ئامېرىكا قوشما ئىشتاتلىرىنىڭ يېڭى تاشقى ئىشلار مىنىستىرى ماركو رۇبىيو تۇنجى خىزمەت كۈنىدە ئاۋسترالىيە، ياپونىيە ۋە ھىندىستان قاتارلىق دۆلەتلەرنىڭ تاشقى ئىشلار مىنىستىرلىرىنىڭ تۆت دۆلەت مۇداپىئە سۆھبىتى (Quad-كۇاد) يىغىنىغا قاتناشتى.

مىنىستىر ماركو رۇبىيو ياپونىيە تاشقى ئىشلار مىنىستىرى ئىۋايا تاكېشى، ئاۋسترالىيە تاشقى ئىشلار مىنىستىرى پېننى ۋوڭ ۋە ھىندىستان تاشقى ئىشلار مىنىستىرى سۇبراھمانيام جايشانكارنى تۇنجى خىزمەت كۈنىدە پايتەخت ۋاشىنگتوندا قوبۇل قىلدى.

يىغىندا ھىندى-تىنچ ئوكيان رايونىدىكى بىخەتەرلىك، ئىقتىسادىي پۇرسەتلەر ۋە خەلقئارالىق قانۇن قاتارلىق مەسىلىلەر مۇزاكىرە قىلىندى.

تۆت دۆلەت نۆۋەتتىكى ۋەزىيەتنى بىر تەرەپلىمە ھەرىكەتلەر بىلەن ئۆزگەرتىشكە قارىتىلغان ئۇرۇنۇشلارغا قارشى تۇرىدىغانلىقىنى بىلدۈردى. بۇنىڭدىن سىرت، AUKUS (ئاۋسترالىيە، ئەنگلىيە ۋە ئامېرىكا قوشما ئىشتاتلىرى ئارىسىدىكى يادرو پاراخوتى ئىتتىپاقى) ۋە ئىككى تەرەپلىمە مۇداپىئە ھەمكارلىقى قاتارلىق مەسىلىلەر ھەققىدىمۇ پىكىر ئالماشتۇردى.

كۇاد  2004-يىلى ئىنسانىي ياردەم پائالىيەتلىرىنى ئېىلپ بېرىش مەقسىتىدە قۇرۇلغان بولۇپ، 2007-يىلى رەسمىيلەشتۈرۈلدى.

ئاۇكۇس ئىتتىپاقى بولسا، خىتايغا قارشى ئىستراتېگىيەلىك مۇنبەر سۈپىتىدە رول ئويناۋاتىدۇ.