مۇناسىۋەتلىك دائىرىلەر تېكساس ئىشتاتىدىكى تۇيۇقسىز يۈز بەرگەن كەلكۈن ئاپىتىدە قازا قىلغانلار سانىنىڭ كەم دېگەندە 119 غا يەتكەنلىكىنى، يوقاپ كەتكەن 170 تىن ئارتۇق كىشىنى ئىزدەش خىزمىتىنىڭ داۋاملىشىۋاتقانلىقىنى ئۇقتۇردى.

ئاپەتنىڭ تەسىرىگە ئەڭ ئېغىر ئۇچرىغان كېر ناھىيەسىدە  59 كىشى ۋە 36 كىچىك بالىنى ئۆز ئىچىگە ئالغان جەمئىي 95 كىشىنىڭ قازا قىلغانلىقى خەۋەر قىلىندى.

مۇناسىۋەتلىك دائىرىلەر 27 كىشىنىڭ كىملىكىنىڭ تېخىچە ئېنىقلانمىغانلىقىنى، باشقا قازا قىلغانلارنىڭ ئەتراپتىكى ناھىيەلەردە يۈز بەرگەنلىكىنى ئېلان قىلدى.

قۇتقۇزۇش ھەرىكەتلىرى كېڭەيگەنسېرى، ئىشتاتنىڭ جىددىي ئەھۋال ئاگاھلاندۇرۇش سىستېمىسىغا قارىتا جامائەتنىڭ تەنقىدىمۇ كۈچەيدى. تېكساس جامائەت رادىيوسى (Texas Public Radio) ۋە KSAT تەرىپىدىن ئېلىپ بېرىلغان تەكشۈرۈشتە، ئەتىگەن سائەت 4:22 دە ئەۋەتىلىشى تەلەپ قىلىنغان ئاممىۋى ئاگاھلاندۇرۇش ئۇچۇرىنىڭ تەستىقلاش مەسىلىسى سەۋەبىدىن كېچىكتۈرۈلگەنلىكى ۋە بىر قىسىم ئاھالىلەرنىڭ كەلكۈن تەھدىتىدىن نەچچە سائەت كېيىن خەۋەردار بولغانلىقى ئاشكارىلاندى.

مۇناسىۋەتلىك دائىرىلەر پەقەت كېر ناھىيەسىدىلا 161 كىشىنىڭ يوقاپ كەتكەنلىكىنىڭ مۆلچەرلىنىۋاتقانلىقىنى بىلدۈردى. يوقاپ كەتكەنلەر ئىچىدە گۇئادالۇپې دەرياسى  يېنىدىكى «Camp Mystic»  ناملىق قىزلار يازلىق لاگېرىدىن بەش لاگېر ئەزاسى ۋە بىر مەسلىھەتچىمۇ بار.

ئۆيلىرىگە قايتقان ئاھالىلەر كەڭ كۆلەملىك ۋەيرانچىلىققا دۇچ كەلمەكتە. دائىرىلەر قالدۇق ۋە خارابىلىكلەرنى تازىلاش ئۈچۈن ئېغىر تىپتىكى ئۈسكۈنىلەر ئىشلىتىلىۋاتقانلىقى ئۈچۈن، ئىزدەش-قۇتقۇزۇش ئەترەتلىرىگە ئارىلىشىۋالماسلىق كېرەكلىكىنى تەكىتلىدى.

كېر ناھىيەسىنىڭ ساقچى باشلىقى لارى لېيتا: «بۇ ھەممە ئادەم مەسئۇلىيەتنى ئۈستىگە ئېلىشى كېرەك بولغان بىر ئەھۋال. يوقاپ كەتكەن يېقىنلىرىنى ئىزدەۋاتقان ئائىلىلەرگە، جامائەتكە ۋە مېنى بۇ ۋەزىپىگە تەيىنلىگەن كىشىلەرگە بۇ سوئاللارغا جاۋاب بېرىلىشى كېرەك» دېدى.

ئاگاھلاندۇرۇش سىگىنالى سىستېمىسىنىڭ بولماسلىقى ۋە ئالاقىدىكى بىردەكلىكنىڭ بولماسلىقى كۈنسېرى كۈچىيىۋاتقان ئۈمىدسىزلىكنى كەلتۈرۈپ چىقارماقتا. 2015-يىلىدىن بۇيان، كېر ناھىيەسى مۇۋاپىق كەلكۈن ئاگاھلاندۇرۇش سىستېمىسى قۇرۇش ئۈچۈن فېدېراتسىيەدىن ياردەم پۇلى ئىلتىماس قىلىپ كەلگەن ئىدى.

يەكشەنبە كۈنى ترامپ ھۆكۈمىتى كەلكۈن ئاپىتىنى «چوڭ ئاپەت» دەپ ئېلان قىلىپ، قۇتقۇزۇش خىزمىتىگە ياردەم بېرىش ئۈچۈن فېدېراتسىيە بايلىقىنى سەپەرۋەر قىلدى.

تېكساس ئىشتاتىنىڭ باشلىقى گرېگ ئاببوت چارشەنبە كۈنى قىلغان سۆزىدە، كەلكۈن ئاپىتىگە تاقابىل تۇرۇش دائىرىسىدە ئىشتاتنىڭ 2200 دىن ئارتۇق خادىم، 1200 ئاپتوموبىل ۋە ئۈسكۈنىنى سەپلىگەنلىكىنى بىلدۈردى. 20 دىن ئارتۇق ئىشتات ئورگىنى داۋاملىشىۋاتقان قۇتقۇزۇش ۋە ياردەم بېرىش ھەرىكەتلىرىگە قاتناشماقتا.