تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسى بايانات ئېلان قىلىپ، جۇمھۇر رەئىس ئەردوغان بىلەن رۇسىيە پىرېزىدېنتى پۇتىننىڭ تېلېفونلىشىپ، تۈركىيە-رۇسىيە مۇناسىۋەتلىرى، سۈرىيەدىكى ئەڭ يېڭى ئۆزگىرىشلەر ھەمدە دۇنياۋى ۋە رايون خاراكتېرلىك مەسىلىلەر توغرىسىدا سۆزلەشكەنلىكىنى بىلدۈردى.
باياناتتا كۆرسىتىلىشىچە، جۇمھۇر رەئىس ئەردوغان سۆھبەت جەريانىدا، تۈركىيەنىڭ بىر تەرەپتىن سۈرىيەنىڭ زېمىن پۈتۈنلۈكىنى قوللاشنى داۋاملاشتۇرۇۋاتقانلىقىنى، يەنە بىر تەرەپتىن سۈرىيە مەسىلىسىگە ئادىل ۋە ئۇزۇن مۇددەتلىك ھەل قىلىش چارىسى تېپىش ئۈچۈن تىرىشىۋاتقانلىقىنى تەكىتلىگەن ھەمدە بۇ قەدەملەر بىلەن بىرلىكتە، رايوندا دىپلوماتىيەگە تېخىمۇ كۆپ پۇرسەت يارىتىپ بېرىشنىڭ مۇھىملىقىنى، بۇ جەرياندا سۈرىيە ھاكىمىيىتىنىڭ سىياسىي ھەل قىلىش جەريانىغا قاتنىشىشى كېرەكلىكىنى بىلدۈرگەن.
سۈرىيەنىڭ نۆۋەتتىكى ۋەزىيىتىدە ئەڭ مۇھىم مەسىلىنىڭ پۇقرالارغا زىيان يەتمەسلىكى ئىكەنلىكىنى تەكىتلىگەن جۇمھۇر رەئىس ئەردوغان، سۈرىيەنىڭ تېخىمۇ ئېغىر مۇقىمسىزلىقنىڭ مەنبەسى بولۇپ قالماسلىقى كېرەكلىكىنى، تۈركىيەنىڭ سۈرىيەدە تىنچلىقنى ئەسلىگە كەلتۈرۈش ئۈچۈن قولىدىن كېلىدىغان بارلىق تىرىشچانلىقنى كۆرسىتىۋاتقانلىقىنى تەكىتلىگەن.
جۇمھۇر رەئىس ئەردوغان تۈركىيەنىڭ سۈرىيەدىكى ئەڭ يېڭى ۋەزىيەتتىن پايدىلىنىشقا ئۇرۇنۇۋاتقان بۆلگۈنچى تېررورلۇق تەشكىلاتى پ ك ك ۋە ئۇنىڭ گۇماشتىلىرىغا قارشى كۈرەش قىلىش ئىرادىسىنىڭ قەتئىي ئىكەنلىكىنى تىلغا ئېلىپ ئۆتكەن.
