پەلەستىن قارشىلىق كۆرسىتىش ھەرىكىتى ھاماس، خەلق ئۈگىسى بولغان خەلىل ئەل ھەييەنى، 2024-يىلى ئۆكتەبىردە غەززەدە ئىسرائىلىيە قىسىملىرى تەرىپىدىن ئۆلتۈرۈلگەن يەھيا سىنۋارنىڭ ئورنىغا سىياسىي بىيۇرو رەئىسى قىلىپ تەيىنلىدى.
تەشكىلاتنىڭ دۈشەنبە كۈنى ئېلان قىلغان قىسقا باياناتىدا، ھەييەنىڭ سىنۋارنىڭ ئورنىغا ھەرىكەتنىڭ سىياسىي بىيۇرو رەئىسى قىلىپ تەيىنلەنگەنلىكى بىلدۈرۈلدى.
ھەييە ھاماسنىڭ ئەڭ كۆزگە كۆرۈنگەن شەخسلىرىدىن بىرى سۈپىتىدە تونۇلىدۇ.
ئىسرائىلىيەنىڭ سىنۋارنى ئۆلتۈرۈشىدىن كېيىن 2024-يىلى ئۆكتەبىردە غەززەدىكى ھەرىكەتنىڭ رەھبەرلىكىنى ئۆز ئۈستىگە ئالغان ھەييە، ئىلگىرى سىنۋارنىڭ ئورۇنباسارى سۈپىتىدە ۋەزىپە ئۆتىگەن ئىدى.
ھاماسنىڭ سابىق سىياسىي بىيۇرو رەئىسى ئىسمائىل ھانىيە ۋە ئۇنىڭ ئورۇنباسارى سالىھ ئەل-ئارۇرىنى ئۆز ئىچىگە ئالغان يۇقىرى دەرىجىلىك رەھبەرلىرىگە ئىسرائىلىيەنىڭ سۇيقەست قىلغاندىن كېيىن، ھەييەنىڭ ئورنى تېخىمۇ يۇقىرى كۆتۈرۈلدى ۋە ھەرىكەتنىڭ ھەم سىياسىي، ھەم تەشكىلىي رەھبەرلىكىگە كۆرسىتىلگەن نامزاتلىقى كەڭ كۆلەمدە قوبۇل قىلىندى.
ھەييە 2021-يىلىدىكى ئىچكى سايلاملاردىن كېيىن ھاماسنىڭ ئەرەب ۋە ئىسلام مۇناسىۋەتلىرى ئىدارىسىنىڭ باشلىقى بولغان ئىدى.
خەلىل ئەل ھەييە 1960-يىلى تۇغۇلغان بولۇپ، 1997-يىلى سۇداندىكى قۇرئان كەرىم ئۇنىۋېرسىتېتىدىن پەيغەمبەر سۈننىتى ۋە ھەدىس ئىلمى ساھەسىدە دوكتورلۇق ئۇنۋانى ئالغان. 2006-يىلى غەززە شەھىرى ۋاكىلى سۈپىتىدە پەلەستىن قانۇن چىقىرىش كېڭىشىنى تەشكىللىگەن.
ھەييەنىڭ ئوغلى ھەمزە، ھاماسنىڭ قوراللىق قىسمى قەسسام بىرىگادىلىرىدا مەيدان قوماندانى ئىدى ۋە 2008-يىلى غەززە شەھىرىنىڭ شەرقىدە ئىسرائىلىيە قىسىملىرى بىلەن ئېلىپ بېرىلغان توقۇنۇشلاردا شېھىت بولغان ئىدى.
ھەييەنىڭ بىر قانچە ئاكا-ئىنىسى ۋە ئوغۇللىرىنىمۇ ئۆز ئىچىگە ئالغان سەككىز ئۇرۇق-تۇغقىنى، 2007-يىلى 20-مايدا ئىسرائىلىيە قىسىملىرىنىڭ غەززە شەھىرىنىڭ شەرقىدىكى ئائىلىلەر جەم بولغان ئورۇننى بومباردىمان قىلىش ئارقىلىق ئېلىپ بارغان سۇيقەست ھەرىكىتىدە شېھىت قىلىنغان ئىدى.
ئىسرائىلىيەنىڭ غەززەدە داۋاملىشىۋاتقان ئىرقىي قىرغىنچىلىقى جەريانىدا ھەييە ئائىلىسىنىڭ باشقا ئەزالىرىمۇ ھاياتىدىن ئايرىلغان ئىدى.
2023-يىلى ئۆكتەبىردىن بۇيان غەززەدە 73 مىڭدىن ئارتۇق كىشى قىرغىن قىلىندى ۋە 173 مىڭدىن ئارتۇق كىشى يارىلاندى.
