاۋۇزچىلىقىنىڭ «پۈتۈنلەي يوقىتىش» قا باراۋەر ئىكەنلىكىنى ئېيتتى.
ئۇ: «غەززەنىڭ ئاخىرقى قالدۇقلىرىنى ئىگىلەشكە قارىتىلغان داۋاملىق ھۇجۇم پەلەستىنلىكلەرنى ۋەيران قىلىپلا قالماي، يەنە قالغان ئىسرائىلىيەلىك ئەسىرلەرنىمۇ خەتەرگە دۇچار قىلىدۇ» دېدى.
