خىتاي ئامېرىكا بىلەن ياپونىيەنى، ياپونىيەنىڭ غەربىگە جايلاشقان ئامېرىكا ھەربىي بازىسىغا بىرلەشمە مانېۋىر ئۈچۈن ئورۇنلاشتۇرۇلغان تايفون باشقۇرۇلىدىغان بومبا سىستېمىسىنى رايوندىن يۆتكىۋېتىشكە چاقىردى.

خىتاي تاشقى ئىشلار مىنىستىرلىقىنىڭ باياناتچىسى لىن جيەن ئاخبارات ئېلان قىلىش يىغىنىدا، «ئامېرىكا بىلەن ياپونىيە باشقا دۆلەتلەرنىڭ بىخەتەرلىك ئەندىشەلىرىنى نەزەرگە ئېلىپ، رايوننىڭ تىنچلىقى ۋە مۇقىملىقى ئۈچۈن كونكرېت ھەرىكەتلەر بىلەن ئىجابىي رول ئوينىشى كېرەك، ئەكسىچە ئەمەس» دېدى.

ئامېرىكا توماخاۋك (Tomahawk) باشقۇرۇلىدىغان بومبىلىرىنى قويۇپ بېرەلەيدىغان ئوتتۇرا مۇساپىلىق باشقۇرۇلىدىغان بومبا سىستېمىسىنى، ياپونىيەنىڭ غەربىي قىسمىغا ئورۇنلاشتۇرغاندىن كېيىن، بېيجىڭ يۇقىرىدىكى باياناتىنى ئېلان قىلدى.

مۇناسىۋەتلىك ئۇچۇرلارTRT World - US considers Japan crucial for countering China in Indo-Pacific

بېيجىڭ ۋاشىنگتون بىلەن توكيونى «رايون دۆلەتلىرىنىڭ چاقىرىقىغا قۇلاق سېلىشقا، خاتا قەدەملىرىنى تۈزىتىشكە ۋە بۇ سىستېمىنى رايوندىن تېزدىن يۆتكەش» كە چاقىردى.

باياناتچى لىن جيەن: «ياپونىيەنىڭ مىلىتارىزملىق تاجاۋۇزچىلىق تارىخى سەۋەبىدىن، ئۇنىڭ ھەربىي ۋە بىخەتەرلىك ھەرىكەتلىرى ئاسىيادىكى قوشنىلىرى ھەمدە خەلقئارا جەمئىيەتنىڭ دىققىتىنى قوزغاپ كەلدى» دېدى.

بۇ سىستېما 11-سېنتەبىر باشلانغان ئىككى ھەپتىلىك ئامېرىكا-ياپونىيە «قەتئىي ئەجدېرھا» ناملىق يىللىق ھەربىي مانېۋىرغا تۇنجى قېتىم قاتناشتۇرۇلدى.

ئىككىنچى دۇنيا ئۇرۇشىدىن بۇيان ئاسىيا-تىنچ ئوكيان رايونىدا ئامېرىكانىڭ ئۇزۇن يىللىق ئىتتىپاقدىشى بولغان ياپونىيە، يېقىنقى يىللاردىن بۇيان خىتاينىڭ كۈنسېرى كۈچىيىۋاتقان ھەربىي كۈچى ۋە رايوندىكى تەسىرىگە قارىتا مۇداپىئە ئىقتىدارىنى زور دەرىجىدە ئاشۇردى.

ياپونىيەدە ئامېرىكا ھەربىي بازىلىرى بار.

مۇناسىۋەتلىك ئۇچۇرلارTRT World - US to deploy drones in Japan's Okinawa to boost intelligence operations