يائۇندې (ئانادولۇ ئاگېنتلىقى) – كونگو دېموكراتىك جۇمھۇرىيىتىدە تارقىلىۋاتقان ئېبولا ۋىرۇسى بىلەن يۇقۇملىنىپ ھاياتىدىن ئايرىلغانلارنىڭ سانى 3 مىڭ 982 گە، يۇقۇملانغۇچىلار سانى بولسا 8 مىڭ 224 كە يەتتى.

كونگو دېموكراتىك جۇمھۇرىيىتى سەھىيە مىنىستىرلىقىنىڭ ئەڭ يېڭى مەلۇماتلىرىغا قارىغاندا، ئېبولا ۋىرۇسى بىلەن يۇقۇملانغانلاردىن 2 مىڭ 121 كىشى ساقايغان، ئۆلۈش نىسبىتى % 48.4 بولغان.

يۇقۇمنىڭ تەسىرىگە ئۇچرىغان يەتتە ئىشتاتتىكى 63 رايوندا بىمارلارنى داۋالاش، ۋىرۇسنىڭ تارقىلىشىنىڭ ئالدىنى ئېلىش ۋە سەھىيە ئەترەتلىرىنىڭ ئىقتىدارىنى ئۆستۈرۈش خىزمەتلىرى داۋاملاشماقتا.

ئېبولا يۇقۇمى ئافرىقادا مىڭلارچە كىشىنىڭ جېنىغا زامىن بولدى

بىر خىل قاناشلىق قىزىتمىنى كەلتۈرۈپ چىقىرىدىغان ئېبولا ۋىرۇسى تۇنجى قېتىم 1976-يىلى سۇداننىڭ نزارا ۋە كونگو دېموكراتىك جۇمھۇرىيىتىنىڭ يامبۇكۇ شەھەرلىرىدە بىرلا ۋاقىتتا تارقالغان يۇقۇم بىلەن ئوتتۇرىغا چىققان ئىدى.

كونگو دېموكراتىك جۇمھۇرىيىتىدىكى يۇقۇم ئېبولا دەرياسىغا يېقىن بىر كەنتتە باشلانغانلىقى ئۈچۈن، بۇ كېسەللىككە مەزكۇر دەريانىڭ ئىسمى بېرىلگەن.

ئېبولا ۋىرۇسى 2013-يىلى دېكابىردا غەربىي ئافرىقادا تارقالغان ئىدى. گىۋىنېيە، لىبېرىيە ۋە سېررالېئوندا 2014-يىلىدىن 2017-يىلىغىچە كۆرۈلگەن يۇقۇمدا 30 مىڭ كىشىگە ۋىرۇس يۇققان ۋە بىمارلارنىڭ 11 مىڭدىن ئارتۇقى ئۆلگەن ئىدى.

كونگو دېموكراتىك جۇمھۇرىيىتىنىڭ شەرقىدىكى ئىتۇرى ئىشتاتىدا ئېلان قىلىنغان 246 گۇمانلىق يۇقۇملىنىش ۋە 65 ئۆلۈم ۋەقەسىدىن كېيىن، 15-مايدا يۇقۇم ئېلان قىلىنغان ئىدى.

سەھىيە دائىرىلىرىنىڭ بىلدۈرۈشىچە، ماي ئېيىدا پارتلىغان «بۇندىبۇگيۆ» (Bundibugyo) ئېبولا تۈرىنىڭ تېخىچە ئېنىق بىر داۋالاش ئۇسۇلى ياكى ۋاكسىنىسى يوق ئىكەن.