بىرلەشكەن دۆلەتلەر تەشكىلاتى باش كاتىپى گۇتېررېسمۇ ياۋروپا ئىتتىپاقىنىڭ مەيدانىنى قوللاپ، ئامېرىكا قوشما ئىشتاتلىرىنى قاتتىق تەنقىد قىلدى ھەمدە ۋىزا چەكلىمىسىنىڭ پەلەستىننىڭ بىرلەشكەن دۆلەتلەر تەشكىلاتىنىڭ خىزمەتلىرىگە تولۇق قاتنىشىشىنى چەكلەپ قويغانلىقىنى ئەسكەرتتى.
ياۋروپا ئىتتىپاقى شەنبە كۈنى ئېلان قىلغان باياناتىدا، ۋاشىنگتوننىڭ بىرلەشكەن دۆلەتلەر تەشكىلاتى ئومۇمىي كېڭىشى يىغىنىغا قاتنىشىشنى خالايدىغان پەلەستىنلىك ئەمەلدارلارغا ئىككىنچى يىل ۋىزا بەرمەسلىك قارارىدىن ئەپسۇسلىنىدىغانلىقىنى بىلدۈردى ۋە ئامېرىكا قوشما ئىشتاتلىرىنى بۇ قارارىنى قايتا كۆزدىن كەچۈرۈشكە چاقىردى.
ئامېرىكا تاشقى ئىشلار مىنىستىرلىقى مۇشۇ ھەپتە بەرگەن باياناتىدا، كېلەر ھەپتە نىيۇ يوركتا چاقىرىلىدىغان يىغىن ھارپىسىدا، پەلەستىن دۆلەت رەئىسى مەھمۇد ئابباس ۋە ۋەكىللەر ئۆمىكىنىڭ باشقا ئەزالىرىغا ۋىزا بەرمەيدىغانلىقىنى ئۇقتۇرغان ئىدى.
ياۋروپا ئىتتىپاقى تاشقى مۇناسىۋەتلەر بۆلۈمىنىڭ باياناتچىسى ئەنۋەر ئەلئانۇنى: «پەلەستىن ۋەكىللەر ئۆمىكى ئەزالىرىغا كىرىش ۋىزىسى بەرمەسلىك قارارىنىڭ ئارقا – ئارقىدىن ئىككىنچى يىل ئىجرا قىلىنىشىدىن تولىمۇ ئەپسۇسلىنىمىز» دېدى.
ئەنۋەر ئەلئانۇنى سۆزلىرىگە ئىلاۋە قىلىپ: «بىرلەشكەن دۆلەتلەر تەشكىلاتى بىلەن تۈزۈلگەن نۆۋەتتىكى مۇھىم كېلىشىملىرى ۋە ساھىبخان دۆلەت بولۇش سۈپىتى بىلەن زىممىسىگە يۈكلەنگەن مەجبۇرىيەتلىرىگە ئاساسەن، ئامېرىكا قوشما ئىشتاتلىرىنى بۇ قارارىنى قايتا كۆزدىن كەچۈرۈشكە چاقىرىمىز» دېدى.
بىرلەشكەن دۆلەتلەر تەشكىلاتى ئومۇمىي كېڭىشى يىغىنى پەيشەنبە كۈنى 3 كە قارشى 152 ئاۋاز بىلەن، مەھمۇد ئابباسنىڭ بۇ يىلمۇ يىغىنغا تور ئارقىلىق قاتنىشىشىغا رۇخسەت قىلدى.
ھازىرقى ئەھۋال ئاستىدا، سەيشەنبە كۈنى باشلىنىدىغان يىغىنغا پەقەت پەلەستىننىڭ بىرلەشكەن دۆلەتلەر تەشكىلاتىدا تۇرۇشلۇق ۋاكالەتخانىسىنىڭ ئەزالىرىلا قاتنىشالايدۇ.
