ئىران پارلامېنتىنىڭ مۇئاۋىن رەئىسى ئەلى نىكزاد، ئامېرىكا قوشما ئىشتاتلىرىنىڭ ئىقتىسادىي بېسىملىرى ئىران خەلقىنىڭ تۇرمۇشىنى قىيىنلاشتۇرغان تەقدىردە، «ئامېرىكا ۋە ئۇنىڭ بىلەن ھەمكارلاشقان دۆلەتلەرنىڭ ئىقتىسادىي مەنپەئەتىنى خەۋپكە ئىتتىرىدىغانلىقىنى» ئېيتتى.

ئىراننىڭ ISNA ئاگېنتلىقىنىڭ خەۋىرىگە قارىغاندا، پارلامېنتنىڭ ئوچۇق يىغىنىدا سۆز قىلغان نىكزاد، ئامېرىكىنىڭ ئىرانغا قاراتقان ئىقتىسادىي بېسىم سىياسىتى توغرىسىدا توختالغان.

ئامېرىكىنىڭ بېسىملىرىدىن چېكىنمەيدىغانلىقىنى ۋە دۆلەتنىڭ مىللىي بىخەتەرلىكى بىلەن مەنپەئەتىنى «پۈتۈن كۈچى بىلەن قوغدايدىغانلىقىنى» تىلغا ئالغان نىكزاد: «خىيالپەرەس دۈشمەنلىرىمىز پۈتۈنلەي ئىقتىسادىي قامال ھەققىدە سۆز ئېچىۋاتىدۇ، ئەمما جىنايەتچى ئامېرىكا شۇنى بىلىشى كېرەككى، ئىران مىللىتى بۇ بىمەنە گەپلەرگە تەسلىم بولمايدۇ، شۇنىڭ بىلەن بىر ۋاقىتتا دۈشمەنلىرىنى جازالايدۇ ۋە ئىقتىسادىي مەنپەئەتىنى ئېغىر دەرىجىدە خەۋپكە ئىتتىرىدۇ» دېدى.

ئىران پارلامېنتىنىڭ مۇئاۋىن رەئىسى يەنە: «ئىران خەلقىنىڭ تۇرمۇش مەنبەلىرى ۋە ئىقتىسادى تېخىمۇ قىسىلسا، بۇ مىللەتنىڭ دۈشمەنلىرىنىڭ ۋە ئۇلار بىلەن ھەمكارلاشقان دۆلەتلەرنىڭ پاراۋانلىق ئىچىدە ياشىشىغا يول قويمايمىز» دېگەن ئىبارىلەرنى ئىشلەتتى.