تۈركىيە جۇمھۇرىيىتى تاشقى ئىشلار مىنىستىرى خاقان فىدان، ئەنقەرەنىڭ ئالدىنقى ۋەزىپىسىنىڭ رۇسىيە بىلەن ئۇكرائىنا ئوتتۇرىسىدا مەڭگۈلۈك تىنچلىق ئورنىتىش ئىكەنلىكىنى ئېيتتى.
فىدان بۇ سۆزنى دۈشەنبە كۈنى (بۈگۈن) باشلانغان رۇسىيە - ئۇكرائىنا ۋەكىللەر ئۆمەكلىرىنى ئىستانبۇلدىكى تارىخى چىراغان سارىيىدا ئۇچراشتۇرغان ئىككىنچى نۆۋەتلىك تىنچلىق سۆھبىتىنىڭ ئېچىلىشىدا قىلدى.
تۈركىيە، بۇ جەرياندا ياردەملەشكۈچى رول ئوينىماقتا
مىنىستىر خاقان فىدان، «تۈركىيە بۇ جەريانغا ياردەملىشىش ئۈچۈن بېسىشقا تېگىشلىك ھەر تۈرلۈك قەدەمنى بېسىشقا تەييار» دېدى.
بۇ يېقىندىن بۇيان تۈركىيە ساھىبخانلىق قىلغان ئىككىنچى نۆۋەتلىك سۆھبەت بولۇپ، ئالدىنقىسى 16-ماي ئىستانبۇلدا ئۆتكۈزۈلگەنىدى؛ ئۇ يىغىندا، تەرەپلەر 1000 دىن مەھبۇسنى ئالماشتۇرۇش توغرىسىدا كېلىشىم ھاسىل قىلغان ۋە مۇمكىن بولىدىغان ئۇرۇش توختىتىش ئۈچۈن ئۆز مەيدانلىرىنى بېكىتكەنىدى.
تەرەپلەر يەنە داۋاملىشىۋاتقان توقۇنۇشنى ئازايتىش ئۈچۈن دىيالوگنى داۋاملاشتۇرۇشقا ۋەدە بەرگەنىدى.
ئەنقەرە ئۇرۇش مەزگىلىدە موسكۋا ۋە كىيېۋ بىلەن بولغان يېقىن مۇناسىۋىتىنى ساقلاپ كەلگەن ھەمدە دىيالوگ ۋە تىنچلىق تىرىشچانلىقلىرىغا ياردەملىشىش ئۈچۈن كۆپ قېتىم ۋاسىتىچىلىك قىلىشنى ئوتتۇرىغا قويدى.
