كوندراچېۋ ئىجتىمائىي ئالاقە ھېساباتىدا ئېلان قىلغان باياناتىدا، ئۇكرائىنا ئارمىيەسىنىڭ كراسنودار رايونىغا ئۇچقۇچىسىز ھاۋا ئاپپاراتى ھۇجۇمى ئېلىپ بارغانلىقىنى ئەسكەرتتى.
رايوندا كۆرۈلگەن نوۋوروسسىيسك، ئاناپا، گېلېنجىك ۋە تەمرۇك ناھىيەلىرىدىكى پۇقراۋى ئۇل-ئەسلىھەلىرى بىلەن ئۆيلەرنىڭ ھۇجۇمغا ئۇچرىغانلىقىنى قەيت قىلغان كوندراچېۋ، ئېتىپ چۈشۈرۈلگەن ئۇچقۇچىسىز ھاۋا ئاپپاراتى پارچىلىرىنىڭ چۈشۈشى نەتىجىسىدە 21 ئۆي ۋە 4 ئورۇننىڭ زىيانغا ئۇچرىغانلىقىنى ئەسكەرتتى.
كوندراچېۋ ۋەقە يۈز بەرگەن ئورۇندا جىددىي مۇلازىمەت ئەترەتلىرىنىڭ خىزمەتلىرىنى داۋاملاشتۇرۇۋاتقانلىقىنى بىلدۈرۈپ، ئۆيلەردىن تارقاقلاشتۇرۇلغانلار ئۈچۈن ۋاقىتلىق پاناھلىنىش مەركەزلىرى قۇرۇلغانلىقىنى ئۇقتۇردى.
كوندراچېۋ ھۇجۇملار نەتىجىسىدە ئۆلگەنلەر ۋە يارىلانغانلارنىڭ بارلىقىنى ئەسكەرتىپ: «نوۋوروسسىيسكتا 8 ياشلىق بىر بالا ھاياتىدىن ئايرىلدى، بىر كىچىك بالىنى قوشقاندا، 8 كىشى يارىلاندى. تەمرۇك ناھىيەسىدىكى ۋولنا يېزىسىدا 1 كىشى ئۆلدى. ئاناپادا 2 كىشى يارىلاندى. گېلېنجىكتا ئوخشاشلا 2 كىشى يارىلاندى» دېدى.
نوۋوروسسىيسك شەھەر باشلىقى ئاندرېي كراۋچېنكومۇ ئىجتىمائىي ئالاقە ھېسابىدا، شەھەردە جىددىي ۋەزىيەت ئېلان قىلىنغانلىقىنى ئۇقتۇردى.
رۇسىيە مۇداپىئە مىنىستىرلىقىدىن ئېلان قىلىنغان باياناتتا بولسا، كېچىدە ئۇكرائىناغا تەۋە 502 ئۇچقۇچىسىز ھاۋا ئاپپاراتىنىڭ ئوخشىمىغان رايونلار بىلەن قارادېڭىز ئۈستىدە ھاۋا مۇداپىئە سىستېمىلىرى تەرىپىدىن يوقىتىلغانلىقى بىلدۈرۈلدى.
