بىرلەشكەن دۆلەتلەر تەشكىلاتىنىڭ پەلەستىن ئىشلىرى ئالاھىدە دوكلاتچىسى فرانچېسكا ئالبانىس ئۇرۇش توختىتىش كېلىشىمىگە قارىماي غەززە ۋە ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدا ھۇجۇملىرىنى داۋاملاشتۇرۇۋاتقان ئىسرائىلىيە ئارمىيەسىنى «ئەڭ ئەخلاقسىز ئارمىيە» دەپ سۈپەتلىدى.
ئالبانىس ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا: «(پەلەستىنلىكلەرگە قارشى غەززە ۋە ئىيوردان دەرياسىنىڭ غەربىي قىرغىقىدا) ئەڭ ئەخلاقسىز ئارمىيە قايتا ھۇجۇم قىلىۋاتىدۇ. ئىيوردان دەرياسىنىڭ غەربىي قىرغىقىدا ئەسكەرلەر ۋە (قانۇنسىز) كۆچمەنلەر سۇ تۇرۇبىلىرىنى كېسىۋەتمەكتە. نابۇلۇس شەھىرىگە قاراشلىق قۇسرا بازىرىدىكى قورشاۋ داۋاملاشماقتا.»
ئالبانىس غەززەدىكى ۋەيرانچىلىق ۋە ئىرقىي قىرغىنچىلىقلارنىڭ داۋاملىشىۋاتقانلىقىنى تەكىتلەپ: «ئىسرائىلىيە ئۇرۇش توختىتىشتىن (2025-يىلى ئۆكتەبىردىن) كېيىن 300 بالىنى ئۆز ئىچىگە ئالغان 1200 دىن ئارتۇق كىشىنى ئۆلتۈردى» دېدى.
ئىسرائىلىيە ئارمىيەسى غەززە رايونىغا قارىتا ھۇجۇملىرىنى باشلىغان 2023-يىلى ئۆكتەبىردىن بۇيان، ئىشغالىيەت ئاستىدىكى ئىيوردان دەرياسىنىڭ غەربىي قىرغىقى ۋە شەرقىي قۇددۇستىمۇ پەلەستىنلىكلەرگە قارىتىلغان باستۇرۇپ كىرىش، ھۇجۇم قىلىش ۋە قولغا ئېلىش ۋەقەلىرىدە كۆرۈنەرلىك ئېشىش كۆرۈلمەكتە.
