ئىران تاشقى ئىشلار مىنىستىرى تېھراننىڭ، يېقىنقى ئامېرىكا ھاۋا ھۇجۇملىرىدا ئېغىر زىيانلار كۆرۈلگەن بولسىمۇ، يادرو پىلانىدىن ھەرگىز ۋاز كەچمەيدىغانلىقىنى بىلدۈردى ۋە ئوران قويۇقلاندۇرۇشنىڭ مىللىي ئىپتىخار مەسىلىسى ئىكەنلىكىنى ئالاھىدە تەكىتلىدى.

ئىران تاشقى ئىشلار مىنىستىرى ئابباس ئاراقچى «فوكۇس خەۋەرلىرى» قانىلىغا بەرگەن باياناتىدا، «ھازىرچە قويۇقلاندۇرۇش توختىدى، چۈنكى كۆرۈلگەن زىيان ھەقىقەتەن ئېغىر... لېكىن شۇنى ئوچۇق ئېيتىش كېرەككى، بىز قويۇقلاندۇرۇشتىن ۋاز كېچەلمەيمىز، چۈنكى بۇ ئۆزىمىزنىڭ ئالىملىرى قولغا كەلتۈرگەن بىر ئۇتۇقتۇر» دېدى.

ئاراقچى كەلگۈسىدىكى ھەرقانداق يادرو كېلىشىمىدە ئىراننىڭ ئورۇن قويۇقلاندۇرۇش ھوقۇقىنىڭ چوقۇم ئېتىراپ قىلىنىشى كېرەكلىكىنى سۆزلىرىگە ئىلاۋە قىلدى.

ئاراقچىنىڭ بۇ باياناتى، ئامېرىكانىڭ 22-ئىيۇن كۈنى، يەر ئاستىدىكى فوردو ئەسلىھەسىنىمۇ ئۆز ئىچىگە ئالغان ئۈچ يادرو بازىسىغا ھاۋادىن ھۇجۇم قىلغىنىدىن بىر نەچچە ھەپتە كېيىن ئېلان قىلىندى. بۇ ھۇجۇملار ئىسرائىلىيەنىڭ ئىران بىلەن بولغان 12 كۈنلۈك ئۇرۇشىغا جاۋابەن ئېلىپ بېرىلغانىدى.

ئەسلىھەلەرنىڭ «ئېغىر دەرىجىدە ۋەيران قىلىنغانلىقىنى» ئېتىراپ قىلغان ئاراقچى، ئىراننىڭ يادرو تېخنىكىسىنىڭ يەنىلا پۇختا ئىكەنلىكىنى تەكىتلەپ: «تېخنىكا مۇشۇ يەردە. بىزنىڭ يادرو پىلانىمىز، قويۇقلاندۇرۇش پىلانىمىز، سىرتتىن ئەكىرىلىپ بومباردىمان قىلىش ئارقىلىق يوقىتىۋەتكىلى بولىدىغان نەرسە ئەمەس» دېدى.

«زۆرۈر تېپىلسا» تېخىمۇ كۆپ ھۇجۇملار قىلىنىدۇ

ئامېرىكا پىرېزىدېنتى دونالد ترامپ ئاراقچىنىڭ سۆزلىرىگە ئۆزىنىڭ «Truth Social» ناملىق ئىجتىمائىي تاراتقۇ سۇپىسىدا ئىنكاس قايتۇرۇپ: «ئىلگىرى ئېيتقىنىمدەك، ئەگەر زۆرۈر تېپىلسا بۇ ئىشنى يەنە تەكرارلايمىز!» دېدى.

ترامپ يەنە بىر ئۇچۇرىدا، ئامېرىكا ئىستخبارات ئورگانلىرىنىڭ دوكلاتلىرىنى نەقىل كەلتۈرۈپ، بۇ ھۇجۇملارنىڭ ئىراننىڭ يادرو پىلانىنى ئاران بىر نەچچە ئاي كېچىكتۈرگەن بولۇشى مۇمكىنلىكىنى ئىلگىرى سۈرگەن CNN تېلېۋىزىيە قانىلىنى تەنقىد قىلىپ، قانال رەھبەرلىكىنى ھېلىقى مۇخبىرنى ئىشتىن بوشىتىشقا چاقىردى.

ئاراقچى يەنە ئىران ئاتوم ئېنېرگىيەسى ئىدارىسىنىڭ يادرو ماتېرىياللىرى ۋە ئەسلىھەلەرگە يەتكەن زىياننىڭ كونكرېت دەرىجىسىنى باھالاشنى ھازىرمۇ داۋاملاشتۇرۇۋاتقانلىقىنى دەلىللىدى. ئەمما ھازىرغىچە قويۇقلاندۇرۇلغان ئوراننىڭ ساقلىنىپ قالغان-قالمىغانلىقى ھەققىدە توختالمىدى.

بۇ ئوڭۇشسىزلىققا قارىماي، ئاراقچى ئىراننىڭ سۆھبەتكە تەييار ئىكەنلىكىنى، بىراق ھازىرچە ئامېرىكا بىلەن بىۋاسىتە سۆھبەت ئۈستىلىگە ئولتۇرمايدىغانلىقىنى بىلدۈردى. ئۇ: «ئىراننىڭ يادرو پىلانىنىڭ تىنچلىقنى مەقسەت قىلىدىغانلىقىنى ئىسپاتلاش ئۈچۈن، زۆرۈر بولغان بارلىق ئىشەنچنى كۈچەيتىش قەدەملىرىنى بېسىشقا تەييارمىز» دېدى ۋە بۇنىڭ بەدىلىگە ئامېرىكانىڭ ئېمبارگولىرىنى ئەمەلدىن قالدۇرۇشىنى تەلەپ قىلدىغانلىقىنى سۆزلىرىگە ئىلاۋە قىلدى.

ئىراننىڭ باشقۇرۇلىدىغان بومبا تەتقىقاتى ۋە ئىشلەپچىقىرىشىنى داۋاملاشتۇرىدىغانلىقىنى دەلىللىگەن ئاراقچى، ئىسرائىلىيەنىڭ يېقىنقى توقۇنۇشلاردا ئىراننىڭ باشقۇرۇلىدىغان بومبا ئۇل ئەسلىھەلىرىنى زەربە ئوبيېكتى قىلغان بولۇشىغا قارىماي، «ئۆزىمىزنى قوغداش ئۈچۈن قولىمىزدا يەنىلا خېلى كۆپ باشقۇرۇلىدىغان بومبا زاپىسى بار» دېدى.

ئىراننىڭ گېرمانىيە، فىرانسىيە ۋە ئەنگلىيە قاتارلىق ياۋروپا دۆلەتلىرى بىلەن بولغان يېڭى يادرو سۆھبىتىنىڭ جۈمە كۈنى ئىستانبۇلدا ئۆتكۈزۈلۈشى پىلانلانماقتا.

ئىلگىرى ئامېرىكا بىلەن ئىران ئوتتۇرىسىدا ئوماننىڭ ۋاسىتىچىلىكى بىلەن مۇزاكىرە ئۆتكۈزۈلگەن بولسىمۇ، ئىسرائىلىيەنىڭ 13-ئىيۇندىكى ئىغۋاگەرچىلىك ھۇجۇمىدىن كېيىن بۇ جەريان توختاپ قالغانىدى. كۆپ ئۆتمەي ئامېرىكا ئىراننىڭ يادرو ئەسلىھەلىرىگە ھۇجۇم قىلىش ئارقىلىق بۇ توقۇنۇشقا بىۋاسىتە ئارىلىشىۋالغانىدى.